Sal 119
119
Bix richin ri rupixa' ri Dios
1Jebel ruwa-kiq'ij ri kan e tz'aqet yebiyin chupan ri kik'aslen,
ri kan ja ri rupixa' ri Jehová ri kitzeqeliben.
2Jebel ruwa-kiq'ij ri kan nikitaqej ri ruk'utun kan ri Dios,
ri kan rik'in ronojel kánima nikikanoj.
3Kan man jun etzelal nikiben,
roma kan yebiyin chupan ri bey ri niqa' chuwech ri Dios.
4Jehová, rat kan aya'on k'a ri apixa',
kan xachilabej k'a chi kan titaqex rubanik achi'el ri nubij.
5Yin ninrayij k'a chi kan ta choj yibiyin chawech rat,
chi kan ta nintaqej ri pixa' ri aya'on chiqe.
6Wi keri' kan man xkik'ixbitej ta k'a
roma nintaqej ronojel ri apixa'.
7Rokik xtiq'ax chinuwech jebel ri jalajoj ruwech apixa',
kan xtinnimirisaj k'a aq'ij, roma kan man jun mak wejqalen.
8Yin kan xtinyek k'a pa wánima ronojel re'.
Roma ri' man jun bey kinamalij kan.
9¿Achi'el ta k'a toq nitikir jun ala' richin nuk'uaj jun k'aslen ch'ajch'oj?
¡Kan rik'in k'a chi nuyek pa ránima ri ach'abel rat!
10Yin kan rik'in k'a ronojel wánima atinkanon-pe.
Man taya' q'ij chi ninch'er kan wi' chire ri apixa'.
11Kan nuyakon k'a pa wánima ri ach'abel,
richin chi man yimakun ta chawech.
12Kan nimalej aq'ij rat Jehová:
Tabana' utzil tak'utu' chinuwech ri jalajoj ruwech apixa'.
13Yin kan rik'in k'a ri nuchi' nutzijon
ronojel ri pixa' ri abin kan rat.
14Janila yikikot roma ninnimaj ri apixa',
roma k'o más rejqalen chuwech jun beyomel.
15Jantape' k'a xkiququt pa ruwi' ri apixa':
Jantape' k'a xtinch'ob rij.
16Kan xkikikot k'a rik'in ri apixa';
y man jun bey xtinmestaj.
17Tabana' utzil tajoyowaj nuwech yin ri in asamajel,
richin yik'ase' y xtinnimaj k'a atzij.
18Tajaqa' k'a ri runaq'-nuwech jebel,
richin chi nintz'et ri utzilej taq ch'abel ri ek'o chupan ri apixa'.
19Yin xa in q'axel re wawe' chuwach'ulew.
Man naben chuwe richin man niq'ax ta chinuwech ri apixa'.
20Ri wánima janila niq'axon roma jantape' nurayij nretamaj ri apixa'.
21Rat Jehová kan ye'ach'olij k'a ri nikinimirisaj-ki'.
K'o k'a etzelanik pa kiwi' ri winaqi' ri xa xtikich'er kan ki' chire ri apixa'.
22Kinajech'ej k'a chuwech ri itzel taq kich'obonik ri winaqi' ri',
roma yin kan nutaqen-pe ri apixa' rat.
23Stape' kan achi'a' ri k'o kiq'ij ri yeyakatej chuwij.
Jak'a yin ri in asamajel kan ja ri apixa' ri jantape' ri ninquqa' rij.
24Yin kan jantape' yikikot rik'in ri ach'abel ri aya'on kan,
roma nubanon chire chi kan jari' ri nupixabanel.
25Yin kan ink'o chik chuwi' kamik.
Tabana' utzil taya' chik wuchuq'a', achi'el ri asujun.
26Kan ronojel k'a nuq'alajirisan chawech, y kan in awak'axan.
Tak'utu' k'a chinuwech ri apixa'.
