Matey 6
6
In ko t-xnak'tza'n Jesús tu'n konin cyi'j meba
1Ten cycwente ti'j tza'n tten tu'n cybinchanteye aju in tma'n cyocslable, mya nok o'cx tu'n cyoc que'yine cyu'n xjal; katzun ma cybinchaye nok tu'n cyoc que'yine cyu'n xjal, mlaylo tzaj k'o'n jun oyaj cyeye tu'n Cymane aju at tuj cya'j. 2Cyja'tzun oc t-xi cyk'o'ne cotzbaj, mi'n baj cyyoline cye xjal ic tza'n in cybincha'n ke xmletz' cyuj ke ja te c'ulbil ex tuj cay, tu'ntzun cyjaw nimsa'n cyu'n xjal. Ax toc cxel nma'ne cyeye, o'cxtzun ch'in chojbil cyeju. 3Atzun cyeye oc t-xi cyk'o'ne cotzbaj, minti' tu'n cybinte mastl oc t-xi cyk'o'ne. 4Cyja'tzun tuj ewaj cxel cyk'o'ne cotzbaj; porque in que'yin Cymane ti'j aju in xi cyk'o'ne tuj ewaj, ex ctzajel tk'o'n t-xel cyeye.
In ko t-xnak'tza'n Jesús tza'n tten tu'n kna'n Dios
Lucas 11.2-4
5Ex oc cyna'ne Dios, mi'n cybinchaye ic tza'n ke xmletz', porque at-xix cygan tu'n cyna'n Dios wa'l ke cyuj ja te c'ulbil ex jatum in che moje' cay, tu'ntzun cyoc que'yin cyu'n xjal. Ax toc cxel nma'ne cyeye, o'cxtzun ch'in chojbil cyeju. 6Atzun cyeye, oc cyna'ne Dios cyocxe tuj cyjaye, ex cylmo'metze tpwertil ja, ex che yoline tuc'il Cymane aju at tuj ewaj, ex aju Cymane in que'yin tuj ewaj, ctzajel tk'o'n t-xel cyeye. 7Atzun cyeye oc cyna'ne Dios, mi'n txi cyma'ne ela' maj axju yol ic tza'n in cybincha'n ke txkantl xjal minti' nne'l cynic' ti'j Dios; porque tuj cynabl ka tu'nju nimcu cyyol che tzajel bi'n. 8Mi'ntzun cybinchaye ic tza'n cye; porque ate Cymane ojtzki'majtl tu'n alcyeju at tajbenxix cyeye, na'nxtok t-xi cykanine te. 9Cyja'tzun che na'ne Dios cyja':
A Kman ata tuj cya'j, tenwt tchiylal tbiya keye.
10E ttzaj ju tcawbila.
Bant-xwit ju tajbila twitz tx'otx' ic tza'n in bant tuj cya'j.
11K'ontza kwaye ja'lo, aju in ajben tcyakil k'ij.
12Ex najsama aju mya ba'n in kbincha'ne twitza, ic tza'n keye in cub knajsa'ne cypaltil keju in cybincha'n mya ba'n ki'je.
13Ex mi'n tak'a ambil tu'n koque tuj joybil ki'je, nok o'cx ko tcloma teju mya ba'n.
Porque teya ju cawbil, ex ipumalj, ex ajwalil te jumajx. Icxwitju.
14Porque ka ma cub cynajsa'ne aju mya ba'n in cybincha'n xjal cyi'je; ax icx cbel najsa'n cyile tu'n Cymane aju at tuj cya'j. 15Pero ka minti' xcub cynajsa'ne aju mya ba'n in cybincha'n xjal cyi'je, ax icx te Cymane mlay cub najsa'n cyile tu'n.
In ko t-xnak'tza'n Jesús tza'n tten tu'n tcub kyo'n we'yaj
16Ex oc tcub cyyo'ne we'yaj, mi'n txi cyyec'une cywitze miyalnix ka in che bisune ic tza'n ke xmletz'; porque miyalnix nno'c cywitz tu'n cyyec'unte cyib cywitz xjal ka in cub cyyo'n we'yaj. Ax toc cxel nma'ne cyeye, o'cxtzun ch'in chojbil cyeju. 17Atzun cyeye, oc tcub cyyo'ne we'yaj, cyxebancu cywi'ye ex cytx'jo'mel cywitze, 18tu'ntzun mi'n t-xi cyyec'une cye xjal ka in cub cyyo'ne we'yaj, nok o'cx te Cymane aju at tuj ewaj; ex aju Cymane in que'yin tuj ewaj, ctzajel tk'o'n t-xel cyeye.
