Sal 104
104
Bix chire ri Dios ri xbanon ronojel
1Yin kan jantape' xtinnimirisaj ruq'ij ri Jehová.
Jehová nu-Dios yin, rat kan janila at nim.
Kan awiqon k'a awi' rik'in k'ojlemal y ruwaq'ijaj.
2Kan nabolqotij k'a awi' chupan ri saqil, achi'el xa ta atziaq abanon chire.
Rat kan xarik' k'a ri kaj achi'el nirik' jun jay banon rik'in tzieq.
3Kan xajikiba' ri ruwi' ri awachoch pa ruwi' ri sutz'.*f99*
Ri sutz' xe'ok achi'el jun carruaje uk'uey awichin.
Rat kan yabiyin pa ruwi' ri kaq'iq'.
4Ri kaq'iq' kan jari' ri e ataqon.
Ri koyopa' jari' k'a ri banoy asamaj.
5Ja rat xajikiban ri ruxe' ri ulew,
richin kan man jun k'a xtisilon.
6Toq k'a man jani tach'er ri ruwach'ulew rik'in ri ya',
ri nimalej taq palou kan rukuchun k'a ri ruwach'ulew achi'el jun tzieq.
Ri ya' ri' kan rutz'apen k'a ruwi' ri nimalej taq juyu'.
7Jak'a toq rat xach'on kik'in, kan chi'anin xech'aratej.
Xaxe xkak'axaj ri ach'abel ri kan achi'el koqolajay, chi'anin xebe pa taq kik'ojelibal.
8Ri ya' ri' xebebiyin-pe chuwech ri nima'q taq juyu'.
Y kan xebiyin k'a pe chikikojol ri juyu'.
Xapon k'a akuchi xabij-wi rat chi yek'oje-wi ronojel ri ya'.
9Xaya' k'a ruchi' ronojel ri ya' y kan man nel ta pe pa ruk'ojelibal,
richin kan man jun bey chik k'a xtumuq ri ruwach'ulew.
10Jehová, ja rat ri xabanon ri tz'ukubel taq ya',
y ye'ateq chupan ri kokoj raqen taq ya'.
Ri raqen taq ya' ri' kan yeq'axlan k'a kojol taq juyu'.
11Jari' ri nikiqum ri chikopi' richin pa taq juyu'.
Jari' ri nik'owisan-qa ri chaqi'j kichi' ri taq bur richin pa k'echelaj.
12Chuchi' ri raqen taq ya' ri' yek'oje-wi ri aj-xik' taq chikopi'.
Yek'oje' k'a pa ruq'a' taq che' y yebixan.
13Jehová, kan k'a chila' chikaj akuchi atk'o-wi, naya'aj-pe re ruwach'ulew.
Rik'in k'a ri asamaj rat yech'uch'u' konojel ri ek'o chuwech re ruwach'ulew.
14Rat kan naben k'a chi nik'iy-pe ri q'os richin kiway ri chikopi';
ri tiko'n kan naben k'a chire chi niwachin richin chi nel-pe ruway ri wineq;
15naben chi k'o ri vino ri nibanon chi nikikot ri ránima ri wineq;
ri aceite ri nibanon chi jebel nitzu'un ri wineq;
keri' chuqa' ri wey ri chapayon richin.
16Jehová ja rat yabanon chi ri che' k'o kiya'al y jari' ri kik'aslen.
Ri tiox-che' ri e tikil pa Líbano, kan ja rat xabanon chi yek'iy-q'anej.
17Pa kiwi' ri che' ri' nikiben-wi kisok ri kokoj aj-xik' taq chikopi'.
Chupan ri nima'q taq che' nikiben-wi kachoch ri nima'q aj-xik' chikopi'.
18Chupan ri nima'q taq juyu' yek'oje-wi ri tzuntzun richin pa k'echelaj.
Ri nima'q taq abej, kachoch ri umul.
19Jehová, rat kan xaben k'a ri ik' richin retal ri juna'.
Ri q'ij kan xaben k'a chire chi retaman akuchi nibeqaqa-wi.
20Naben k'a chi nipe ri q'equ'm y kan jari' nokoq'a-pe.
Chupan k'a ri aq'a' ri' yebiyajilan ri k'uxunela' taq chikopi' richin pa k'echelaj.
21Jari' toq ri alaji' taq koj yewuyin roma nikikanoj ri kiway.
Kan nikikanoj k'a ri kiway ri naya' chike rat.
22Jak'a toq nel-pe ri q'ij, rije' nikik'ol-ki'.
Rije' kan yebek'oje' k'a pa taq kijul.
23Jari' toq nel-el ri achin richin nibe pa samaj.
Nuben k'a ri rusamaj y k'a niqaqa na ri q'ij k'ari' nitane'.
24Nimalej Jehová, ri asamaj rat kan man ajlatel ta k'a.
Chikijujunal xe'aben k'a rik'in na'oj.
Kan chijun ruwach'ulew nojineq rik'in ronojel ri xaben.
25Niqatz'et k'a ri palou ri kan janila nim,
ri akuchi yesilon-wi janila chi chikopi', ri kan man e ajlatel ta.
Chiri' kan ek'o k'a jalajoj kiwech chikopi', chi ch'uti'q chi nima'q.
26Pa ruwi' k'a ri nimalej palou ri' yebiyajilan-wi nima'q taq barco.
Chuqa' xe'aben ri nimalej taq chikopi' richin yesilon chupan.
27Konojel rije' koyoben richin naya' kiway toq k'atzinel.
28Rat naya' chike y rije' nikimol kan.
Najeq ri aq'a' richin naya' chike ri k'atzinel y rije' yech'uch'u' rik'in ri utzil ri'.
29Wi rat nawewaj-awi', rije' kan nisach kik'u'x.
Toq nawelesaj ri uxla' kik'in, rije' xa kan yeken-qa.
Y xa kan yetzolej chik pa poqolaj.
30Rat naya' k'a pe ri uxla' richin k'aslen, y ek'o ch'aqa' chik yetz'ukutej-q'anej.
Keri' kan k'ak'a' naben chire ri ruwech ri ruwach'ulew.
31Ri ruq'ij-ruk'ojlen ri Jehová kan richin q'asen.
Rija' kan nikikot rik'in ri rusamaj.
32Rija' xaxe nutzu' ri ruwach'ulew y ri ruwach'ulew kan nik'ark'ot.
Xaxe nuneq juba' kiwi' ri juyu' y ri juyu' ri' kan yebuqulin-pe sib chupan.
33Kan chijun k'a ri nuk'aslen xkibixan chire ri Jehová.
Kan chire k'a ri nu-Dios xtinya-wi ri nubix rokik in k'es.
34Ri nuch'obonik rik'in rija', kan janila jebel,
yin kan jantape' k'a xkikikot rik'in.
35Jak'a ri e aj-maki' kan ta k'a xkek'is-el.
Kan ta k'a xkek'is-el ri e banoy taq etzelal.
Yin kan jantape' xtinnimirisaj ruq'ij ri Jehová.
Kan xtinnimirisaj k'a ruq'ij ri nu-Dios yin.
Currently Selected:
Sal 104: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