27Tabana' chuwe chi niq'ax chinuwech ri apixa',
roma yin kan ninwajo' yich'obon pa ruwi' ri meyel taq abanobal.
28Yin kan maneq chik wuchuq'a' roma bis.
Roma ri' taya' jun k'ak'a' wuchuq'a' richin ninkoch', achi'el ri asujun chuwe.
29Kinajech'ej k'a chuwech ri tz'ukun-tzij;
taya' ri awutzil pa nuwi' richin jantape' ta xtintzeqelibej ri apixa'.
30Yin kan ja ri bey ri awichin rat ri xincha'.
Kan ja ri apixa' ri ninwajo' nintzeqelibej.
31Yin kan xuk'en k'a nuwech chirij ri apixa'.
Tabana' utzil Jehová man naya' q'ij chi yin yik'ixbitej.
32Kan rik'in ronojel wánima xkibiyin chupan ri bey ri nuk'ut ri apixa'.
roma kan in anojisan rik'in kikoten,
33Jehová kan tak'utu' k'a chinuwech ri ruchojmilal ri apixa',
y kan man xtinmestaj ta k'a chupan chijun ri nuk'aslen.
34Taya' nuna'oj richin kan xtinben ri nubij chupan ri apixa'.
Rik'in k'a ronojel wánima xtinben ri nubij.
35Kinayuqej chupan ri bey richin ri ruchojmilal,
roma kan rik'in ri' k'o-wi ri nukikoten.
36Tabana' chire ri wánima chi nrajo' ta nuben ri nubij ri apixa',
y man ta ja ri itzel taq ch'akoj ri xtinrayij ruwech.
37Man taya' q'ij chi xkentzu' ri xa man jun kejqalen;
taya' nuk'aslen richin kan xtintzeqelibej ri abey.
38Tabana' ri asujun chuwe yin ri in asamajel,
achi'el asujun chike ri yatkitzeqelibej rik'in ronojel kánima.
39Kinajech'ej chuwech ri joyobenik kichin ri e etzelanel wichin,
roma ri ruchojmilal ri naya' rat kan jebel-wi.
40Yin kan jantape' k'a nurayiben-pe nintaqej ri apixa'.
Tabana' utzil taya' nuk'aslen, roma rat kan at choj-wi.
41Jehová tabana' utzil taya' ri ajoyowanik pa nuwi';
kinakolo' achi'el ri asujun chuwe.
42Keri' yin kan xkitikir xtink'uluba' ri ruch'abel ri wineq ri nrajo' nuya' nuk'ix,
roma kan nukuquban nuk'u'x awik'in.
43Kinato' richin jantape' xtinbij ri qitzij,
roma kan nukuquban nuk'u'x rik'in ri apixa'.
44Yin kan jantape' xtintaqej ri apixa' rat, tibe-q'ij tibe-seq.
45Wi keri' xtinben, yin kan xkibiyin k'a rik'in ch'uch'ujil,
roma kan nintaqej ri ruchojmilal ri aya'on rat.
46Kan xkich'on k'a pa ruwi' ri ach'abel chikiwech ri e rey,
y man xkik'ix ta k'a xtintzijoj.
47Keri' jantape' xkikikot rik'in ri apixa'
roma kan wajowan-pe jantape'.
48Janila ninwajo' ri pixa', y kan ninya' rejqalen;
jantape' k'a xkiququt pa ruwi' ri apixa'.
49Man namestaj ri asujun chuwe chupan ri ach'abel,
ri kan rubanon chuwe chi nukuquban nuk'u'x rik'in.
50Ri nikuquban nuk'u'x chupan ri tijoj-poqonal,
xaxe ri wetaman chi ri ach'abel nubij chi rat kan naya' nuk'aslen.
51Stape' ri winaqi' ri kinimirisan-ki', janila yinkiyojobej,
man rik'in ri' yin man nuch'aron ta kan wi' chire ri apixa'.
