Pro 3
3
Kan tikanoj k'a ri na'oj
1Rat walk'ual, man k'a tamestaj ri tijonik ri nuya'on chawe,
xa kan tayaka' pan awánima ri nuchilaben chawe chi naben,
2roma re' kan xtikiben k'a chawe chi kan k'iy q'ij ri xtatz'et-el,
k'iy juna' ak'aslen ri xtaq'axaj-el y xtuk'en chuqa' pe uxlanen chawe.
3Ri joyowanik y ri qitzij kan awichin tabana' chike y man ke'amestaj kan;
kan tabana' chi jebel ta yeq'alajin ri pan ak'aslen, achi'el niq'alajin jun ichinaj ri tzeqel chuwa-ak'u'x;
kan tabana' k'a chi e tz'ibatel ta ri pan awánima.
4Wi xtaben k'a ronojel re', kan xtawil k'a utzil y jebel ch'owen ri xtiban chawij,
kan xtawil k'a re' rik'in ri Dios y kik'in ri winaqi'.
5Kan rik'in k'a ronojel awánima takuquba' ak'u'x rik'in ri Jehová,
y man takuquba-qa ak'u'x awik'in rat roma ri awetamabal.
6Xa kan ja rija' ri taya' pa nabey, chupan ronojel ri k'o chi naben,
keri' ja rija' ri nuk'uan abey chupan ri ak'aslen.
7Man jun bey tatzu-qa-awi' chi kan k'o-wi ana'oj,
xa tik'oje' rukiy ri Dios chawech y xtajech'ej-awi' chuwech ri etzelal.
8Y re' kan xtuk'en k'a pe raxnaqil chire ri ach'akul,
y chuqa' kan xtuya' ruchuq'a' ri abaqil.
9Rat kan taya' k'a ruq'ij ri Jehová rik'in ri abeyomel,
kan taya' k'a ruq'ij rija' rik'in ri nabey taq ruwech ri atiko'n
10Rik'in k'a ri xtaben keri', ri ak'ujay kan xkenoj y xkepulin-pe,
y keri' chuqa' ri ruk'ojelibal ri k'ak'a' a-vino kan xkenoj y xkepulin-el.
11Rix walk'ual alaboni', ri ch'olinik ri nuya' ri Jehová chiwe, man tiben chi xa man nik'atzin ta chiwe,
man itzel tina' toq ri Jehová rik'in ruk'ayewal yixruchojmirisaj-wi.
12Roma ri Jehová kan keri' nuben chike ri yerajo';
achi'el jun tata'aj toq nuch'olij ri ralk'ual ri janila nrajo'.
Ri na'oj kan k'o-wi rejqalen
13Roma ri' kan jebel ruwa-ruq'ij ri wineq ri kan niberila-pe ri na'oj.
Jebel ruwa-ruq'ij ri wineq ri kan nril-q'anej ri jebel ch'obonik.
14Re' kan más jebel ke chuwech ri saqipueq,
jare' ri beyomel más nim, ke chuwech ri q'anapueq.
15Ri na'oj kan más wi rejqalen ke chikiwech ri jebelej taq abej,
kan más wi rejqalen ke chuwech ronojel ri k'o rik'in ri wineq, ri kan k'o janila rajel chuwech rija'.
16Ri na'oj achi'el xa ta k'o ruq'a' y ri pa rijkiq'a' ruk'amon-pe k'aslen,
y ri pa rajxokon ruk'amon-pe beyomel y k'ojlemal.
17Ri na'oj kan nuben-wi k'a chire ri k'aslen chi kan k'o ruki'il,
y ronojel bey ri akuchi yeruk'uaj-wi ri winaqi' kan k'o-wi uxlanen.
18Ri na'oj kan achi'el k'a jun che' ri kan nuya' k'aslen chire ri nikanon richin,
y xabachike k'a wineq ri kan nuben richin chire, kan jebel k'a ruwa-ruq'ij.
19Kan ja wi ri na'oj ri xukusaj ri Jehová richin xuch'okoba' re ruwach'ulew,
y ja ri etamabel ri xukusaj richin xunuk' jebel ri kaj.
20Rik'in ri etamabel, ri Jehová xuben chi xch'aratej ri palou,
y ri ya' ri k'o chikaj chupan ri sutz' kan niqaqa-pe toq niqaqa-pe ri raxq'ab.
Ri kikoten ri ruk'amon-pe ri na'oj
21Rix walk'ual alaboni', kan jantape' k'a tik'oje' ri na'oj y ri utzilej ch'obonik iwik'in,
kan man tiya' q'ij richin chi nisach-el chiwech.
22Roma wi re' kan xkek'oje' iwik'in, kan xtuya' ik'aslen,
kan xke'ok wiqobel richin ruwa taq ik'u'x, achi'el xa ta e ichinaj.
23Y jari' ri xtibanon chiwe chi man jun xtik'uluwachij chupan ri ibey,
y chuqa' xtuben chiwe chi man xtipajk'ila' ta iwaqen.
24Jari' chuqa' xtibanon chiwe chi toq yixkotz'e-qa, man xtixibij ta iwi',
y chuqa' toq yixkotz'e-qa, kan jebel xkixwer ri junaq'a'.
25Kan man xtuya' ta xibinri'il chiwe toq k'o ri yek'uluwachitej,
chuqa' kan man xtuya' ta xibinri'il chiwe, roma ri aj-maki' nipe wululen chikij.
26Kan man k'a xtixibij ta iwi', roma kan xtina' chi jikil ixk'o rik'in ri Jehová,
y chuqa' kan xtuchajij ri iwaqen richin chi man tiqaqa pa pikbel.
Ri utzil ri nuk'en-pe ri ruchojmilal
27Man tiben chi man yixtikir ta niben jun utzil chire jun iwachpochel,
toq xa kan pan iq'a' k'o-wi richin chi niben.
28Man jun bey tibij chire jun iwachk'uljay, ri k'o nik'atzin chire, chi tipe k'a ri jun chik q'ij,
toq xa k'o iwik'in ri nik'atzin chire y yixtikir niya-el chire ri q'ij ri'.
29Man tipe itzel taq ch'obonik iwik'in, chirij ri iwachk'uljay,
roma rija' kan kuqul ruk'u'x chi k'o-apo chi'inaqaj rix.
30Man tiyek ch'a'oj chirij jun wineq ri xa man jun achike roma,
toq xa kan man jun achike ta ch'a'oj ri rubanon chiwe.
31Man tipe rayibel iwik'in chi yixok ta achi'el jun wineq banoy oyowal,
ni man tirayij nitzeqelibej ri rubey ri wineq ri'.
32Ri Jehová kan man niqa' ta k'a chuwech ri wineq ri man ja ta ri yeruben,
jak'a kan junan ruwech kik'in ri choj kik'aslen.
33Ri Jehová kan ruyon k'a ri man utz ta ri nuteq pa ruwi' ri rachoch ri aj-mak,
jak'a pa ruwi' ri rachoch ri wineq ri choj ruk'aslen kan ruyon k'a urtisanik ri nuteq-pe.
34Ri Jehová kan yeruyojobej ri winaqi' ri yeyojoben,
jak'a ri winaqi' ri kiqasan-ki', kan xtuya' k'a ri rutzil chike.
35Ri winaqi' aj-na'oj kan xtikik'ul k'a kiq'ij,
jak'a ri winaqi' ri xa maneq kina'oj, xa k'ix ri xtikik'ul.
Currently Selected:
Pro 3: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
