Sal 92
92
Bix roma ri rutzil ri Dios*f94*
1Nimalej Jehová, kan janila k'a jebel ri niya'ox aq'ij rat.
Ri nibixex ri nimalej abi' kan janila jebel.
2Ri pa taq nimaq'a' kan xtitalux k'a rutzijol ri awutzil rat.
Y ri pa taq tokoq'a', xtinatex k'a chi rat kan naben ri asujun.
3Re' kan xtibixex k'a rik'in jalajoj kiwech q'ojom.
4Ronojel re' ninben roma rat nimalej Jehová kan aya'on ri nukikoten.
Kan yikikot k'a rik'in ronojel ri abanon.
5Nimalej Jehová ri samaj ri e abanon rat kan janila k'a e nima'q.
Ri ach'obonik rat kan janila k'a e nima'q.
6Ri wineq ri man jun retaman,
man niq'ax ta k'a chuwech ronojel re'.
7Wi ri e banoy etzelal yek'iy achi'el ri q'ayis,
y utz nikiben-q'anej,
xaxe richin yek'is jumul.
8Jak'a rat Jehová kan jantape' k'a nimalej aq'ij.
9Nimalej Jehová, ri e etzelanel awichin xa kan xkek'is k'a jumul.
Xa kan xketalutej k'a el jumul ri e banoy taq etzelal.
10Jak'a yin kan xtaya' más wuchuq'a', achi'el ri ruchuq'a' ri juyubel bóyix.
Xtaqasaj k'a aceite pa nuwi', retal richin kikoten.
11Yin kan xintz'et k'a ri xkik'uluwachij ri e etzelanel wichin.
Kan xinwak'axaj k'a toq yesik'in ri e yakatajineq chuwij.
12Ri winaqi' ri choj kik'aslen, kan utz k'a xtel chikiwech ronojel ri nikiben,
xkek'iy k'a achi'el ri palma, y achi'el ri tiox-che' ri k'o pa Líbano.
13Rije' kan xkebe k'a pa jotol achi'el ri che' ri e tikil chuwa-rachoch ri Jehová,
achi'el ri che' ri yesijan chuwa-jay chire ri rachoch.
14Stape' kan k'o chik kijuna', kan utz nel chikiwech ronojel.
Kan jantape' k'a k'o kuchuq'a' y jebel yetzu'un.
15Y keri' nitalutej ri utzilej rutzijol, chi ri Jehová ri nutobal kan choj-wi,
y chi rik'in rija' kan xaxe ri ruchojmilal k'o.
Currently Selected:
Sal 92: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