52Xoqaqa k'a chinuk'u'x ri pixa' ri xe'aya' ojer,
y yin kan rik'in k'a ri' nukuquban-wi nuk'u'x.
53Yin kan niyakatej k'a woyowal chikij ri e banoy taq etzelal,
chikij ri xa nikimalij kan ri apixa'.
54Jehová, ri apixa' rat kan jari' k'a nok nubix yin, xabakuchi yik'oje-wi.
55Ri pa taq tokoq'a' kan noqaqa k'a chinuk'u'x ri abi'.
Ri pixa' ri aya'on kan, ninwajo' k'a nintaqej.
56Kan jare' ri ruk'amon chuwe yin richin ninben:
roma kan jantape' xinnimaj atzij.
57Jehová kan ja rat ri' ri ronojel ri wichin yin;
kan nubin chi kan jantape' xtinnimaj ri ach'abel.
58Yin jantape' at nutzeqeliben rik'in ronojel wánima.
Roma ri' tabana' utzil tajoyowaj nuwech achi'el nubij ri ach'abel.
59Yin kan xinquqa' k'a rij ri bey ri in beneq-wi;
kan xitzolin k'a richin ninnimaj atzij.
60Yin kan ninwajo' k'a ninnimaj atzij,
y man ninwoyobej ta na richin ninben.
61Kan pa taq tzobaj winaqi' ri e banoy taq etzelal ri kisutin-wij.
Jak'a yin kan man numalin ta kan ri apixa'.
62Pa taq nik'aj-aq'a' yiyakatej richin ninya' aq'ij,
roma ri ruchojmilal ri naben.
63Yin kan in kachibil konojel ri yatkitzeqelibej rat Jehová,
konojel ri nikitaqej ri apixa'.
64Ri ruwach'ulew kan nojineq k'a chire ri awutzil rat Jehová.
Tabana' utzil kan tak'utu' k'a chinuwech ri apixa'.
65Jehová rat kan janila k'a utzil abanon chuwe yin ri in asamajel;
kan abanon k'a wik'in achi'el ri asujun.
66Kan tak'utu' k'a chinuwech ri utzilej taq ch'obonik y ri na'oj,
roma yin kan nukuquban nuk'u'x rik'in ri apixa'.
67Nabey chuwech richin xaya' tijoj-poqonal pa nuwi',
yin xa man nutzeqeliben ta ri abey,
jak'a re wakami kan nutaqen k'a ri apixa'.
68Rat kan janila at utz y at banoy utzil.
Kan tak'utu' k'a chinuwech ri pixa'.
69Ri e nima'q nikina-ki' kan janila tz'ukun-tzij kibanon chuwij,
jak'a yin kan rik'in ronojel wánima nubanon ri nubij ri pixa'.
70Rije' kan man nikina' ta toq yemakun,
jak'a yin kan yikikot toq ninben ri nubij ri apixa'.
71Janila utz xuben chuwe toq rat xinaya' pa tijoj-poqonal,
richin yin ninwetamaj ri apixa'.
72Kan más k'a jebel ri pixa', ri kan ja rat at biyon,
ke chuwech pa ruk'iyal q'anapueq y saqipueq.
73Ja rat Jehová xanuk'u wichin richin xinaben.
Tabana' k'a chuwe richin ta niq'ax chinuwech y xtinwetamaj ri apixa'.
74Ri nikiya' aq'ij xkekikot toq xkinkitz'et,
roma yin kan nukuquban nuk'u'x rik'in ri ach'abel.
75Jehová, yin wetaman chi ri chojmilal ri naben rat kan pa rubeyal-wi,
chi toq yinaya' pa tijoj-poqonal, xa kan roma ri awajowabal pa nuwi'.
76Ri ajoyowanik kan ta k'a xtukuquba' nuk'u'x,
kan ta k'a achi'el ri asujun chuwe yin ri in asamajel.
