Sal 91
91
Ri Dios jari' ri qatobal roj
1Ri nikito-ki' rik'in ri nimalej rutzil ri Dios,
kan kuqul k'a kik'u'x yek'oje' chuxe' ri rumujal rija'.
2Yin kan ninbij k'a chire ri Jehová, chi ja rija' ri nutobal.
Rija' kan achi'el jun jay ri sutin-rij chi tz'aq ri akuchi ninto-wi-wi'.
Ja rija' nu-Dios ri kan nukuquban nuk'u'x rik'in.
3Ja rija' xtijech'en qichin chuwech ri pikbel ri nuya' ri kamisanel.
Xqojrukol chuwech ri nima-yabil ri kan yojruk'is.
4Xqojrukuch k'a rik'in ri ruxik'.
Chuxe' ri' kan kuqul qak'u'x xqojk'oje'.
Rija' xqojruto' y man xqojrumalij ta kan.
5Man xtiqaxibij ta qi' chuwech ri q'equ'm richin ri chi'aq'a'.
Man xtiqaxibij ta qi' chire ri ch'ab ri yek'aqalox ri paq'ij.
6Ni man xtiqaxibij ta qi' chire ri nima-yabil ri nuk'en-pe ri q'equ'm,
ni chire ri kamik ri kan chuwa-saqil yebanatej.
7Stape' chiqanaqaj yekamisex ta e 1,000 winaqi',
y ek'o ta chik e 10,000 ri yekamisex kan pa qijkiq'a',
jak'a roj kan man jun k'a xtiqak'uluwachij.
8Ronojel re' kan xtiqatz'et k'a roj rik'in ri runaq' taq qawech.
Kan xtiqatz'et k'a ri xtikik'ul ri maneq Dios chikiwech.
9Jak'a roj man jun xtiqak'uluwachij roma qakuquban qak'u'x rik'in ri Jehová.
Roj kan rik'in k'a rija' niqato-wi-qi'.
10Roma ri' kan man jun k'a ruk'ayewal xtipe chiqij.
Man jun k'a nima-yabil ri xtapon pa qachoch.
11Ri Dios kan xkeruteq k'a pe ri ru-ángel chiqanaqaj.
Xqojkichajij k'a chijun qak'aslen.
12Xqojkili'ej k'a pa kiq'a'.
Keri' roj man xtiqapajk'ij ta ri qaqen.
13Xqojbiyaj k'a chikikojol ri koj y ri kumetz.
Stape' xqojq'ax pa kiwi' alaji' taq koj y pa kiwi' itzel taq kumatzi' ri kan yekamisan, man jun xtiqak'uluwachij.
14Ri Jehová nubij: Roma kan wik'in yin rukuquban-wi ruk'u'x, yin kan xtinkol.
Kan xtinya' pa jotol, roma kan ruya'on rejqalen ri nubi'.
15Rija' k'o xtuk'utuj chuwe, y yin xtink'uluba-pe ri ruch'abel.
Kan xkik'oje' rik'in pa bis,
Xtinkol k'a y xtinnimirisaj ruq'ij.
16Xtinya' k'a k'iy q'ij ruk'aslen chuwech re ruwach'ulew.
Y kan xtink'ut k'a chuwech ri kolotajik ri ninya'.
Currently Selected:
Sal 91: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