Aju k'inumabl tuj cya'j
Lucas 12.33-34
19Mi'n baj cychmo'ne cyk'inumable twitz tx'otx' jatum in naj tu'n poc' ex tu'n acom, ex nno'cx cylacu'n elek' t-xe ja tu'n tetz cyelk'a'n. 20Nok o'cx cychmome cyk'inumable tuj cya'j jatum minti' in naj tu'n poc' ex tu'n acom, ex minti' nno'cx cylacu'n elek' t-xe ja tu'n tetz cyelk'an. 21Porque jatum ta' cyk'inumable, atzun toc cyanmiye ti'j.
Aju spic'un te kximlal
Lucas 11.34-36
22Aju spic'un te kximlal, atzunju tbak' kwitz; cyja'tzun ka ba'n ta' tbak' cywitze, tcyakiltzun cyxmilale at tuj spic'un. 23Katzun mya ba'n ta' tbak' cywitze, tcyakil cyximlale at tuj klolj. Katzun ma tz'oc te klolj aju spic'un at cyuje, mas nimxix cchmetel ju klolj.
Dios ex ju k'inumabl
Lucas 16.3
24Mi jun xjal jacu bant tu'n tajben te cabe patrón: porque c'elel tic'un jun, atzun juntl oc tc'ujla', ex ka o'cx oc c'ajbel te jun patrón, atzun juntl minti' taj ti'j. Mlayx bant tu'n cyajbene te Dios ex te k'inumabl.
Ke tc'wa'l Dios cwentin ke tu'n
Lucas 12.22-31
25Cyja'tzun cxel nma'ne cyeye: Mi'n baj cyc'u'je ti'j cychwinklale, ti cxel cywa'ne ex ka ti cxel cyc'ane; ex mi'n baj cyc'u'je ti'j cyximlale, ti c'oquel cyk'o'ne cyi'je. ¿Myapetzun mas ma' t-xilen cychwinklale twitz wabj? ¿Ex myapetzun mas ma' t-xilen cyximlale twitz xbalun? 26Cyque'yinxe ke chyu'j; minti' in che awan ex minti' in che chmon twitz awal, ex minti' cytx'utx' te chmobl cywa; pero ate Cymane aju at tuj cya'j nno'c c'a'chante cye. ¿Myapetzun mas ma' cyxilene cywitz ke chyu'j? 27¿Ex alcye jun cyxole jacu bant tu'n tu'n toc tk'o'n cabe xc'achubtl twa'l tu'nju nimxix in baj tc'u'j ti'j?
28¿Ex tiku'n in baj cyc'u'je ti'j cyxbalune? Che ximane cyi'j bech tuj c'ul tza'n tten in che ch'iy; minti' in che ak'nan, ex minti' in che chkon. 29Pero cxel nma'ne cyeye ti'j rey Salomón, masque tbanilxix t-xbalun oc tk'o'n, pero minti' pon jun t-xbalun ic tza'n cye tal bech lu. 30Katzun ka ic in t-xbalumi'n Dios tal c'ul tuj cojbil at ja'lo ex nchi'j tz'ocx k'o'n tuj k'ak', ¿yajtzun cyeye, mlaypelo che xbaluminjtze tu'n, akeye xinak ch'in cyocslable? 31Cyja'tzun mi'n baj cyc'u'je, ex mi'n cymaye: ¿Ti cxel kwa'ne? ex ka ¿ti cxel kc'ane? ex ka ¿jatum ctzajel kxbalune? 32Porque ke txkantl xjal in che jyon ti'j tcyakil jlu; pero at jun Cymane aju at tuj cya'j ojtzki'n tu'n ka at tajben tcyakil jlu cyeye. 33Cynimanxe tnejelxix aju tcawbil Dios ex tu'n cybinchanteye aju tz'aklxix twitz; tcyakiltzun jlu ctzajel k'o'n cyeye. 34Cyja'tzun, mi'n baj cyc'u'je ti'j ju te nchi'j, porque aju te nchi'j texte tbis ctzajel. Aju nnic'x ku'n tuj jun k'ij, acuxju.
Currently Selected:
Matey 6: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993