Popular Bible Verses from Pro 3

Share

Kan rik'in k'a ronojel awánima takuquba' ak'u'x rik'in ri Jehová, y man takuquba-qa ak'u'x awik'in rat roma ri awetamabal. Xa kan ja rija' ri taya' pa nabey, chupan ronojel ri k'o chi naben, keri' ja rija' ri nuk'uan abey chupan ri ak'aslen.

Man jun bey tatzu-qa-awi' chi kan k'o-wi ana'oj, xa tik'oje' rukiy ri Dios chawech y xtajech'ej-awi' chuwech ri etzelal.

Rat kan taya' k'a ruq'ij ri Jehová rik'in ri abeyomel, kan taya' k'a ruq'ij rija' rik'in ri nabey taq ruwech ri atiko'n Rik'in k'a ri xtaben keri', ri ak'ujay kan xkenoj y xkepulin-pe, y keri' chuqa' ri ruk'ojelibal ri k'ak'a' a-vino kan xkenoj y xkepulin-el.

Ri joyowanik y ri qitzij kan awichin tabana' chike y man ke'amestaj kan; kan tabana' chi jebel ta yeq'alajin ri pan ak'aslen, achi'el niq'alajin jun ichinaj ri tzeqel chuwa-ak'u'x; kan tabana' k'a chi e tz'ibatel ta ri pan awánima.

Rix walk'ual alaboni', ri ch'olinik ri nuya' ri Jehová chiwe, man tiben chi xa man nik'atzin ta chiwe, man itzel tina' toq ri Jehová rik'in ruk'ayewal yixruchojmirisaj-wi. Roma ri Jehová kan keri' nuben chike ri yerajo'; achi'el jun tata'aj toq nuch'olij ri ralk'ual ri janila nrajo'.

Rat walk'ual, man k'a tamestaj ri tijonik ri nuya'on chawe, xa kan tayaka' pan awánima ri nuchilaben chawe chi naben, roma re' kan xtikiben k'a chawe chi kan k'iy q'ij ri xtatz'et-el, k'iy juna' ak'aslen ri xtaq'axaj-el y xtuk'en chuqa' pe uxlanen chawe.

Roma ri' kan jebel ruwa-ruq'ij ri wineq ri kan niberila-pe ri na'oj. Jebel ruwa-ruq'ij ri wineq ri kan nril-q'anej ri jebel ch'obonik. Re' kan más jebel ke chuwech ri saqipueq, jare' ri beyomel más nim, ke chuwech ri q'anapueq. Ri na'oj kan más wi rejqalen ke chikiwech ri jebelej taq abej, kan más wi rejqalen ke chuwech ronojel ri k'o rik'in ri wineq, ri kan k'o janila rajel chuwech rija'.

Man tiben chi man yixtikir ta niben jun utzil chire jun iwachpochel, toq xa kan pan iq'a' k'o-wi richin chi niben.

Kan ja wi ri na'oj ri xukusaj ri Jehová richin xuch'okoba' re ruwach'ulew, y ja ri etamabel ri xukusaj richin xunuk' jebel ri kaj.