Isa 38
38
Re' yab'ilaal xub'an i Ezequías, eh re' noq xk'achjik
(2 Rey 20.1-11; 2 Cron 32.24-26)
1Eh chupaam q'iij re' re' xchoparik ruum i runimaal yaab'ilaal i reey Ezequías. Re' i Isaías jalal ruq'oral i Dios rak'uun i Amoz xponik ruuk', je' wili i xuq'or reh: Re' QaJaaw Dios je' wili i xuq'or aweh: Chayejaa' chib'ih jariik i naa ayejaam wach panapaat ruum naa akimiik, ma' naa ta chik ak'aachjiik, inki.
2Eh noq xrib'iraj chi je' re' i Ezequías xusutej i koq i wach, wach tz'aq, eh je' wili i xuq'or parutiij reh i QaJaaw Dios: 3QaJaaw Dios, re' hin inupahqaaj otob'il aweh chi k'oloq tii cho panak'ux chi xatnunimaj chi korik ruuk' i rukorkiil wach nuk'ux. Eh xti xnub'an chu'nchel nuk'ux imponik chawach, inki, eh xasuq suq chik inoq'ik.
4Re' i QaJaaw Dios je' wo' chik wili i xuq'or reh i Isaías: 5Hiy wo' chik ruuk' i Ezequías, je' wili i cha q'or reh: Re' i QaJaaw Dios je' wili i xuq'or aweh: Re' hin, hin ruDios i xikin aamaam David, xb'iraj chik i aatiij xwilow chik i riis naq'awach, ruum aj re' ko ho'lajuuj chik haab' naa nutiqim rooq aak'achariik. 6Re' hin naa nuko'liniik aweh, eh re' hin naa nuko'liniik reh i tinamit Jerusaleem pan q'ab' i kireey i aj Asiria, inki Dios.#38.6 Chupaam i versikulo 6 inyok' i q'orik ma'kanta chiriik ruum i re' xjohtik i 21 y 22 chixilak i 6 y 7. 21Re' Isaías je' wili xuq'or: Chake'j taq wach i higo nee taq inakoj chuwach i ru q'aah i Ezequías neenk'achjik, inki. 22Eh re' Ezequías xupahqaaj reh i Isaías chi je' wili: ¿Chib'ih rehtalil neenwilow chi naa nujohtiik parupaat i nuDios? inki. 7Re' i wili i rehtalil naa ruye'em i QaJaaw Dios, reh chi naa anab'eem, chi naa rub'anam aha' wilik i xuq'or. 8Re' QaJaaw Dios hoob' ora naa rusutem chi riij i q'iij. Ar naa ruk'utiniik chupaam i ilb'al ru ora i Acaz re' i rupaj wii' i ru ora ruuk' i q'iij, inki Isaías. Eh je' wo' re' i xk'ularik re' hoob' ora wo' sutinik chi riij. Eh xk'utinik chupaam i ilb'al ru ora i Acaz, chi re' q'iij xsutinik chi riij.
9Eh noq xk'achjik ruuk' i ruyab'ilaal i Ezequías kireey i aj Judá xutz'ihb'aaj taqe q'orik wili ye'b'al ruloq'il i QaJaaw Dios.
10Re' hin je' wili i xnuq'or:
Kopan yehjaal i nuk'achariik wilkiin, noq naawojiik muhqoq pan kiye'aab' i kamnaq.
Eh ma' naa ta nub'anam rusuqkiil i ruqox i nuk'achariik, kinki.
11Re' hin xnukapaaj chi ma' naa ta chik wilom,
wach i ruloq'il i QaJaaw Dios ayu',
eh chi ma' naa ta chik wilom kiwach
i k'achareel ayu' wach ak'al.
12Re' hin xnukapaaj chi xresaj chik i nuk'achariik i QaJaaw Dios.
Je' rukab' noq inehteesjik reje i ki-itz'ihy naah paat i aj cha'jen tentzun,
je' rukab' noq inyok'arik i keem,
ruum xa chi q'iij chi aq'ab' naq
chik wilkiin panti' k'axik ruum i yab'ilaal.
13Re' hin kinik'ik aq'ab' chi oq'ik ruum i ti' k'axik, ma' kiwirik ta ruum.
Je' cho kaq b'ahlam k'ahchi' rupaxiniik reh i nub'aqil noq inwik'raaj.
Eh chi q'iij chi aq'ab' kinik'ik chi ti'.
14Eh xama' nukuy ta chik i q'orik, xa je' chik kinoq'ik kok' siq'jil tz'ikin,
xa je' chik kinoq'ik i paloma.
Xa ma' nukuy ta chik johtoq i tz'eht pan taxaaj:
QaJaaw Dios q'e' ti' wilkiin kinatoob'eej tii.
15¿Chib'ih ta wo' chik i naa nuq'orom i hin,
ruum re' wo' i QaJaaw Dios xye'wik i ti' k'axik wili?
Re' hin naa nuwihiik pan chaq'lamiil chupaam i nuk'achariik
ruum i ruti'kiil i wánima.
16QaJaaw Dios re' hat inatob'eej taqe i winaq ruum i re' inwihik kik'achariik.
QaJaaw Dios re' hin weht'al chi nee kinatoob'eej
ruuk' i re' nee kinak'achrisaj neen wihik nuk'achariik.
17Yu'naak re' naq i ruti'kiil nuk'ux
xasutej chi rusuqkiil k'uxliis.
Re' hat xako'leej chik riij i nuk'achariik
xinawesaj chik pankimik,
ruum xakuy chik chu'nchel i numahk.
18Re' i wilkeeb' chik pankijuul ma' nee ta chik tikiloq'ej,
je' wo' taqe i kamnaq.
Re' taqe i kiooj panjul
ma' nee ta chik inkuy-eej i rukorkiil wach ak'ux.
19Xa re' wo' taqe i kok'achalkeeb' neenkian alooq'jiik
je' rukab' i k'ahchi' kiin hin yu'naak.
Re' taqe i tuutb'ees ajaab'ees inkiq'or reh
i kak'uun kixq'uun i rukorkiil wach ak'ux.
20Re' i QaJaaw Dios inko'linik weh,
ruum aj re' naa qaq'ojem i qa arpa
naaqatz'uyem wach i QaJaaw Dios parupaat
nik' chik najtiil i qak'achariik ayu' wach ak'al, inki Ezequías.
Currently Selected:
Isa 38: POK
Highlight
Share
Compare
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
