Matey 5
5
Jax Jesús twi witz tu'n t-xi tk'o'n xnak'tzbil cye xjal
1Tejtzun tque'yinte Jesús nim xjal, jax twi witz; tejtzun tcub ke', e pon lak'e' ke t-xnak'tzben ttxlaj, 2ex oc ten k'ol xnak'tzbil cye ex tma:
Alcye ke at tzalajbil cye
Lucas 6.20-23
3At tzalajbil cye keju nne'l cynic' ti'j ka at tajben Dios cye, porque at cyoclen ti'j ju cawbil in tzaj tuj cya'j.
4At tzalajbil cye keju in che bisun, porque oc ck'ukbanjtzel cyc'u'j.
5At tzalajbil cye keju mans, porque oc cyc'ma' ju tx'otx' te cyetzbil.
6At tzalajbil cye keju nne'l cyc'u'j ex in che txket ti'j tu'n cyoc te tz'aklxix, porque ctzajel tk'o'n Dios aju cyajbil.
7At tzalajbil cye keju in k'ak'an cyc'u'j ti'j juntl, porque ctzajel k'ak'an tc'u'j Dios cyi'j.
8At tzalajbil cye keju sak tuj cyanmi, porque c'oquel cyque'yin Dios.
9At tzalajbil cye keju nno'c tilil cyu'n tu'n cyten xjal tuj tzalajbil cyxolx, porque c'oquel k'o'n cybi tc'wa'l Dios.
10At tzalajbil cye keju in che yajlanjtz tu'n tlaj ju in cybincha'n aju tz'aklxix, porque at cyoclen ti'j ju cawbil in tzaj tuj cya'j.
11At tzalajbil cyeye oc cyoc yaso'ne ex oc cyyajlanjtze tu'n nlaje ex oc cymante xjal tcyakil mya ba'n cyi'je mya ax toc. 12Che tzalajxe ex che tenxe alegr, porque aju oyaj ctzajel k'o'n cyeye tuj cya'j, ma'xix; porque icxtzun e yajlanjtz ke t-sanjel Dios cyu'n xjal ojtxi.
Akeye atz'an ex spic'un cyxol xjal
Marcos 9.50; Lucas 14.34-35
13Akeye atz'an cyxol xjal; katzun ma naj ta'w atz'an, ¿tza'n tten tu'n toctl ta'w? Minti'tl tajben, nok o'cx tu'n tex xo't ex tu'n tbaj waban cyu'n xjal.
14Akeye spic'un cyxol xjal. Jun tnam tcub twi' jun witz, mlay bant tewit. 15Ex oc toc txaket jun candil, mlay tz'ocx k'ot tjak' jun almi; nok o'cx cbel k'ot tibaj jun tcubil tu'ntzun tk'onte spic'un cye cycyakil keju ate' tuja. 16Cyja'xtzun tu'n tc'ant cyspic'umale cywitz xjal, tu'n cylonte aju cyak'unbene ba'n ex tu'n tjaw cynimsa'n tbi Cymane aju at tuj cya'j.
In tk'o'n Jesús xnak'tzbil ti'j tley Moisés
17Mi'n cub cyximane ka ma chin ule tu'n tnaj tley Moisés ex ka cyyol t-sanjel Dios; minti' ma chin ule tu'n tnaj, nok o'cx tu'n tjapun wu'ne. 18Porque ax toc cxel nma'ne cyeye, ka na'nxtok tnaj cya'j ex tx'otx', mlay naj jun tal punt ex ka jun tal letr ch'in te ley ka na'nxtok tjapun tcyakil. 19Cyja'tzun alcye jun xjal ma tzic' tibaj jun tal ch'in mandamyent cyxol jlu, ex ka ma txi tk'o'n xnak'tzbil cye xjal tu'n mi'n tjapun cyu'n, tal ch'inxix c'oquel k'o'n tuj cawbil in tzaj tuj cya'j. Pero alcye ma che japun tu'n, ex ka icx ma txi tk'o'n xnak'tzbil cye xjal tu'n tjapun cyu'n, atzunju c'oquel k'o'n te ma'xix tuj cawbil in tzaj tuj cya'j. 20Porque cxel nma'ne cyeye, ka minti' ma che oque mas tz'aklxix cywitz ke xnak'tzal ti'j ley ex ke parisey, mlay che ocxe tuj cawbil in tzaj tuj cya'j.
