Sal 140
140
Ch'owen rik'in ri Dios richin nito'ox ri David*f122*
1Nimalej Jehová, tabana' utzil kinakolo' chikiwech ri winaqi' e itzel.
Kinachajij chikiwech ri kamisanela'.
2Re winaqi' re', xa kan xaxe ri etzelal ri nikich'ob pa taq kánima.
Ronojel q'ij nikinojij achike chi etzelal nikiben.
3Ri kaq' kan achi'el k'a ri raq' ri kumetz.
Kan achi'el k'a ri ya' kamisanel richin ri kumetz, keri' rubanon ri pa kichi'.
4Nimalej Jehová, kinakolo' chikiwech ri winaqi' e itzel.
Kinajech'ej chikiwech ri kamisanela',
roma nikajo' nikiq'et chuwaqen.
5Ri kinimirisan-ki' e kewalon kan pikbel pa nubey yin.
Rije' kiya'on achi'el ya'l pa nubey.
Nikajo' k'a nikiq'et chuwaqen; roma ri' e kiya'on kan re pikbel re'.
6Jak'a yin kan nujachon-wi' pan aq'a' rat Jehová.
Tabana' utzil, tawak'axaj ri nuch'owen y tajoyowaj nuwech.
7Jehová, rat at nimalej nukolonel.
Rat kan yinachajij k'a chupan ri q'ij richin oyowal.
8Tabana' utzil man taya' chike ri winaqi' e itzel ri nikirayij rije'.
Man taben chike chi yebe pa jotol, richin chi man nikinimirisaj-ki'.
9Man taya' q'ij chi ri e etzelanel wichin yinkich'ek.
Tabana' chike chi ri ch'abel ri yekibila', chikij ta k'a rije' xtiqaqa-wi.
10Xtiqaqa ta k'a pa kiwi' rije' ri racheq-q'aq';
kan xkeya'ox ta k'a pa q'aq'.
Xkek'aq ta k'a chupan jul ri nej qajineq rupan ri akuchi man jun bey xketikir xke-el-pe.
11Ri winaqi' e tz'ukuy tzij kan man ta k'a xkejike' chuwech re ruwach'ulew.
Ri etzelal, jari' ta ri xtitzeqeliben kichin ri kamisanela'.
12Jak'a ri e poqonatajineq, yin wetaman chi rat Jehová kan ye'ato'.
Y ri yetz'ilox, naq'et tzij pa kiwi' rik'in ruchojmilal.
13Kan qitzij chi ri choj kik'aslen kan xtikiya' aq'ij.
Ri choj yebiyin chawech kan xkebek'oje' awik'in richin q'asen.
Currently Selected:
Sal 140: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
