Sal 89
89
Ri jikibel-tzij ri rubanon ri Dios rik'in ri David*f91*
1Kan jantape' k'a xtinbixaj ri awutzil rat Jehová.
Kan xtintzijoj chike ri chi wiq chi tanaj winaqi', chi man oj amalin ta kan.
2Xtintaluj k'a rubixik chi ri awajowabal rat kan richin q'asen,
ri nabij rat chi naben, kan man xtijalatej ta.
Kan man nujel ta ri', achi'el ri kaj ri kan ja ruwech jantape'.
3Rat Jehová kan xaben k'a jun jikibel-tzij rik'in ri asamajel ri acha'on.
Xaya' k'a atzij chire ri David ri asamajel.
4Xabij chi kan richin k'a q'asen xajikiba' ri rijatzul.
y ri rajawaren kan jantape' k'a xtibe pa jotol.
5Nimalej Jehová, chila' chikaj nak'axatej nimaq'ij roma ri nima'q taq banobel ri ye'aben rat.
Ri aj-chikajil kan nikiya' aq'ij roma kan naben ri asujun.
6Man jun k'o chila' chikaj ri achi'el rat.
Man jun ri k'o chila' awik'in ri junan ta awik'in rat.
7Rat kan k'o-wi aq'ij-ak'ojlen chikiwech ri ek'o awik'in.
Konojel janila nikixibij-ki' chawech.
8Nimalej Jehová, Dios k'iytisanel richin ronojel, ¿achike ta chik k'a jun ri achi'el rat?
Rat kan k'o ronojel uchuq'a' pan aq'a'.
Ronojel ri asujun, kan abanon.
9Rat kan naq'et k'a ri royowal ri palou toq nibolqo't-pe ruwi',
rat kan naben k'a chire chi nisiliso-qa.
10Rat kan xach'akon chirij ri chikop Rahab,*f92* y xaben chi xken.
Rik'in ri nimalej awuchuq'a', xe'ach'ek y xe'ataluj ri e etzelanel awichin.
11Kan awichin k'a rat ri kaj y ri ruwach'ulew.
Chijun ri ruwach'ulew y ronojel ri k'o chuwech, ja rat xabanon,
12nitiker-pe pa xaman y napon k'a pa xokon.
Ri juyu' Tabor y ri Hermón kan yebixan rik'in kikoten richin nikiya' aq'ij.
13Ri aq'a' rat kan k'o-wi ruchuq'a'.
Y rat kan at ch'akonel.
14Rat kan jantape' k'a naq'et-tzij pa ruchojmilal y jantape' naben ri nabij,
ri awajowabal kan nitz'etetej.
15Jebel ruwa-kiq'ij ri nikiya' aq'ij rik'in bix,
kan yebiyin k'a rik'in ri awutzil.
16Awoma rat yekikot chijun q'ij.
Kan nikinimirisaj k'a ri aq'ij roma rat kan at choj kik'in.
17Rat naya' kuchuq'a' y naben chike chi yekich'ek ri e etzelanel kichin.
18Kan ja rat Jehová ri at qatobal.
Ja rat loq'olej Dios ri at qa-rey.
19K'o k'a jun q'ij toq rat Jehová xach'on qik'in pa jun achi'el achik'.
Xabij k'a chiqe: Yin xinya' k'a ruchuq'a' jun nimalej achin richin oyowal.
Kan xinsuj yan k'a ri ajawaren chire ri nucha'on chi'ikojol rix.
20Ri achin ri' kan ja ri David ri nusamajel.
Ja yin xicha'on richin y xinqasaj aceite pa ruwi' richin xok rey.
21Kan jantape' k'a xkik'oje' rik'in.
Ri ruchuq'a' kan man jun bey k'a xtik'is, roma kan xtinya' ri nuq'a' pa ruwi'.
22Ri e etzelanel richin, kan man xketikir ta k'a chirij.
Kan man xtich'akatej ta k'a koma ri e banoy taq etzelal.
23Yin Jehová xa kan xkenwulaj k'a el chuwech rija' ri e etzelanel richin.
Kan xkenk'is-el konojel ri nich'upun kik'u'x chirij.
24Man jun bey k'a xtinmalij kan,
ri wajowabal pa ruwi' rija' man jun bey xtik'is.
Pa nubi' yin xtibe pa jotol ri ruchuq'a' rija'.
25Ri ruchuq'a' ri rajawaren rija' nitiker k'a el rik'in ri palou,
napon k'a rik'in ri raqen-ya' Éufrates.
