Pro 28
28
Ri etamabel-tzij chirij ri rubanobal ri wineq
1Ri wineq itzel xa nixibiyaj y jantape' tzeqeliben nuna',
jak'a ri chojmilej wineq, kan achi'el jun koj ri xa man jun xibinri'il chuwech.
2Xa roma k'a ri etzelal ri ek'o pa jun ruwach'ulew, toq e k'iy q'atoy-tzij ri yek'oje';
jak'a ri wineq ri k'o utzilej ruch'obonik y k'o retamabal, kan nitikir-wi yeruk'uaj ri winaqi' rik'in ruchojmilal.
3Ri achin ri xa man jun ok k'o rik'in y kan yerutz'ila' ri winaqi' e rachmeba'i',
kan junan k'a rik'in ri job ri nujok-el ronojel y man jun chik tiko'n ri nuya' kan.
4Ri winaqi' ri yeya'on kiq'ij ri e banoy richin etzelal, xa ja ri kiya'on chik kan rubanik ri pixa' richin ri ruchojmilal;
jak'a ri kan kitaqen ri pixa' richin ri ruchojmilal, kan man utz ta yekitz'et y nikipaba-ki' chikiwech.
5Ri winaqi' ri nikiyoj rubanik ronojel, kan man niq'ax ta chikiwech ri rubanik ri ruchojmilal;
jak'a ri wineq, ri jantape' nikikanoj ri Jehová, kan niq'ax-wi chikiwech ri chojmilal ri'.
6Kan más wi utz jun wineq ri xa man jun ok k'o rik'in y kan tz'aqet rik'in ri rubanobal,
ke chuwech jun wineq ri kan beyom y ronojel ri yeruben xa ruyon xotoxeq taq banobel.
7Ri kan nuben ri nubij ri rupixa' ri Dios, kan q'alaj chi jun alk'ualaxel aj-na'oj,
jak'a ri alk'ualaxel ri xa yerachibilaj ri xaxe wa'in nikiben, xa nuya' ruk'ix ri rutata'.
8Ri kan nuben-q'anej rubeyomel, roma ri ral ri ruméro y roma ri nik'o ruwi' nuk'utuj chike ri yeqajo rik'in;
rija' kan man retaman ta chi ri beyomel ri' xa pa ruq'a' jun chik ri kan nujoyowaj kiwech ri meba'i' ri nibek'oje-wi kan.
9Ri wineq ri xa pa rubanik nuben chi man nrak'axaj ta ri rupixa' ri Dios,
toq nich'on-q'anej rik'in ri Dios, kan man xtak'axex ta ri ruch'owen.
10Ri nibanon chire ri chojmilej wineq richin chi nuya' kan ri rubeyal ri ruk'aslen, xa xtiqaqa pa pikbel;
jak'a ri winaqi' ri kan jantape' qitzij ri nikibij, kan xtikik'ul k'a ri kikoten.
11Ri wineq beyom kan nuch'ob-qa chi rija' kan k'o runa'oj;
jak'a ri wineq ri xa man jun ok ri k'o rik'in, ri kan nich'obon jebel, nrak'axaj na jebel wi kan keri' o ni.
12Toq ri winaqi' e choj nik'oje-q'anej kik'ojlen, kan k'o nimaq'ij chikiwech ri winaqi';
jak'a toq xa ja ri winaqi' e itzel ri nik'oje' kik'ojlen, ri winaqi' xa nibekewaj-ki'.
13Ri man yeruq'alajirisaj ta ri itzel taq rubanobal ri yeruben, xa ronojel itzel ye'el chuwech;
jak'a ri yeruq'alajirisaj y nuya' kan rubanik, kan xtril kuyubel rumak.
14Kan jebel k'a ruwa-ruq'ij ri wineq, ri kan jantape' k'o rukiy ri Dios chuwech;
jak'a ri kan rukowirisan ránima chuwech ri Dios, xa xtitzaq pa mak.
