Pro 4
4
Ri ruch'abel ri tata'aj chike ri ralk'ual
1Kan jebel k'a tiya' ixikin rix alk'ualaxela' alaboni', chire ri tijonik richin ri itata'.
Kan tiya' k'a ixikin y xtiwil-q'anej ri jebel ch'obonik.
2Roma yin kan ninya' jun tz'aqet etamabel chiwe,
y kan man timalij kan ri nink'ut yin chiwech.
3Roma yin chuqa' xinok ak'ual y xik'oje' pa rachoch ri nata';
kan nuyon k'a yin ri xik'oje' rik'in ri nte', roma ri' kan janila k'a xirajo'.
4Ri nata' kan kere' k'a ri ch'abel ri xerubij chuwe:
Kan kek'ase' k'a jebel ri nuch'abel ri pan awánima,
y kan tabana' k'a ri ninbij chawe, richin chi kan ki' ri k'aslen ri xtawil.
5Kan katok k'a q'anej aj-na'oj y katok-q'anej jun wineq ri yach'obon jebel;
man ke'amestaj ri ch'abel ri e nubin chawe y chuqa' man tajech'ej-el-awi' chike.
6Kan man k'a taya-tamestaj kan ri na'oj y kan xtok chajinel awichin,
kan taloq'oq'ej k'a y kan xkarukol k'a chuqa'.
7Ri na'oj kan jari' k'a ri más utz chire ronojel, roma ri' kan katok k'a aj-na'oj,
roma chire ronojel ri nawajo' nawil-q'anej, kan katok-q'anej jun wineq ri yach'obon jebel,
8Kan taya' k'a rejqalen ri na'oj y nej k'a xkarujotoba-wi-q'anej,
ri na'oj kan xtuben chi xtik'oje' aq'ij, toq xtaben awichin chire y xtaq'etej pan aq'a'.
9Ri na'oj kan xtiq'alajin k'a achi'el jun wiqobel ri pan ajolon,
xa kan achi'el jun corona ri sipanik ri xtuya' chawe, xcha' ri nata' chuwe.
Ri pixabanik richin nawil jun choj k'aslen
10Kan tawak'axaj k'a rat walk'ual, tak'ulu' k'a ri ch'abel ri xinbij,
richin k'iy juna' xkak'ase' chuwech re ruwach'ulew,
11Yin kan nink'ut k'a chawech ri bey ri richin ri na'oj,
y kan yatinyuqej chuqa' chupan ri chojmilej bey.
12Roma ri' toq yabiyin chupan ri ak'aslen, man jun ri xtok pan abey;
toq yatanin chupan ri ak'aslen, man xtapajk'ij ta awaqen.
13Kan tachapa' k'a jebel re tijonik re ninya' chawe, man taya' q'ij chi nibe chawech,
kan tayakakej jebel roma kan jare' ri ak'aslen.
14Man tachop-el ri kibinibal ri winaqi' aj-maki',
man tatzeqelibej-el ri kibey ri winaqi' itzel kibanobal.
15Kan tatija' aq'ij chi man yabiyin ta chupan ri kibey ri winaqi' ri',
tachapa' jun bey utz y jari' ri tatzeqelibej.
16Roma ri winaqi' ri' man nipe ta kiwaran, wi xa man jun etzelal kibanon kan;
rije' kan nel k'a kiwaran, wi xa man jun wineq ri kibanon kan ch'a'oj chire.
17Ri wey ri nikitej rije' kan ja ri itzel taq kibanobal ri niya'on chike,
y ri vino ri nikiqum, ja ri koyowal ri niya'on chike.
18Ri kibey ri chojmilej taq winaqi', kan junan rik'in ri nabey saqil ri niq'alajin-pe ri nimaq'a',
nabey xa juba' ok ri saqil y napon k'a ri ramaj toq ri saqil kan jebel niberubana-pe.
19Jak'a ri kibey k'a ri winaqi' aj-maki', kan q'equ'm-q'equ'm k'a
y roma ri' kan man xtiketamaj ta ri akuchi xketzaq-wi roma nikipajk'ij-kaqen.
20Rix walk'ual alaboni', kan tiwak'axaj k'a re ninbij chiwe,
kan tilukuba-iwi' y ri ixikin kan trak'axaj k'a re nuch'abel.
21Kan man k'a tiya' q'ij chi re nuch'abel nisach-el chiwech,
xa titija' iq'ij chi re nuch'abel re' kan kek'oje' chi'ik'u'x.
22Roma ri' ri winaqi' ri ye'ilon richin re nuch'abel kan xtuya-wi kik'aslen,
y kan xtok chuqa' raq'omal chijun ri kich'akul.
23Roma ri' rat kan jebel k'a tachajij-awi' chike ri ch'obonik ri yepe pan awánima,
roma ja ri pan awánima nipe-wi ri rubanikil ri ak'aslen.
24Rat kan tawelesaj-el awik'in ronojel ri ch'abel ri xa nuyek oyowal,
kan man ke'el-pe pan achi' ri ch'abel richin etzelal.
25Kan jantape' k'a tabana' chi ri awech kan xaxe chawech nitzu'un-wi,
kan tach'ikiba' k'a ri runaq' awech chawech-apo.
26Tach'obo' k'a rij ri akuchi xtaya-wi ri axaka'l,
richin keri' ronojel ri abey ri xtak'uaj, kan choj xkek'ulun chawech.
27Kan choj k'a tak'uaj ri abey, man kabe pan awijkiq'a' ni pan awajxokon
kan xtajech'ej-awi' chire ri etzelal.
Currently Selected:
Pro 4: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
