Sal 118
118
Bix richin matioxinik chire ri Dios
1Tinimirisaj ruq'ij ri Jehová, roma rija' kan janila utz,
roma ri rujoyowanik rija' kan richin jantape'.
2Konojel k'a qawinaq israelita tikibij k'a
ri rujoyowanik ri Jehová kan richin jantape'.
3Chuqa' rix sacerdote tibij k'a,
ri rujoyowanik ri Jehová kan richin jantape'.
4Konojel ri k'o rukiy ri Jehová chikiwech, tiqabij k'a
ri rujoyowanik ri Jehová kan richin jantape'.
5Kan chupan k'a ri nuq'axo'n xinnataj rubi' ri Jehová,
y rija' kan xirak'axaj k'a, y xirukol.
6Rija' kan k'o wik'in yin,
roma ri' man xtinxibij ta wi', chire ri itzel ri xtuben ri wineq chuwe.
7Ri Jehová kan k'o wik'in yin, ja rija' ri nito'on wichin.
Yin kan xkentz'et k'a ri e etzelanel wichin toq xketzaq.
8Más utz niqakuquba' qak'u'x rik'in ri Jehová,
ke chuwech niqakuquba' qak'u'x rik'in jun wineq.
9Más utz niqakuquba' qak'u'x rik'in ri Jehová,
ke chuwech niqakuquba' qak'u'x kik'in ri e tata'al.
10Konojel k'a ri winaqi' ri man nikitzeqelibej ta ri Dios xkisutij-wij,
jak'a yin kan rik'in ri ruchuq'a' ri Jehová xkich'akon chikij.
11Xkisutij k'a wij,
jak'a yin kan rik'in ri ruchuq'a' ri Jehová xkich'akon chikij.
12Kan achi'el k'a nikiben ri xuruy xkiben chuwij,
jak'a chi'anin xek'is achi'el nuben ri k'ix pa q'aq',
roma kan rik'in ri ruchuq'a' ri Jehová xkich'akon chikij.
13Xkitej k'a kiq'ij chuwij richin ta yin xitzaq pa kiq'a',
jak'a ri Jehová kan xiruto'.
14Yin ninbixaj rubi' ri Jehová, roma nuya' wuchuq'a'.
Ja rija' ri xkolon wichin.
15Ri pa taq kachoch ri choj kik'aslen nak'axatej ch'abel richin kikoten y kolotajik.
Y rije' nikibij: Ri Jehová kan nuben k'a meyel taq banobel.
16Kan nimalej k'a ruchuq'a' ri Jehová.
rija' kan nuya' k'a uchuq'a' richin ch'akonik, yecha'.
17Roma ri' yin man xiken ta chupan ri oyowal ri'.
Jak'a xa xkik'ase' na, richin chi nintzijoj ri rubanon ri Jehová wik'in.
18Rija' kan xuben k'a chuwe richin xintej janila poqon,
jak'a kan man xuya' ta q'ij richin xinapon pa kamik.
19¡Tijaqa' k'a chinuwech ri ruchi' ri rachoch ri Jehová,
richin xkinok k'a apo y xtinbenya' ruq'ij!
20Kan jare' ri ruchi' ri rachoch ri Jehová,
chupan re' xke'ok ri choj kik'aslen.
21Jehová, yin kan xtinya' aq'ij roma kan xawak'axaj ri nuch'abel.
Kan ja rat ri at nukolonel.
22K'o k'a jun abej ri man xqa' ta chikiwech ri banoy taq jay.
Jak'a re wakami ri abej ri' kan más k'atzinel chire ri jay richin chi kow xpa'e' kan.
23Ronojel re' kan ja ri Jehová xbanon,
y chiqawech roj kan jun k'a meyel banobel.
24Ja q'ij re' ri xuben ri Jehová.
Y roma ri' kan xqojnimaq'ijun k'a rik'in kikoten rik'in rija'.
25Nimalej Jehová, nink'utuj utzil chawe chi qojakolo' re wakami,
xtaben ta chiqe chi ronojel utz ta xtel chiqawech.
26Nimalej k'a ruq'ij ri rey ri peteneq pa rubi' ri Jehová.
Y chuqa' kan k'a pa rachoch ri Jehová niqoyoj ri urtisanik pan iwi' rix qawinaq.
27Ri Jehová kan jari' ri Dios, kan ruya'on k'a ri saqil pa qawi'.
Roma ri' rix tik'ama-pe ruq'a' taq che' richin nitikeriba-q'anej ri nimaq'ij,
y kixanpe k'a rik'in ri porobel.
28Jehová, kan ja rat ri at nu-Dios, y kan xtinya' k'a aq'ij.
Nu-Dios yin, kan xtinnimirisaj k'a ri aq'ij.
29Kan tiqaya' k'a ruq'ij ri Jehová, roma rija' kan janila utz.
Roma ri rujoyowanik rija' kan richin jantape'.
Currently Selected:
Sal 118: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
