Sal 139
139
Ri Dios k'o xabakuchi y retaman ronojel*f121*
1Nimalej Jehová, rat kan in atz'eton jebel y awetaman nuwech.
2Rat kan natz'et k'a toq yitz'uye' y toq yiyakatej-q'anej.
Kan k'a nej k'a k'o-wi ri nuch'obonik, rat kan awetaman chik.
3Rat kan awetaman k'a ri nubinibal y toq yinuxlan.
Kan chijun k'a ri nubey chawech rat k'o-wi.
4Kan k'a man jani tel-pe ri ch'abel pa nuchi',
rat Jehová kan awetaman chik k'a ronojel ri ninbij.
5Rat kan asurin k'a wij richin yinachajij,
kan naya' k'a ri aq'a' pa nuwi'.
6Ronojel re etamabel re' kan meyel taq banobel chuwe yin.
Kan janila nim, kan man niq'ax ta k'a chinuwech.
7Jehová, ¿akuchi ta k'a xkibe-wi nej chire ri a-espíritu?
¿Akuchi ta k'a xtinwewaj-el-wi' chawech?
8Wi ta yijote-q'anej chikaj, chiri' atk'o-wi rat;
wi ta yibe-qa k'a chuxe' ri ruwach'ulew, chuqa' chiri' atk'o-wi.
9Stape' k'o ta nuxik' y yitikir ta yixik'an-el pa kaq'iq' richin yibe pa relebel-q'ij,
wi yibek'oje' ta juk'an chik chire ri palou chiri' pa qajbel-q'ij,
10stape' ta k'a chiri' ink'o-wi, rat kan yinayuqej,
ri awijkiq'a' kan man xkirisq'opej ta.
11Wi yin ninch'ob ta ninwewaj-wi' pa q'equ'm richin yirewaj;
o wi ri saqil nok ta q'equ'm,
12stape' keri', ri q'equ'm man yirewaj ta chawech rat,
chawech rat ri aq'a' xa kan achi'el ri paq'ij.
Ri q'equ'm y ri saqil xa kan e junan chawech rat.
13Ja rat xabanon chijun ri nuch'akul.
Rat xatz'ukun-q'anej wichin pa rupan ri nte'.
14Kan xtinnimirisaj k'a aq'ij, roma kan jun meyel banobel ri xaben wik'in.
Yin kan ninmey k'a y kuqul nuk'u'x chi ja rat xabanon wichin.
15Ri nuch'akul kan man ewatel ta chawech rat,
stape' kan pa q'equ'm xitz'ukutej-q'anej.
Kan jebel k'a xinanuk' pa rupan ri nte'.
16Nimalej Jehová, rat kan xinatz'et toq k'a man jani kinalex.
Ronojel k'a ri xtibebanatej chupan ri nuk'aslen,
kan xtz'ibatej yan chupan ri awuj,
Y ronojel re' rat awetaman chik.
17¡Nimalej Dios, ri ach'obonik kan janila k'a e k'ayew chinuwech yin,
Y kan man e ajlatel ta chuqa'!
18Roma kan janila k'iy, kan achi'el k'a ri rajlabal ri sanayi'.
Y wi ta yin ninchop rajlaxik xa nipe-qa nuwaran
y toq nuna' nuwech, rat kan k'a atk'o na wik'in.
19Nimalej Dios, tawelesaj k'a kik'aslen ri e banoy taq etzelal.
Kinajech'ej k'a yin chikiwech re winaqi' re',
20roma rije' xa kan yech'on itzel chawij,
y kan yeyakatej k'a richin nikiben itzel chawe.
21Yin kan yenwetzelaj k'a ri ye'etzelan awichin rat Jehová.
Chuqa' yenwixowaj ri nikiben itzel chawe rat.
22Kan yenwetzelaj k'a jumul;
kan nubanon k'a chike chi e etzelanel wichin.
23Nimalej Dios, tanik'oj k'a ri nuk'aslen y tatz'eta' ri wánima;
kinatejtobej y tatz'eta' ri nuch'obonik;
24tatz'eta' wi xa k'o k'a etzelal chupan ri nuk'aslen yin.
Kinak'uaj k'a chupan ri bey richin k'aslen ri nibe awik'in rat.
Currently Selected:
Sal 139: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
