Sal 31
31
Kuqubabel-k'u'x rik'in ri Dios*f31*
1Awik'in k'a rat Jehová, nukuquban-nuk'u'x,
roma ri' man taya' q'ij richin nisach nuk'u'x.
Kinakolo' rik'in ri ruchojmilal ri naben rat.
2Tabana' utzil kinawak'axaj, y kinakolo' chi'anin.
Kinawewaj k'a chikiwech ri e etzelanel wichin
achi'el xa ta ninwewaj-wi' chirij jun nimalej abej.
Kan ja rat k'a ri at nutobal richin yikolotej.
3Kan awik'in k'a rat ninwewaj-wi-wi' y kan yikolotej.
Roma ri nimalej abi', tak'utu' k'a chinuwech ri akuchi utz yibe-wi, y kinayuqej.
4Kinakolo' chuwech ri pikbel ri kewan richin yitzaq chupan,
roma kan ja rat ri at nutobal.
5Pan aq'a' k'a rat ninjech-wi' richin yinachajij.
Kinakolo' k'a roma rat at jun Dios ri man yinamalij ta kan.
6Yin yenwetzelaj ri nikikuquba' kik'u'x kik'in ri wachibel ri xa man jun kejqalen.
Jak'a yin kan awik'in rat Jehová nukuquban-wi nuk'u'x.
7Xkikikot k'a y xkinimaq'ijun roma ri awajowabal rat Jehová,
roma kan xatz'et ri nuq'axo'n,
kan xatz'et k'a jebel ri wánima toq xk'oje' pa bis.
8Man xinajech ta k'a pa kiq'a' ri e etzelanel wichin,
xa kan xinakol y xaben chuwe chi jikil xik'oje'.
9Jehová, tabana' utzil tajoyowaj nuwech,
roma kan ink'o pa nimalej bis.
Man yitikir ta chik yitzu'un roma oq'ej;
ri wánima y ri nuch'akul kan maneq chik kuchuq'a' roma ri q'axo'n.
10Kan xirijix yan qa roma q'axo'n;
ri k'iy nujuna' nuben chuwe chi xaxe chik yijiq'ijo'x.
Ri wuchuq'a' kan xk'is yan k'a roma ri numak;
ri nubaqil kan maneq chik ruchuq'a' chuqa'.
11Kan in yakol k'a kitze'en ri e etzelanel wichin,
y ri wachk'uljay chuqa' kan yinkiyojobej;
ri etamayon nuwech nikixibij-ki' chinuwech,
y ri yetz'eton wichin ye'animej toq yinkitz'et.
12Kan ximestex yan k'a;
y kan xban chuwe chi kan in kamineq chik.
Yin kan in achi'el chik k'a jun qumbel paxineq ri xa man nik'atzin ta chik.
13Kan yentz'et k'a ri winaqi' yech'owiyaj pa taq kixikin y yexebexot chuwij.
Nikimol k'a ki' richin nikajo' yinkikamisaj.
14Jak'a yin kan nukuquban nuk'u'x awik'in rat Jehová,
roma kan ja rat at nu-Dios.
15Pan aq'a' k'a rat k'o-wi ri nuk'aslen.
Kinakolo' k'a chikiwech ri e etzelanel wichin,
y ri kan chaq in kitzeqeliben.
16Tabana' utzil kinatzu' rik'in joyowanik;
kinakolo' roma ri awajowabal.
17Jehová, tabana' chi man ta jun bey xkik'ixbitej,
roma kan nuk'utun wuchuq'a' chawe.
Tabana' chi ri itzel taq winaqi' yek'ixbitej;
Kan ta xkebe pa jul richin muqbel, y man jun ta chik xtikibij.
18Kan ketane' k'a qa ri e tz'ukuy taq tzij,
roma rije' yech'on rik'in janila nimirisanen,
y kan janila k'a itzel yech'on chirij ri choj ruk'aslen.
19Kan janila nim ri awutzil rat Jehová,
roma kan ye'ato' ri nikiya' aq'ij-ak'ojlen.
Re' kan xaben k'a kik'in ri nikito-ki' awik'in,
richin nikitz'et ri ch'aqa' chik winaqi'.
20Kan ye'achajij k'a chuwech ri kich'obonik ri e banoy etzelal.
Kan awik'in k'a rat nikito-ki' chire ri kiyoq'onik ri winaqi' ri'.
21Nimalej aq'ij-ak'ojlen rat Jehová,
roma rik'in awajowabal xaben meyel taq banobel toq xik'oje' pa latz',
xaben wik'in achi'el jun tinamit ri sutin-rij chi tz'aq.
22Toq yin xik'oje' pa latz', xinch'ob chi kan xinamestaj kan.
Jak'a toq xink'utuj to'onik chawe, kan xinawak'axaj k'a chi'anin.
23Ri nikitzeqelibej ri Jehová, ruk'amon chi nikiben ri nrajo' rija'.
Roma rija' kan yeruchajij k'a ri choj e beneq chuwech.
Jak'a ri man nuqasaj ta ri' chuwech, kan pa ruk'iyal k'a ri rutojbalil ri nuya' pa ruwi'.
24Kan tikitija' k'a kiq'ij ri kikuquban kik'u'x rik'in ri Jehová,
y kow kek'oje'.
Currently Selected:
Sal 31: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