26Rija' kan xtubij k'a chuwe chi yin in rutata', chi yin in ru-Dios, in rutobal y chuqa' in rukolonel.
27Yin kan xtinben chire chi xtok achi'el jun nabey ak'ual.
Kan ja rija' ri más nim pa kiwi' konojel ri rey richin chijun ri ruwach'ulew.
28Ri wutzil kan jantape' k'a xtik'oje' pa ruwi'.
Ri nujikibel-tzij kan jantape' k'a xtijike' rik'in rija'.
29Jantape' xtik'oje' jun rijatzul chupan ri rajawaren.
Y ri rajawaren kan xtinjikiba' pa ruq'a' tibe-q'ij tibe-seq.
30Jak'a wi ri rijatzul xa xtikimalij kan ri nupixa';
man xkebiyin ta chupan ri ruchojmilal ri ninya' yin;
31xa xtikixolq'otij ruwi' ri nubin chike;
y man xtikitaqej ta ri pixa';
32wi keri', yin Jehová kan xkenxik'ayuj roma ri kimak.
Kan xkenjich' k'a roma ri itzel taq kibanobal.
33Man rik'in ri' yin man xtinwelesaj ta ri wutzil pa ruwi' ri David.
Kan man xtinjel ta k'a ri nuch'abel ri nubin chire.
34Yin kan xtinben-wi ri nujikibel-tzij ri nubanon rik'in.
Kan xtinben ronojel ri nubin.
35Kan xinjikiba' k'a richin q'asen,
kan man xtinq'ol ta k'a ri David.
36Ri rijatzul kan xtiq'aton-tzij richin q'asen.
Ri rajawaren kan xtiyaloj k'a achi'el ri q'ij;
37kan achi'el ri ik' ri jantape' k'o;
keri' xtik'oje' rokik k'o ri kaj, xacha' rat Jehová.
38Jak'a rat Jehová xa xpe awoyowal chire ri rey ri acha'on.
Xawetzelaj k'a y xamalij kan.
39Xaq'ej k'a ruwi' ri jikibel-tzij ri abanon rik'in.
Kan xawelesaj ri retal ri rusamaj, y xaya' ruk'ix.
40Xawulaj k'a el ri tz'aq ri rusutin-rij ri rutinamit.
Ri tz'aq ri akuchi yek'oje-wi ri chajinela' kan xaben chi xek'is-el.
41Konojel ri winaqi' ri yeq'ax-el chiri' kan ye'eleq'-el chupan.
Ri winaqi' ri ek'o chunaqaj kan yetze'en k'a chirij.
42Kan xaya' k'a ri ch'akonik pa kiq'a' ri e etzelanel richin.
Xaya' k'a q'ij chi xekikot chirij ri David.
43Pa ruwi' ri' kan man xato' ta chik toq nibe pan oyowal.
Xaben chire chi xch'akatej.
44Kan xawelesaj k'a retal ri rusamaj,
ri ruk'ojlemal kan xaben chi xk'is.
45Xaben chire chi chi'anin xrijix y wakami xa kan xaya' ruk'ix.
Ri David nuk'utuj to'onik
46Nimalej Jehová, ¿kan jantape' kami xtawewaj-awi'?
¿Jantape' kami xtik'a'on ri awoyowal achi'el nuben ri q'aq'?
47Toqaqa chi'ak'u'x chi ri qak'aslen xa ti juba' ok,
xa k'o chi yojken.
48¿Achike ta k'a wineq ri nik'ase' y man nutz'et ta el ri kamik?
¿Achike ta k'a ri nikolotej chuwech ri jul muqbel kamineq?
49Ajaw, ¿akuchi k'a k'o-wi ri awajowabal ri man k'isel ta ri aya'on-pe pa qawi' ojer?
¿Akuchi k'o-wi ri jikibel-tzij ri xaben wik'in yin David?
50Tatz'eta' chi yin kan jantape' niya'ox nuk'ix.
Ronojel re ch'abel re' kan kiya'on q'axo'n pa wánima.
51Nimalej Jehová, ri e etzelanel awichin kan nikiqasaj nuq'ij yin ri in acha'on.
Xabakuchi k'a in beneq-wi, kan yetze'en chuwij.
52¡Kan nimalej k'a aq'ij rat Jehová, tibe-q'ij tibe-seq!
Kan keri' wi, ja' kan keri'.
Currently Selected:
Sal 89: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