In tk'o'n Jesús xnak'tzbil tu'n mi'n kk'ojin
Lucas 12.57-59
21O cybiye o k'manjtz cye xjal ojtxi: Mi'n cye biyune; ex alcye jun xjal ma biyun, c'oquel tuj xjel twitz jwes, chi tuj ley. 22Atzun weye cxel nma'ne cyeye, alcye jun xjal ma tzaj tk'oj ti'j terman, c'oquel tuj xjel twitz jwes; ex alcye ma tz'oc yasonte terman, c'oquel tuj xjel cywitz aj Sanjelal mas ma' cyoclen; ex alcye ma txi tma'n tc'ayil yol te terman, mya yajcu jacu txi k'o'n tuj infierni tuj k'ak'.
23Cyja'tzun, oc t-xi'ya k'ol toyaja twitz altar, oc tpona ex ka ma tna'ya ka at jun tila twitz termaniya, 24axtzun cyjel tk'o'na toyaja twitz altar, ex nej txi'ya tuc'il termaniya tu'n tbant ttena tuc'il, maxitzun cxel tk'o'na toyaja.
25Ka at jun xjal at tk'oj ti'ja ex ma txi' k'ol part tuj jusgad, tz'oc tililx tu'na tu'n tbant naj ttena tuc'il atxtoka tuc'il tuj be, tu'ntzun mi'n tpon k'i'na twitz jwes tu'n aj k'oj ti'ja, ex tu'n mi'n t-xi k'o'na te polisiy tu'n jwes, ex tu'n mi'n tocx k'o'na tuj pres. 26Ax toc cxel nma'ne teya, mlayx tz'etza tuj pres ka mya cabal tmulta c'oquex tk'o'na.
In tk'o'n Jesús xnak'tzbil tu'n mi'n kbinchante aj pajil
27O cybiye aju o k'manjtz ojtxi: Mi'n tbinchaya aj pajil, chi tuj ley. 28Atzun weye cxel nma'ne cyeye, alcye jun ma txi que'yinte jun xu'j ex in pon tc'u'j ti'j tu'n tbinchante mya ba'n tuc'il, ma tbincha aj pajil tuj tanmi.
29Ka tu'n tlaj tbak' twitza tuj bank'abaj cbel tz'aka tuj il, k'i'metza ex xo'mixa; porque mas ba'n tu'n tnaj jun tbak' twitza ex mya tu'n t-xi k'ot tcyakil t-ximlala tuj infierni. 30Ex ka tu'n tlaj tbank'aba cbel tz'aka tuj il, tx'emin ela ex xo'mixa; porque mas ba'n tu'n tnaj jun tk'aba ex mya tu'n t-xi k'ot tcyakil t-ximlala tuj infierni.
In tk'o'n Jesús xnak'tzbil tu'n mi'n tcub kpa'n kib tuc'il kxu'jil
Matey 19.9; Marcos 10.11-12; Lucas 16.18
31Ax icx o k'manjtz ojtxi: Alcye jun ma tz'el tlajo'n t-xu'jil, k'onx jun u'j te jatum in tma'n ti'j tcublen cypa'n cyib, chi tuj ley. 32Atzun weye cxel nma'ne cyeye, ka at jun xjal ma cub tpa'n tib tuc'il t-xu'jil ex ka minti' otok tbincha xu'j aj pajil, tu'n tlaj xinak mya yajcu tbincha xu'j aj pajil; ex ka ma moje' juntl xinak tuc'il ju xu'j otok tz'el lajo'n, ax icx in tbincha'n aj pajil.
