Sal 102
102
Ruch'owen rik'in ri Dios jun ri poqonatajineq*f97*
1Nimalej Jehová tabana' utzil tawak'axaj ri nuch'owen.
Toq yin yisik'in-q'anej awik'in kan ta xtawak'axaj.
2Man tawewaj-awi' chinuwech toq yin ink'o pa q'axo'n.
Tabana' utzil taya' axikin chire ri nuch'abel.
Kan ta chi'anin xtak'uluba-pe ri nuch'abel toq yin yich'on awik'in.
3Ri q'ij richin ri nuk'aslen xa kan chi'anin k'a beneq achi'el nuben ri sib.
Ri nubaqil kan achi'el k'a ri rutza'n si' ri k'atineq chik.
4Yin kan ninna' chi xinkibech kan chi'aqen,
achi'el niban rik'in ri q'ayis toq xchaqi'j yan qa.
Roma ri nuq'axo'n kan man jun nuwayjal k'o,
5roma ri' kan janila yijilo.
Xa kan in baq in baq chik.
6Yin xa kan in achi'el chik jun túkur ri ruyon k'o pa tz'iran ruwach'ulew.
In achi'el jun túkur ri xa ruyon nik'oje' pa taq jay ri xa e tolan chik kan.
7Xa kan maneq k'a nuwaran.
In achi'el k'a jun aj-xik' chikop ri ruyon nik'oje' pa ruwi' jay.
8Q'ij-q'ij k'a yinkik'ixbisaj ri e etzelanel wichin.
Y ja ri nubi' yin nikikusaj richin etzelanik.
9Ronojel ri nintej, xa nuxol-ri' rik'in chaj.
Y ronojel ri ninqum, xa kan nuxol k'a ri' rik'in ri ruya'al runaq'-nuwech.
10Ronojel re' nink'owisaj roma ri awoyowal ri yakatajineq chuwij.
Rat xinachop richin xinak'eq pan ulew.
11Ri q'ij richin nuk'aslen xa kan achi'el k'a ri muj ri xa niq'ax.
Xa kan beneq k'a nuchaqirinen, achi'el jun q'ayis.
12Jak'a rat Jehová kan jantape' k'a atk'o tibe-q'ij tibe-seq.
Ri utzilej atzijol kan jantape' k'a xtinatex koma ri chi wiq chi tanaj winaqi'.
13Ri q'ij richin najoyowaj chik ruwech ri Sión kan xapon k'a.
Y kan xtz'aqet yan k'a ri q'ij ri abin-pe.
Roma ri' kan xkayakatej k'a pe y xtajoyowaj chik ruwech.
14Roma ri asamajela' kan janila nikajo' ri atinamit,
stape' wulatejineq kan.
15Toq xtikiben keri', ri winaqi' ri man yatkitzeqelibej ta xtikiqasaj-ki' chawech.
Konojel k'a ri rey kan xtikiya' aq'ij.
16Roma rat kan xtapaba' chik q'anej ri tinamit Sión.
Kan k'a chiri' k'a xtiq'alajin-wi-pe ri ak'ojlemal.
17Xtawak'axaj ri ruch'owen ri asamajel.
Kan xtawak'axaj k'a ri kich'abel ri kan man jun nito'on kichin.
18Ronojel re' k'o chi xtitz'ibatej kan,
richin tiketamaj konojel ri sol winaqi' ri e peteneq;
richin chi ri winaqi' ri xkebe'alex kan xtikibixaj k'a chuqa' ri abi' rat Jehová.
19Roma kan k'a chila' chikaj ri akuchi atk'o-wi xatzu'un-pe.
Rat Jehová kan k'a chikaj k'a xatzu-pe ri ruwach'ulew.
20Roma ri' kan xtawak'axaj k'a ri kijiloj ri ek'o pa ximonri'il.
Xa xke'awisq'opej k'a el ri ye'apon yan pa kamik,
21richin chi tikitaluj rubixik ri abi' rat Jehová chupan ri tinamit Sión.
Xtikiya' aq'ij rat chiri' pa Jerusalem,
22toq xtikimol-ki' konojel ri tinamit y konojel ri ajawaren richin yatkisamajij.
23Jehová, rat kan xawelesaj k'a wuchuq'a' toq k'a in ala' na.
Xaben k'a chi xa ti juba' ok ri nuk'aslen.
24Roma ri' xinbij k'a chawe chi man yinak'uaj-el chupan ri nik'aj chire ri nuk'aslen.
Ri juna' chawech rat xa kan man e k'isel ta k'a.
25Rat kan xajikiba' k'a ri ruwach'ulew pa rutikeribel.
Chijun ri kaj kan ja rat ri xabanon richin.
26Ronojel re' xa xkek'is,
jak'a rat kan beneq k'a ruwech atk'o.
Ronojel xa xkerijix, achi'el nuben jun tzieq.
Rat kan naben k'a chire ronojel chi achi'el jun tzieq ri xa nijal kan y kan yejalatej k'a el.
27Jak'a rat nimalej Dios kan man yajalatej ta k'a.
Rat kan man jun bey k'a xkak'is.
28Ri e kijatzul ri yesamajin awichin kan kuqul k'a kik'u'x xkek'ase'.
Kan chawech k'a rat xkek'oje-wi ronojel sol winaqi' ri'.
Currently Selected:
Sal 102: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
