Isa 3
3
Re' Dios naa ruye'em i ti' k'axik chikinaah i aj Jerusaleem, i aj Judá
1Chab'iraj taq, re' i QaJaaw Dios nim rajaawriik,
naa risam chu'nchel inkich'ikaa' wii' kik'ux
i aj Jerusaleem, i aj Judá.
Naa resam i k'uxumb'al keh chi kiwa' chi kihaa'.
2Naa resam i winaq kow riib',
i aj q'aq'ineel, i aj q'atal q'orik,
i jalal ruq'oral i reh, i aj q'iij, i aj k'amal b'eeh.
3Naa resam intaaq'anik keh i lajeeb' roxk'ahl chi soldado,
i nim wach, i kojol na'ojb'al, i insik'wik chi riij i ch'umiil, i aj war.
4Eh kok' k'ijool chik i naa nukojom chi k'amal kib'eeh
reh chi re' chik i keh naa rutaaq'aniik keh.
5Re' i tinamit k'ul naa kitoq'aam peleto chikiwach,
ruuk' i kika'jaah kik'ula't.
Re' i k'ijolaq naa kitoq'aam peleto kuuk' i mama' winaq,
re' i ma' xta kina'ojb'al naa kitoq'aam peleto kuuk' i wilik kina'ojb'al.
6Eh parupaat i kajaaw, je' wili i naa kiq'orom reh i chaaq'b'ees:
Re' hat ko wilik aso' neerub'an chi,
re' chik i hat nee ti taaq'anik chinaah i qatinamiit wili
k'ahchi' rik'iik panti' k'axik, inko'q taqe.
7Eh re' i aasb'ees je' wili i naa ruq'orom:
Re' hin ma' nee ta nub'an rilariik i tinamit wili,
ruum ma' xta nuwa' nuhaa', ma' xta nuso' panupaat.
Maa kinakoj taq chi taaq'anik chinaah i tinamit wili, inko'q.
8Re' taqe aj Jerusaleem,
taqe aj Judá ilook' insahchik kiwach, ruum re' inki a'n
inkiq'or ma' imponik ta chuwach i QaJaaw Dios.
Ruuk' taqe re' inkesaj i ruloq'il.
9Re' keh xa panaq'kiwach ink'utinik chi yiib' wach i k'ahchi' keeb'.
Eh ma' nkikeb'aa' taj i kimahk, je' rukab' inki a'n chaloq i aj Sodoma,
ruum i re' q'e' ti' i naakik'ulum.
Ti' k'axik k'ahchi' kik'amam chaloq chikinaah.
10Eh re' taqe i korik wach kik'ux naakeliik korik,
eh naa kianam rusuqkiil i kikamaj.
11Eh re' taqe i yiib' wach kina'ojb'al keh q'e' ti' i naakik'ulum ruum
naakik'ulum jilow i yiib' wach inki a'n
12Re' i nutinamiit kok' ak'un i kow kitaaq'anik chikinaah,
eh ixoq taqe ink'amwik kib'eeh.
Re' taq i hat nutinamiit, xak'ahchi' taq kaat kijot'om i kik'amwik taq ab'eeh,
tikesaj taq chupaam i korik laj b'eeh.
13Re' i QaJaaw Dios ruyejaam chik cho riib' chi ruq'atariik i q'orik,
chuye'ariik panti' k'axik i rutinamiit.
14Re' i QaJaaw Dios naa ruq'atam i q'orik chikinaah i k'amal b'eeh,
chikinaah i ajaab'ees.
Je' wili i naa ruq'orom keh: Re' taq i hat xa a'n taq ti' k'axik keh i nutinamiit,
xa q'uch taq i wach i kitik i neb'aa', i nayeew taq panapaat.
15Eh re' taq i hat ¿Chib'ih reet noq i na a'n taq i ti' k'axik keh i nutinamiit?
¿Chib'ih reet noq inayeq' taq panak'al
taqe i neb'aa'? inki i QaJaaw Dios nim rajaawriik.
Re' i ti' k'axik naa ruchaliik chikinaah taqe ixoq wilkeeb' Sión
16Re' i QaJaaw Dios je' wili i xuq'or:
Ruum chi re' taqe ixoq wilkeeb' ar Sión,
xankinimb'isaj chik kiib',
xankijab'aa' chik i kiwach, xankiyejaa' chik inaq'kiwach.
Eh xa je' chik soon inki a'n xan tzalajinik chik taqe i xooyb'al reh kooq.
17Re' QaJaaw Dios, naa ruset'em i rismaal kinaah taqe ixoq wilkeeb' Sión.
Eh re' wo' i QaJaaw Dios naa ruk'uhtaniik kik'ixb'ilaal.
18Eh chupaam i q'iij re' re', re' QaJaaw Dios naa risam inkixoyej wii' kiib' ixoq,
naa resam taqe i xooyb'al ralaq kooq, i xooyb'al yejal kiwach.
19Naa wo' resam i karena chi kalaq, i kika'xikin, i kotokaq ch'ihch' ralaq kiq'ab'.
20Eh naa resam i itz'ihy inkikoj wach kinaah,
je' wo' inkikoj chi chaq'b'al reh i rismaal kinaah, je' wo' karena ralaq kooq,
je' wo' ink'ohnik laj iq'oom inkikoj,
je' wo' i xa chib'ih chik jariik inkixoyej wii' kiib'.
21Eh naa resam taqe i lopq'aaq' inkikoj, taqe i ch'ihch' inkilokaa' chi ki ju'.
22Eh je' wo' i holohaq itz'ihy inkikoj, i kinimaq rooq so',
i ma' piim ta laj itz'ihy reh wach kinaah, je' wo' hoq i bolso.
23Eh naa wo' resam i lemow inkikoj, i k'ih taq tz'aaq itz'ihy inkikoj,
itz'ihy xanlihik chik.
24Eh chi jilow ink'ohnik laj iq'oom xa chuh chik i kiwach naa rub'anam.
Eh chi jilow i holohik laj b'ak'b'al kipaam, k'ahaam chik i naa kikojom.
Eh chi jilow rujitz'ariik kinaah, johm chik wach i kinaah naa rukahniik.
Eh chi jilow i ch'ub'ik wach itz'ihy, q'as wach itz'ihy chik i naa kikojom,
chi jilow kiholwochiil naa rukojariik kehtalil ruuk' q'aaq'.
25Re' taqe i winaq inko'linik naq keh,
naa kikanteesjiik ruuk' q'aslaj ch'ihch', panq'aq'inik.
26Chupaam i q'iij re' re', ma' k'isiin ta naa rutib'iik kik'ux i tinamit re' re',
naa kikojom i kiq'eq so' chikiij, naakitzunaam kiib' panak'al.
Currently Selected:
Isa 3: POK
Highlight
Share
Compare
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