In tma'n Jesús tu'n mi'n t-xi kma'n tzkan Dios
33Ax icx o cybiye o k'manjtz cye xjal ojtxi: Mi'n txi cyma'ne tzkan Dios ti'j jun yol mya ax toc, nok o'cx japunx cyu'ne aju otok txi cytziyane te Kman, chi tuj ley. 34Atzun weye cxel nma'ne cyeye, mi'n txi cymane tzkan Dios, mi'n tzaj cyna'ne cya'j, porque atzun tk'ukbil Dios jatum in cawin, 35ex mi'n tzaj cyna'ne tx'otx', porque tcub tkan Dios tibaj; ex mi'n tzaj cyna'ne tnam Jerusalén, porque atzun tnam etzan tu'n nintz Rey. 36Mi'n tzaj cyna'ne cywi'ye oc t-xi cytziyane jun yol, porque mlay bant cyu'ne tu'n toc jun ttzmal cywi'ye sak ex ka k'ek. 37Nok o'cx tu'n t-xi cyma'ne oc ex ka mi'n; porque ka ma tz'oc cyk'o'ne juntl yol tibaj jlu, atzun in tzaj tuc'il tajaw il.
In tma'n Jesús tu'n mi'n taj kk'o'n t-xel mya ba'n
Lucas 6.29-30
38O cybiye o k'manjtz cye xjal ojtxi: Ka at jun ma jatz tbak' twitz tuc'il tu'n, ax icx te tu'n tjatz tbak' twitz, ex ka ma tz'etz twitz te' tuc'il tu'n, ax icx te il ti'j tu'n tetz jun twitz te'. 39Atzun weye cxel nma'ne cyeye: Mi'n tz'aj cymojtza'ne k'oj tuc'il ju xjal mya ba'n; ex ka at jun xjal ma tz'oc jun tk'o'txa tu'n, k'onxa juntl pac' tk'o'txa, ka taj xjal tu'n toc juntl. 40Ex ka at jun xjal taj tu'n t-xi k'i'na tu'n twitz jwes tu'n tel k'i'n tcamiẍa, ax icx tchicyeta k'onxa te. 41Ex ka at jun xjal ma tz'oc jwersina tu'n tu'n t-xi ti'na tikatz tu'n tbeta mey ojlab tuc'il, txi'ya tu'n tbeta jun ojlab tuc'il. 42Ka at jun xjal in tkanin jun ti'xti teya, k'onxa ch'in te; ex ka at jun xjal in tkanin tch'ex teya, mi'n cub t-xc'ayina.
Cyc'ujlame aju aj k'oj cyi'je
Lucas 6.27-28,32-36
43O cybiye aju o k'manjtz ojtxi: Cyc'ujlame ke cyuc'ile, atzunju aj k'oj cyi'je c'elel cyic'une, chi tuj ley. 44Atzun weye cxel nma'ne cyeye: Cyc'ujlame ke aj k'oj cyi'je, che yoline ba'n cyi'j keju in che yasun cyi'je, cybinchame ba'n cye keju in che ic'un cyeye, ex che na'ne Dios cyi'j keju in che ilin cyi'je ex in che yajlan cyeye. 45Cyc'ujlamtzune, tu'ntzun tel nic'baj cyi'je ka c'wa'lbaj keye te Cymane aju at tuj cya'j; porque tu'n in ja'wil k'ij cyibaj ke xjal mya ba'n ex ke xjal ba'n, ex ax in tzaj k'onte jbal cyibaj ke xjal tz'aklxix ex ke xjal mya tz'aklxix. 46Katzun o'cx ma cyc'ujlaye keju in che c'ujlan cyeye, ¿alcyetzun oyaj ctzajel k'o'n cyeye ti'j jlu? ¿Myapetzun icx in cybincha'n ke peyil pwak? 47Ex ka o'cx ke cyermaniye in cyk'olbe'ne, ¿alcyetzun in cybincha'ne aju minti' in bant cyu'n mastl xjal? ¿Myapetzun icx in cybincha'n ke txkantl xjal minti' nne'l cynic' ti'j Dios? 48Cyja'tzun, che ocxe tz'aklxix ic tza'n te Cymane aju at tuj cya'j tz'aklxix te.
Currently Selected:
Matey 5: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993