Isa 2
2
Re' i Dios xuq'or chi naa ruye'em taqe pansuqkiil k'uxliis i tinamit
(Miq 4.1-3)
1Re' wili xk'uhtjik reh parusaq wiriik i Isaías rak'uun i Amoz, chi naakik'ulum i aj Judá, i aj Jerusaleem.
2Je' wili i xq'orarik reh: Naa ruponiik i q'iij noq
re' manlik rupaat i QaJaaw Dios wilik chinaah i yuuq',
re' re' naa ruwihiik runimaal wach
chikiwach chu'nchel i nimaq kiwach.
Eh re' i tinamit sut i wach ak'al naa kojiik chi rilariik.
3Eh re' i tinamit je' wili i naa kiq'orom:
Qoh johtoq chinaah i yuuq' wilik
wii' i rupaat i QaJaaw, re' i ruDios Jacob.
Eh neeruk'uhtaaj qeh i rub'eeh,
eh neenqak'am naah i nee ruq'or qeh, inko'q taqe.
Ruum ar Sión naa reliik chaloq i ruk'uhb'aal i Dios,
eh Jerusaleem naa reliik chaloq i ruq'oral.
4Eh re' reh naa ruq'atwiik i q'orik chikinaah i nimaq tinamit, i ruq'il i kok' i tinamit.
Re' i kiq'aslaj ch'ihch', naakisutem chi arado,
re' i kiq'as ju' ch'ihch' naa kisutem chi macheet.
Ma' naa ta chik kojiik chi kansanik ruuk' ruq'aslaj
ch'ihch' pan tokoom tinamit,
ma' naa ta chik kitijem i q'aq'inik.
5Chab'iraj taq i hat, rak'uun rixq'uun i Jacob,
qoh wih-oq taq parusaqumaal i QaJaaw Dios.
Re' i rub'aan i ti' k'axik keh i yiib' wach kina'ojb'al
6QaJaaw Dios re' hat xakanaa' aatinamiit, re' taqe i rak'uun rixq'uun i Jacob,
ruum inki a'n taqe i yiib' wach na'ojb'al, inchalik parelb'aal q'iij.
Eh inkiq'ijej kiib' je' rukab' inki a'n i aj filisteo,
eh inki a'n jinaj kiwach kuuk' i tokoom tinamit.
7Eh re' i kitinamiit nujinaq
chi plata, nujinaq chi oro,
eh xiik' naah k'ihaal i k'ih taq tz'aaq wilik keh.
Eh ma' k'isiin i kikawayu, i kikareta wilik.
8Eh re' i kitinamiit nujinaq paam chi tiyoox.
Re' xan kiyeew chik kik'ux chulooq'jiik i ki dios
xa re' keh xitz'aqwik reh ruuk' kiq'ab'.
9Re' keh inkixuk'aa' kiib',
inkiloch' kiib' chulooq'jiik i ki dios re' re'.
Re' hat QaJaaw Dios maakuy chik kimahk.
10Re' i tinamit naakikeb'aam kiib' pantaq paat ab'aj,
pantaq jul.
Ruum naa kiyo'jiik
ruum i rujosq'iil i runimaal wach i ruloq'il i QaJaaw Dios.
11Re' i nimaq kajaawriik naa ruloch'ariik kinaah,
eh re' taqe i kow kiib' naa rehtesjiik i runimaal kiwach.
Eh xa re' chik i QaJaaw Dios naa ruk'uhtaam i runimaal wach.
12Re' QaJaaw nim rajaawriik naa ruponiik i q'iij
noq naa resam i runimaal kiwach i wilik kajaawriik,
i yiib' wach kina'ojb'al,
je' wo' taqe i kow kiib'.
13Eh naa resam i runimaal kiwach inkikapaaj chi
je' kikab' inajt kinaah chee' chakaltee' ar Líbano.
Eh chi je' kikab' inajt kinaah tz'inuj ar Basán.
14Naa resam i runimaal kiwach i nimaq kiwach,
inkikapaaj chi je' kikab' taqe i yuuq' najt kinaah.
15Eh naa wo' resam i runimaal kiwach inkikapaaj chi je' kikab' inajt kinaah tz'aq,
eh chi je' kikab' i kowlaj koraal tz'aq.
16Naa kesam i runimaal kiwach inkikapaaj chi je' kikab' i b'ehlb'al kihq i aj Tarsis,
eh chi je' kikab' taqe i holohaq barco.
17Re' i QaJaaw Dios naa resam
i runimaal kiwach i wilik kajaawriik, i kow kiib'.
Eh xa re' chik i QaJaaw Dios naa ruk'uhtaam i runimaal wach chupaam taqe i q'iij re' re'.
18Eh naa rukuxiik rusacham kiwach chu'nchel i tiyoox.
19Chupaam taqe i q'iij re' re',
yohb'aal wach i ti' k'axik naa ruye'em chinaah i wach ak'al i QaJaaw Dios,
re' i tinamit naakikeb'aam kiib' pantaq paat ab'aj,
pantaq jul ruum ma' naa ta kikuyum,
i runimaal wach, i ruloq'il i QaJaaw Dios.
20Eh chupaam taqe i q'iij re' re',
re' i tinamit naa kikutum reje
chuwach i ch'ooh, chuwach i chikop tz'uhumxik' i kitiyoox re' ruuk' i oro,
i plata chi naa kiloq'em.
21Eh noq naa rub'anam i q'ataj q'orik
i QaJaaw Dios chinaah i wach ak'al,
re' i tinamit naakikeb'aam kiib' pantaq paat ab'aj,
pantaq nimaq jul.
Ruum ma' naa ta kikuyum rilariik i rujosq'iil i runimaal wach,
i ruloq'il i QaJaaw Dios.
22Eh maayeew taq chik ak'ux chikinaah i xa winaq,
ruum re' keh xa reh junk'aam i kik'achariik.
Eh ¿Chib'ih reet noq q'e' taq i nayeew kiloq'il?
Currently Selected:
Isa 2: POK
Highlight
Share
Compare
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
