Pro 2
2
Ri na'oj rik'in ri Dios nipe-wi
1Wi rix walk'ual alaboni', kan nik'ul k'a ri nuch'abel,
y kan niya' ri chiri' pan iwánima, ri nupixa' ri ninya' chiwe,
2wi rix kan niya' k'a ixikin chire ri na'oj,
y kan nicha' ik'u'x chire ri etamabel,
3wi rix kan nik'utuj k'a chi yixok nowineq
y kan rik'in ri ichi' rix nik'utuj chire ri etamabel chi tipe iwik'in,
4wi kan janila nirayij re', achi'el nirayij ruwech ri saqipueq,
y kan janila nikanoj achi'el nikanox jun beyomel ri ewan kan,
5wi keri' kan xtiq'ax k'a chiwech y xtiwetamaj
ri achike rubanik ri k'o rukiy ri Dios chuwech jun wineq.
6Roma xaxe k'a ri Dios ri niya'on ri na'oj,
kan pa ruchi' k'a rija' nel-wi-pe ronojel ri ch'obonik y ri etamabel.
7Ri Jehová kan jantape' k'a runaban-ri' richin chi yeruto' ri choj kik'aslen,
y kan ja chuqa' rija' ri kitobal ri maneq kimak.
8Roma kan ja rija' ri nichajin ri kibey ri choj kik'aslen,
y kan ja chuqa' rija' ri niyuqen kichin ri winaqi' ri kan nikiben achi'el ri nikibij.
Ri na'oj kan nuya-wi to'onik
9Ronojel re' kan xtuben k'a chiwe chi xtiq'ax chiwech ri k'o chi niben,
choj niben kik'in ri winaqi', choj ri ik'aslen;
roma ja banobel re' ri k'o utz ri nuk'en-pe.
10Xtiben k'a ronojel ri', roma kan xtok ri na'oj ri pa taq iwánima,
y roma chuqa' ri etamabel kan xtuya' kikoten chiwe.
11Ri yixtikir niq'et-iwi' rik'in ri ich'obonik kan xkixruto' k'a,
y ri yixnojin jebel kan xkixruchajij chuqa'.
12Ri na'oj kan xkixrukol k'a chuwech ronojel itzel bey,
kan xkixrukol chuqa' chikiwech ri winaqi' ri man choj taq ch'abel ta ri nel pa kichi'.
13Kan xkixrukol chikiwech ri winaqi' ri kiya'on kan ri choj bey,
y xa kik'uan ri bey ri richin ri q'equ'm,
14winaqi' ri kan ki' nuna' ri kánima chubanik ri etzelal,
y kan janila yekikot yekibanala' ri más k'ixbel taq banobel.
15Winaqi' ri xa xotoxeq ri kibey e kik'uan,
y kan man q'alaj ta k'a akuchi xke'apon-wi roma ri rubanik ri kik'aslen.
Ri na'oj kan nuto' ri wineq richin man nitzaq
16Ri na'oj xa kan xkixrukol richin chi man yixqaqa pa ruq'a' ri ixoq ri itzel ruk'aslen,
chuwech ri ixoq ri' ri nrajo' yixruch'ek rik'in ri jebelej taq ruch'abel.
17Ri ixoq ri' xa rumalin kan ri rachibil ri xril toq rija' kan k'a xten na,
xa xumestaj yan toq kan chuwech ri Dios xuya' rutzij chi kan nrajo' ri rachijil.
18Y roma ri' wi yixbe chirachoch ri ixoq ri', xa kan choj k'a ixbeneq richin chi yixk'is,
ri bey ri' xa choj k'a beneq pa kamik.
19Y xabachike k'a ri nuju-ri' rik'in ri ixoq ri', man nitzolin ta chik pe ruk'u'x,
kan man xtril ta chik ri bey richin ri k'aslen.
Ri ruchojmilal ri k'aslen
20Xa roma ri' rix nuk'ajol yin, titzeqelibej ri kibey ri utzilej taq achi'a',
kan titija' k'a iq'ij yixbiyin chupan ri kibey ri choj kik'aslen.
21Roma xaxe k'a ri wineq ri kan choj ri ruk'aslen, ri xtik'oje' kan chuwech re ruwach'ulew,
y kan wawe' k'a xkeyaloj-wi-qa ri kan tz'aqet ri kik'aslen.
22Jak'a ri aj-maki' kan xtiqupix-el ri kik'aslen chuwech re ruwach'ulew,
y ri nikiq'ej ruwi' ri ruch'abel ri Dios, kan xkek'uq-el re wawe'.
Currently Selected:
Pro 2: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.