15Kan achi'el k'a jun koj ri nureq ruchi' o achi'el nuben jun oso ri niken roma wayjal;
kan keri' rubanikil ri q'atoy-tzij ri banoy richin etzelal, y niq'aton-tzij pa kiwi' meba' taq winaqi'.
16Jun q'atoy-tzij ri xa man utz ta runojibal, kan k'iy k'a ri nutz'oq chuwi-kiq'a' ri winaqi';
jak'a ri q'atoy-tzij ri kan nretzelaj ri itzel taq ch'akoj, kan k'iy k'a q'ij ri xtiq'aton-tzij.
17Ri wineq ri k'o kamik rubanon chikikojol ri ruwinaq,
stape' nanimajilan y nrewala-ri' chupan chijun ruk'aslen keri' niken-el; kan man jun k'a xtiq'aton richin.
18Ri wineq ri kan choj nibiyin chupan ri ruk'aslen, kan xtril k'a rukolotajik;
jak'a ri wineq banoy etzelal ri nisolma'y chukanoxik rubey, xa xtitzaq chupan jun chike ri rubey.
19Ri wineq ri kan nutik ruwech ri rulew, kan k'o-wi ri xtrelesaj y jebel xtiwa';
jak'a ri wineq ri jantape' nuxlan, y yerutzeqelibej ri q'ori' xa rik'in meba'il xtik'ase'.
20Jun achin ri kan nuben ri nrajo' ri Dios, kan xtiq'ej k'a pe urtisanik pa ruwi',
jak'a ri wineq ri anineq nibeyomer-q'anej, kan xtipe k'a itzel ch'obonik chirij.
21Kan man utz ta k'a chire ri wineq chi xaxe ri utz nutz'et, jari' ri nuto';
chuqa' xaxe roma nurayij-apo ruway ri jun chik nimakun.
22Ri wineq ri janila nirayin, kan anineq nrajo' nibeyomer-q'anej;
y man jun retaman chi xa meba'il ri peteneq chirij.
23Ri wineq ri nibin chire jun chik chi tuchojmirisaj ri rubanobal, xtimatioxix chire toq k'iy yan q'ij tiq'ax,
kan janila xtimatioxix chire, más ke chuwech xa ta xunimirisaj ruq'ij.
24Ri alk'ualaxel ri k'o nreleq'aj chire ri rutata' y neleq' chuqa' rik'in ri rute', y k'ari' nubij chi man mak ta ri nuben,
ri alk'ualaxel ri' xa kachibil ri eleq'oma', ri ye'eleq' pa taq bey ri yebe juk'an chik tinamit.
25Ri wineq ri kan janila rayinik k'o rik'in richin nich'akon, xa jun yakol oyowal;
jak'a ri wineq ri kan nukuquba' ruk'u'x rik'in ri Jehová, ronojel utz nel chuwech y nibe pa jotol.
26Ri wineq kan nuk'ut k'a chi man jun ok retaman, toq ruyon rija' nuben chi k'o ruq'ij;
jak'a ri wineq ri kan k'o-wi na'oj rik'in, kan man niqaqa ta chupan ri na'oj ri'.
27Kan man jun k'a ri xtibek'atzin-pe chire ri wineq, toq kan k'o ri nuya' chike ri winaqi' ri man jun k'o kik'in;
jak'a ri wineq ri nim nuna-ri' y xa man yeruto' ta, k'iy ruk'ayewal ri xtiqaqa pa ruwi'.
28Toq kan ja ri winaqi' e itzel ri nik'oje-q'anej kik'ojlen, konojel ri ch'aqa' chik winaqi' xa nikewaj-ki';
jak'a toq yeken-el ri winaqi' ri e itzel, jari' toq ri utzilej taq winaqi' kan chi'anin yek'iyer-q'anej.
Currently Selected:
Pro 28: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