77Tabana' utzil taya' ri ajoyowanik pa nuwi' richin chi kan xkik'ase'.
Yin kan ja ri apixa' ri nukikoten.
78Ri winaqi' ri kinimirisan-ki' kan ta k'a xkek'ixbitej,
roma rije' xa kan man jun achike ta roma kitz'ukun-tzij chuwij.
Jak'a yin kan xaxe ri apixa' ri xtinquqa' rij.
79Tikimolo' k'a pe ki' wik'in yin, ri winaqi' ri nikiya' aq'ij,
ri winaqi' ri kan ketaman ri apixa' y nikitaqej.
80Yin kan in tz'aqet ta k'a chupan ri apixa' ri aya'on rat,
richin keri' kan man jun bey ta k'a xkik'ixbitej.
81Ri wánima kan nilawalo' yan qa chi royobexik ri kolotajik ri naya' rat Jehová.
Kan jantape' k'a xtinkuquba' nuk'u'x rik'in ri ach'abel.
82Ri runaq' taq nuwech xa kan xk'is-qa kuchuq'a' richin koyoben ri asujun.
Yin kan nink'utuj k'a qa chi janipe' yape richin nakuquba' nuk'u'x.
83Stape' yin xa man jun chik yik'atzin-wi,
xa in achi'el chik jun tz'um ri xaq-xaq chik rubanon roma yakel kan;
jak'a xa kan man numestan ta ri apixa'.
84¿K'a janipe' k'a richin ninwoyobej?
¿K'a janipe' k'a xtaq'et-tzij pa kiwi' ri e tzeqelibeyon wichin?
85Ri winaqi' ri xa kimalin kan ri apixa',
kan kiyolon k'a pikbel pa nubey richin ta yitzaq.
86Ri apixa' rat kan ja wi ri' ri qitzij.
Tabana' utzil Jehová kinato', roma xa man jun achike ta roma in kitzeqeliben,
87Rije' xa kan chaq juba' man yinkikamisaj,
jak'a yin kan man numalin ta kan ri apixa'.
88Rik'in ri awutzil taya' ruchuq'a' ri nuk'aslen.
Keri' kan xtintaqej k'a ronojel ri abin rat.
89Nimalej Jehová, ri ach'abel kan richin q'asen.
Kan richin jantape' ajikiban chila' chikaj.
90Rat kan naben-wi ri asujun pa kiwi' ri chi sol chi sol winaqi'.
Ja rat xajikiban richin ri ruwach'ulew y kan jari' k'o wakami.
91Xaxe rik'in ri ach'abel xebanatej ronojel ri ek'o wakami,
ronojel re' yatkisamajij.
92Xa ta man ta ri apixa' rat ri xok nukikoten,
yin xa kan xiken yan ta chupan ri nutijoj-poqonal.
93Kan man jun bey k'a xtinmestaj kan ri apixa',
roma kan rik'in ri' aya'on nuk'aslen.
94Tabana' utzil kinakolo', roma yin kan in awichin rat.
Yin kan jantape' k'a nutaqen-pe ri apixa'.
95Ri itzel taq winaqi' kan koyoben k'a richin yinkik'is,
jak'a yin kan jantape' xkich'obon pa ruwi' ri abin rat.
96Ronojel k'a ri kan jebel kibanik xa kan e k'isel.
Jak'a ri apixa' rat, ri' kan man jun bey xtik'is.
97Yin kan janila ninwajo' ri apixa',
kan jari' ri ninquqa' rij chijun q'ij.
98Rik'in ri apixa', abanon chuwe chi kan más in aj-na'oj, chikiwech ri e etzelanel wichin,
roma re pixa' re' kan jantape' k'o wik'in.
99Yin kan más k'a q'axineq chinuwech, ke chikiwech ri yetijon wichin.
Re' kan roma k'a jantape' ninch'ob rij.
