Matey 4
4
Tej toc Jesús tuj joybil ti'j
Marcos 1.12-13; Lucas 4.1-13
1Xitzun k'i'n Jesús tu'n Xewbaj Xjan tuj lugar minti' cynajbil xjal tuj, tu'n toc tuj joybil ti'j tu'n tajaw il.
2Ex tbajlenxitzun 40 k'ij tuc'ix 40 konic'an tcublen tyo'n Jesús we'yaj, tzajtzun el tc'u'j. 3Pontzun tajaw il tuc'il tu'n toc Jesús tuj joybil ti'j tu'n, ex xi tma'n te:
—Ka Tc'wa'l Diosa, k'manxa tu'n cyoc abj lu te wabj.
4Xitzun ttzak'we'n Jesús:
—At jun yol in tma'n tuj Tu'jil: Mya nok o'cx tu'n wabj c'ank'il xjal, ax icx jacu tz'ank'in xjal tu'n tcyakil yol in tma'n Dios.
5Xitzun k'i'n Jesús tu'n tajaw il tuj Jerusalén aju tnam xjan, jax tk'o'n max twi' tja Dios. 6Ex xi tma'n tajaw il te Jesús:
—Ka Tc'wa'l Diosa, xon cu'x tiba twitz tx'otx'; porque at jun yol in tma'n tuj Tu'jil:
Cxel tma'n Dios cye t-anjel tu'n toc cwentina cyu'n. Ctzyetela cyu'n tu'n cyk'ab tu'n mi'n toc tocpaj tkana ti'j abj, chi tuj Tu'jil.
7Xi ttzak'we'n Jesús te:
—Ax icx at jun yol in tma'n tuj Tu'jil: Mi'n tz'oc cyk'o'ne Kman Dios tuj malbil.
8Xi k'i'n Jesús juntl maj tu'n tajaw il, pon k'i'n twi' jun witz ma' twa'l, ex xi tyec'un tajaw il te Jesús cycyakil tnam ate' twitz tx'otx', tuc'ix cyoclen ma'xix. 9Ex xi tma'n tajaw il te Jesús:
—Tcyakil jlu cxel nk'o'ne teya ka ma cub ẍmeje'ya c'ulul nwitze.
10Xitzun tma'n Jesús te:
—Txi'ya Satanás, porque at jun yol in tma'n tuj Tu'jil: Twitz Kman tu'n cyc'ulune, aju Cydiose, ex o'cx te tu'n cyajbene.
11Cyajtzun k'o'n Jesús tu'n tajaw il; ex e ul ke anjel tuc'il Jesús tu'n cyajben te.
Tej ttzyet tak'un Jesús tuj Galiley
Marcos 1.14-15; Lucas 4.14-15
12Tejtzun tbinte Jesús ka otok tz'ocx Juan tuj pres, xi' tuj tx'otx' Galiley. 13Cyaj tcolin Jesús aju tnam Nazaret, ex xi' tu'n tnajan tuj tnam Capernaum, atzun tcub tnam lu ttzi laguna tuj cytx'otx' aj Zabulón ex aj Neftalí. 14Xi' tu'ntzun tjapun aju yol cyaj tma'n Isaías aju t-sanjel Dios chi cyja':
15Aju tx'otx' Zabulón tuc'ix ju tx'otx' Neftalí, jatum in xi' be ttzi mar, jlajxi nima Jordán, aju tx'otx' Galiley jatum najl ke xjal mya judiy ke;
16ke xjal ate' tuj klolj o cyil jun spic'un ma'xix; ex ke xjal najlke tuj jun tx'otx' jatum ta' klolj ex camic, cub koptz'aj jun spic'un cyibaj, chi Isaías.
17Bi'xtzun xe't tak'un Jesús tu'n tpacban, ex in tma'n:
—Tajtz ti'j cyanmiye porque aju cawbil in tzaj tuj cya'j ma tzul lak'e'.
Tzaj ttxco'n Jesús cyaje xjal tzyul cyiẍ ke
Marcos 1.16-20; Lucas 5.1-11
18In bettok Jesús ttzi laguna tuj Galiley, o til cabe xjal cyitz'in cyib: Ate Simón aju Pedro tbi, tuc'ix titz'in Simón aju Andrés tbi in cu'x cyk'o'n xyub tuj a' te tzuybil cyiẍ, porque tzyul cyiẍ ke. 19Xi tma'n Jesús cye:
—Che lpetze wi'je, ex che oquel nk'o'ne tzyul xjal ic tza'n in che tzyet cyiẍ.
20Jurattzun naj cyaj cyk'o'n cyxuyb ex e oc lpe' ti'j Jesús.
21Tej t-xi lak'e' ch'intl Jesús, o til cabetl xjal cyitz'in cyib: Ate Jacobo aju tcy'ajal Zebedey, tuc'ix Juan aju titz'in Jacobo ate' tuj barc tuc'ix Zebedey aju cyman, in che xbukin cyxuyb. E tzajtzun ttxco'n Jesús. 22Jurattzun naj cyaj cyk'o'n cybarc tuc'ix cyman ex e oc lpe' ti'j Jesús.
Xi tk'o'n Jesús xnak'tzbil cye nimcu xjal
Lucas 6.17-19
23Bajtzun tbetin Jesús tuj tcyakil Galiley in tk'o'n xnak'tzbil cyuj ja te c'ulbil cye judiy, in pacban ti'j tkanil ba'n ti'j tcawbil Dios, ex in che banix ke yab tu'n nok alcyex cyyabil, cyuc'ix ke xjal at c'ixc'oj cyi'j. 24Ex el tkanil Jesús tuj tcyakil tx'otx' Siria; ex e ul k'i'n twitz Jesús cycyakil xjal at c'ixc'oj cyi'j, cyuc'ix keju in che yajlanjtz tu'n junxilchak yabil ex at in chyon cyi'j, ex keju in che yajlanjtz cyu'n ju'ẍ, ex keju toc tyab cywi', ex keju tzkijle'n cyyabil; cycyakil e banix tu'n Jesús. 25Ex nim xjal e oc lpe' ti'j Jesús, e tzaj tuj Galiley ex cyuj ke tnam tuj tx'otx' Decápolis, ex tuj Jerusalén, ex tuj Judey, ex at e tzaj jlajxi nima Jordán.
Currently Selected:
Matey 4: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993