Sal 90
90
Ri Dios kan richin q'asen y ri wineq xa q'axel*f93*
1Ajaw, kan ja rat ri at qatobal,
keri' jantape' oj peteneq ri chi wiq chi tanaj.
2Kan ja toq k'a man jani kebek'ulun-pe ri nima'q taq juyu',
toq k'a man jani taben ri ruwach'ulew y ronojel ri k'o chuwech,
kan jampe' ri q'ij peteneq, tibe-q'ij tibe-seq, kan xaxe wi rat ri at Dios.
3Rat kan naben chiqe chi yojok chik ulew.
Kan yojawoyoj-wi richin yojok chik poqolaj.
4Chawech rat ri 1,000 juna', xa kan man jun ok.
Xa kan achi'el ok ri jun q'ij iwir ri xa xq'ax yan kan,
achi'el jun ti ramaj chire ri chi'aq'a'.
5-6Kan yojak'uaj k'a el, achi'el nuben ri raqen-ya'.
Ri qak'aslen man niyaloj ta, xa achi'el ok jun achik'.
Achi'el jun q'ayis ri nik'iy-pe ri nimaq'a'; y nisijan-pe.
Jak'a ri tiqaq'ij xa nich'up-qa y xa nichaqi'j-qa.
Keri' ri qak'aslen roj.
7Rik'in ri awoyowal yojak'is.
Roj kan nisach qak'u'x toq rat niyakatej awoyowal.
8Ri qamak kan ronojel k'a natz'et-pe.
Ri itzel taq qabanobal, kan ronojel k'a tik'il chawech rat.
9Ri q'ij chire ri qak'aslen xa kan beneq pa xulan roma rat nipe awoyowal chiqe.
Ronojel juna' ri niqaq'axaj, xa achi'el ok jun ch'obonik.
10Ri qak'aslen chuwech re ruwach'ulew, kan xaxe k'a oxk'al lajuj juna'.
Jak'a wi ek'o ri k'o más kuchuq'a', ye'apon k'a pa jumuch' kijuna'.
Man rik'in ri', xa kan xaxe q'axo'n y ruk'ayewal ruk'amon-pe
Ri qak'aslen xa kan chi'anin k'a niq'ax y xqojbe.
11¿Achike ta k'a wineq ri retaman ri retabal ri awoyowal rat,
ri awoyowal ri kan ruk'amon chi niqak'en rukiy?
12Tabana' utzil Jehová, tak'utu' chiqawech ri rubanik richin yojk'ase',
richin keri' kan ta nipe pa qánima ri na'oj.
13¿K'a janipe' k'a xkape chik Jehová richin no'aya' chik ri awutzil pa qawi'?
Tabana' utzil tik'o-qa ri awoyowal chiqij roj ri oj asamajela'.
14Taya' ri awajowabal chiqe ronojel nimaq'a',
richin roj xqojbixan y xqojkikot ta ronojel q'ij chire ri qak'aslen.
15Taya' k'iy q'ij richin kikoten chiqe, achi'el ri rajlabal ri q'ij ri xqaq'axaj pa tijoj-poqonal,
achi'el rajlabal ri juna' ri kan xaxe ri ruk'ayewal ri xqatz'et.
16Xtiq'alajin ta chik pe ri meyel taq abanobal qik'in roj ri oj asamajela'.
Ri ak'ojlemal rat kan ta xtiq'alajin-pe pa kiwi' ri qijatzul.
17Jehová ri at qa-Dios roj, ri asaqil rat ja ta ri' ri xtisaqirisan pa qawi' roj.
Ronojel ri samaj ri yeqaben roj kan ta xtawurtisaj-pe.
Kan keri', ri samaj ri yeqaben kan ta xtiqa' chawech rat Jehová.
Currently Selected:
Sal 90: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