100Kan más k'a q'axineq chinuwech, ke chikiwech ri rijita'q taq achi'a'.
Re' roma kan nutaqen-pe ri apixa'.
101Kan xinchajij k'a wi' chuwech ronojel itzelej taq bey,
richin chi xintaqej ri ach'abel.
102Man xinch'er ta wi' chire ri ruchojmilal,
roma kan ja rat xatijon wichin.
103Ri ach'abel rat Jehová, kan janila kikoten nuya' chuwe.
Kan más k'a ruki'il chuwech ri kab ri nikiya' taq chikopi'.
104Rik'in ri apixa' wilon nojibel,
roma ri' kan ninwetzelaj ronojel ri man e qitzij ta.
105Ri ach'abel rat Jehová kan achi'el jun q'aq' ri nusaqirisaj ri nubey;
kan jun saqil akuchi yibiyin-wi.
106Xinya' nutzij y xinjikiba',
chi kan jantape' xtintaqej ri apixa' ri kan choj-wi.
107Yin kan janila in k'ayewatajineq.
Tabana' utzil Jehová taya' wuchuq'a', achi'el ri abin chuwe.
108Tabana' utzil, xtak'awomaj ta k'a toq ninya' aq'ij rik'in bix,
y tak'utu' chinuwech ri apixa'.
109Ri nuk'aslen kan jantape' k'a k'o chuwi' ruk'ayewal,
jak'a yin kan man xkimestan ta chire ri tijonik ri aya'on chuwe.
110Ri itzel taq winaqi' nikiyala' k'a pikbel pa nubey,
jak'a yin kan man numalin ta kan ri apixa'.
111Yin kan nubanon chire ri apixa' chi jari' ri wichinan kan richin q'asen,
roma kan nuya' kikoten pa wánima.
112Kan rik'in k'a ronojel wánima xinbij chi kan nintaqej ri apixa'.
Keri' xtinben chijun ri nuk'aslen.
113Ri winaqi' ri ka'i' kipalej, yin kan yenwetzelaj,
jak'a ri apixa', ri' kan jantape' ninwajo'.
114Awik'in k'a rat ninwewaj-wi-wi' y rat kan yinato'.
Kan nukuquban k'a nuk'u'x rik'in ri ach'abel.
115Rix winaqi' ri ix banoy taq etzelal, kan tich'ara-el-iwi',
roma yin kan nintaqej na ri rupixa' ri nu-Dios.
116Tabana' utzil Jehová taya' wuchuq'a' achi'el ri asujun chuwe, richin xkik'ase'.
Man taya' q'ij chi ri oyobenri'il xa choj keri' nik'o-el.
117Tachapa' ri nuk'aslen richin yikolotej.
Keri' jantape' xtinnimaj atzij.
118Rat kan ye'awixowaj konojel ri nikich'er kan ki' chire ri apixa',
roma ri kich'obonik xa man jun rejqalen.
119Konojel ri e banoy etzelal, rat kan xke'ak'eq-el achi'el nik'aq-el ri q'ayis,
roma ri', yin ja ri apixa' ri nutaqen-pe.
120Yin kan ninxibij k'a wi' chawech rat Jehová.
Ri apixa' kan k'o rejqalen chinuwech yin.
121Ronojel nubanon pa ruchojmilal.
Roma ri' man kinamalij kan pa kiq'a' ri yetz'ilo wichin.
122Tabana' utzil Jehová chi kan ta xkak'oje' pa nuwi' richin utz yik'ase'.
Man taya' q'ij chi ri kinimirisan-ki' yinkitz'ila' yin.
123Ri runaq' taq nuwech xa kan xk'is-qa kuchuq'a' richin koyoben ri asujun.
Kan woyoben k'a chi yitotej achi'el ri asujun chuwe.
124Taya' k'a ri ajoyowanik pa nuwi' yin ri in asamajel.
Kan tak'utu' chinuwech ri apixa'.
