Sal 103
103
Bix roma ri urtisanik ri nuya' ri Dios*f98*
1Yin kan jantape' xtinnimirisaj ruq'ij ri Jehová.
Kan rik'in k'a chijun nuk'aslen xtinimirisaj ri loq'olej rubi' ri Dios.
2Yin kan jantape' xtinnimirisaj ruq'ij ri Jehová.
Kan man xtinmestaj ta k'a ri rutzil ri ruya'on pa nuwi'.
3Ja rija' ri nikuyun ronojel ri qamak.
Ja rija' ri nik'achojirisan ronojel ri qaq'axo'n.
4Ja rija' ri nikolon qichin chuwech ri kamik.
Ri rutzil y ri rujoyowanik ri nuya' chiqe kan achi'el k'a jun corona nuben pa qajolon.
5Ja rija' niya'on chiqe ronojel ri utz, richin nuben k'ak'a' chiqe,
y nik'oje' k'ak'a' quchuq'a', achi'el ri kot.
6Ri Jehová kan nuq'et k'a tzij pa ruchojmilal.
Kan yeruto' ri yetz'ilox.
7Ri ojer kan xuk'ut k'a ri rubey chuwech ri Moisés.
Ri nima'q rubanobal xuk'ut chikiwech ri ánima qati't-qamama'.
8Ri Jehová kan joyowanel y koch'onel-wi.
Kan man chi'anin ta nipe royowal,
y kan janila nim ri rujoyowanik.
9Rija' man jantape' ta yojruch'olij;
ri royowal man nibe ta ruwech.
10Rija' man ruya'on ta k'a chiqe roj ri ruk'ayewal ri ruk'amon chi nuya'.
Ni man ruya'on ta k'a pa qawi' ri rutojbalil ri qamak.
11Ri rajowabal rija' kan janila nim pa qawi' roj ri niqaqasaj-qi' chuwech.
Ri kaj y ri ruwach'ulew man yetikir ta nikitemej ri nimalej rajowabal rija'.
12Ri qamak kan nej k'a xrelesaj-el chiqe roj.
Kan achi'el k'a ri nej rukojol ri relebel-q'ij rik'in ri qajbel-q'ij.
13Ri Jehová kan nujoyowaj k'a qawech roj ri niqaya' rejqalen rija'.
Kan achi'el k'a jun tata'aj ri nujoyowaj kiwech ri ralk'ual.
14Keri' nuben roma rija' retaman chik ri qabanikil roj.
Rija' retaman chi roj xa maneq quchuq'a' y xa rik'in poqolaj oj banon-wi.
15Ri ruk'aslen ri wineq xa achi'el ok ri q'ayis;
nisijan achi'el nisijan ri kotz'i'j,
16y toq niq'ax ri kaq'iq' pa ruwi', xa nik'is-qa.
Ri akuchi xtike-wi xa kan man jun chik xtitz'eton.
17Jak'a ri rujoyowanik ri Jehová, pa kiwi' ri k'o rukiy chikiwech, kan richin tibe-q'ij tibe-seq.
Y ri ruchojmilal ri nuben kan niyaloj richin jantape'.
18Ronojel re' nuben pa kiwi' ri nikitaqej ri rujikibel-tzij,
y pa kiwi' ri jantape' k'o chikik'u'x ri rupixa' ri Dios.
19Ri Jehová kan k'a chila' chikaj k'o-wi ri rutz'uyubal richin niq'aton-tzij.
Rija' kan nuq'et k'a tzij pa ruwi' ronojel.
20Tinimirisaj k'a ruq'ij ri Jehová, rix ri ix samajela' aj-chikajil;
rix ri kan rik'in uchuq'a' niben ri nubij chiwe, richin ninimaj ri rutzij.
21Tinimirisaj ruq'ij ri Jehová, chi'iwonojel ri ixk'o chila' rik'in;
chi'iwonojel ri ix nima'q taq rusamajela' rija'.
22Chijun ri rusamaj ri Jehová, kan tikiya' ruq'ij-ruk'ojlen rija',
xabakuchi chire ri rajawaren.
Yin kan jantape' xtinnimirisaj ruq'ij ri Jehová.
Currently Selected:
Sal 103: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