125Yin kan in asamajel rat, tabana' utzil kan taya' k'a nuna'oj,
richin ninwetamaj jebel ri apixa'.
126Jehová, kan ruq'ijul chik richin naya' rutojbalil-mak,
roma ri winaqi' xa kan xkiq'ej ruwi' ri apixa'.
127Yin kan jantape' wajowan-pe ri apixa';
kan más k'a wajowan chuwech ri q'anapueq ri kan jebel ch'ajch'ojirisan.
128Roma ri' kan ja ri apixa' ri nutzeqeliben pa ruwi' ronojel;
kan ninwetzelaj k'a ronojel ri man qitzij ta.
129Ri ach'abel ri aya'on kan rat Jehová kan e jebel-wi,
roma ri' kan ninben ri nubij.
130Ri rusolik rij ri ach'abel kan nisaqirisan.
Kan nusaqirisaj k'a kiwech ri maneq kinojibal.
131Kan ninrayij k'a chi ninwak'axaj ri ach'abel.
Ri apixa' kan jantape' niqa' chinuwech.
132Kinatzu' k'a pe y tajoyowaj nuwech.
Achi'el naben kik'in ri ye'ajowan awichin.
133Tabana' chuwe chi xkibiyin ta achi'el nubij ri ach'abel,
y man taya' q'ij chi ri etzelal nich'akon chuwij.
134Kinakolo' chikiwech ri e etzelanel wichin,
richin nintaqej ri apixa'.
135Tabana' utzil tajoyowaj nuwech yin ri in asamajel.
Kan tak'utu' chinuwech ri apixa'.
136Yin kan yinoq' k'a roma q'axo'n,
roma yentz'et ri winaqi' chi man nikitaqej ta ri apixa'.
137Jehová, rat kan at choj-wi.
Ri aq'atoj-tzij kan ja wi ri' ri ruchojmilal.
138Ri ach'abel ri achilaben kan,
kan e choj-wi y kan yebanatej ri nubij.
139Ri woyowal kan yiruk'is yan qa,
roma ri e etzelanel wichin, xa man nikiben ta achi'el nubij ri apixa'.
140Ri ach'abel kan janila chi tejtobenik ruq'axan,
roma ri' yin ri in asamajel kan janila ninwajo'.
141Yin xa in ko'ol ok y banon chuwe chi maneq wejqalen,
man rik'in ri', man numestan ta kan ri apixa'.
142Ri ruchojmilal ri naben rat kan ja wi ri' richin q'asen;
ri apixa' kan ja wi ri' ri qitzij.
143Yin kan k'o k'a tijoj-poqonal y q'axo'n pa nuk'aslen,
jak'a ri apixa' kan nukuquba' nuk'u'x y yikikot.
144Ri ach'abel rat kan jantape' choj.
Tabana' utzil taya' nuna'oj richin yik'ase' rik'in.
145Jehová, yin kan yich'on awik'in rik'in ronojel wánima.
Tak'uluba' k'a pe ri nuch'abel richin kan xkitikir xtintaqej ri apixa'.
146Awik'in k'a rat nink'utuj to'onik richin kinakolo'.
Y kan xtinben k'a ri nubij ri apixa'.
147Kan k'a man jani niseqer toq nink'utuj to'onik chawe.
Kan nukuquban k'a nuk'u'x rik'in ronojel ri asujun chuwe.
148Chijun k'a aq'a' yik'ase' ninch'ob rij ri apixa'.
149Jehová tawak'axaj k'a ri nuch'abel roma ri ajoyowanik pa nuwi';
taya' nuk'aslen achi'el ri ruchojmilal ri naben rat.
150Ri yetz'ilo wichin, naqaj chik ek'o-wi,
jak'a xa kan nej ek'o-wi chire ri apixa'.
151Jak'a rat Jehová kan naqaj atk'o-wi chuwe yin;
ronojel ri apixa' kan ja wi ri' ri qitzij.
152Kan ojer yan k'a ri' wetaman-pe ri apixa',
ri pixa' ri aya'on kan rat, kan richin jantape'.
153Jehová tatzu' ri nutijoj-poqonal y kinajech'ej chuwech,
roma yin kan man in mestawineq ta chire ri apixa'.
154Taq'alajirisaj ri nubanobal y kinakolo'.
Taya' ruchuq'a' ri nuk'aslen rik'in ri ach'abel.
155Ri akolotajik rat kan nej k'a k'o chike ri e banoy etzelal,
roma kan man nikitaqej ta ri apixa'.
156Jehová, ri ajoyowanik rat pa nuwi' kan janila nim.
Tabana' k'a chuwe chi yik'ase' achi'el nubij ri ruchojmilal.
157Kan janila k'a e k'iy ri e etzelanel wichin ri in kitzeqeliben.
Jak'a yin kan man nuch'aron ta kan wi' chire ri apixa'.
158Yentz'et k'a ri winaqi' ri xa at kimalin kan rat,
y kan man yeqa' ta chinuwech,
roma rije' xa man nikitaqej ta ri ach'abel.
159Jehová, tatz'eta' chi yin kan ninwajo' ri apixa'.
Roma ri awajowabal pa nuwi', tabana' utzil taya' ri nuk'aslen.
160Ronojel ri ach'abel kan e qitzij;
ri ruchojmilal ri q'atoj-tzij kan richin k'a q'asen.
161Ek'o achi'a' ri k'o kiq'ij ri in kiq'eleben y man jun achike ta roma.
Jak'a yin kan ninya' rejqalen ri ach'abel.
162Kan jantape' yikikot rik'in ri ach'abel;
kan más k'a yikikot chuwech ri wineq ri k'o k'iy beyomel nril-pe pa jun oyowal.
163Yin kan man niqa' ta k'a chinuwech y kan ninwetzelaj ri tz'ukuj-tzij.
Jak'a ri apixa', ri' kan jari' ri ninwajo'.
164Kan jantape' ninya' aq'ij chupan ri jun q'ij;
keri' ninben roma ri aq'atoj-tzij rat kan pa ruchojmilal.
165Ri nikitaqej ri apixa' kan janila uxlanibel-k'u'x k'o kik'in.
Y kan man jun xtitzaqon kichin.
166Jehová, yin kan woyoben k'a richin yinakol.
Kan jantape' nubanon-pe ri nubij ri apixa'.
167Yin jantape' ninnimaj ri apixa',
roma janila ninwajo'.
168Yin kan ninnimaj ri apixa' y ronojel ri abin kan rat,
roma ronojel ri nubey kan atzuliben.
169Jehová, ri nujiloj kan ta k'a xtapon chawech rat.
Taya' k'a nuna'oj achi'el ri asujun chuwe.
170Ri nuch'owen kan ta xtapon chawech;
kinato' k'a achi'el ri abin chuwe.
171Ri nuchi' kan jantape' k'a xtuya' aq'ij
toq rat xtak'ut chinuwech ri apixa'.
172Yin kan ta xaxe bix awichin rat ri xtinbixaj,
roma ri apixa' kan ja wi ri' ri ruchojmilal.
173Rat kan jantape' ta k'a xkinato',
roma yin kan ja ri apixa' ri nutaqen.
174Jehová, kan jantape' k'a ninrayij richin yinato';
ri apixa' kan jari' ri ruki'il ri nuk'aslen.
175Kan xkik'ase' ta k'a richin ninya' aq'ij.
Ri ruchojmilal ri naben rat ja ta ri' ri xtito'on wichin.
176Yin kan xibiyin k'a achi'el jun karne'l ri sachineq.
Jak'a rat Jehová kan kinakanoj yin ri in samajel,
roma kan man numestan ta ri apixa'.
Currently Selected:
Sal 119: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
