Pro 29
29
Ri choj kik'aslen kan utz ri kibanobal
1Ri wineq banoy richin etzelal, ri kan man nuqasaj ta ri',
kan pa jun ti ramaj xtiya'ox-pe ri kamik pa ruwi' y man jun chik ri xtikolon richin.
2Toq kan ja ri winaqi' e utz ri nik'oje-q'anej kik'ojlen richin yeq'aton-tzij, ri winaqi' yekikot,
jak'a toq xa ja ri winaqi' e itzel ri yeq'aton-tzij pa kiwi', konojel ri winaqi' nikitej poqon.
3Ri alk'ualaxel ri kan k'o rejqalen ri na'oj chuwech, kan jun kikoten chire ri rutata',
jak'a ri xa man ninojin ta y nibe ránima chikij ri ixoqi' ri man utz ta kik'aslen, xa niberuk'isa' kan ri rubeyomel kik'in.
4Ri rey xaxe rik'in ri ruchojmilal nitikir nuben chike ri ruwinaq chi utz yek'oje',
jak'a ri rey ri xa k'iy rubanik nuben richin numol méro pa kiwi', xa xkeruk'uaj pa wululen ri ruwinaq.
5Ri wineq ri kan janila nunimirisaj ruq'ij jun rachibil;
xa pikbel ri nuya' pa rubey, richin chi nibetzaq.
6Chire ri wineq itzel, ri rumak kan jun pikbel ri nichapo richin;
jak'a ri wineq utz, kan nik'ases ri ránima y nikikot chupan ri ruk'aslen.
7Ri wineq ri kan utz runa'oj, kan k'o rayibel rik'in chi yeruto' ri winaqi' ri man jun ok k'o kik'in;
jak'a ri wineq ri xa itzel, man retaman ta wi ri winaqi' k'o nik'atzin chike.
8Ri nibanon chike ri winaqi' chi man jun ok kiq'ij, nuben chi niyakatej koyowal ri winaqi' richin jun tinamit;
jak'a ri wineq aj-na'oj, nitikir nuben chi niqaqa ruwi' ri koyowal ri winaqi'.
9Wi ta jun wineq aj-na'oj, nuk'uaj jun wineq ri xa maneq runa'oj, chuwech ri q'atoy-tzij;
xa man jun xtuch'ek, roma ri maneq runa'oj xa xtipe royowal chire o xtitze'en chirij.
10Ri winaqi' e kamisanela' kan itzel nikina' chike ri kan tz'aqet ri kik'aslen,
kan nikikanoj rubanik nikiben richin yekikamisaj ri choj kibanobal.
11Ri wineq ri maneq runa'oj, toq k'o royowal, kan jumul niberuq'alajirisaj-pe;
jak'a ri wineq ri k'o runa'oj kan nuq'et-ri'.
12Ri tata'al ri kan jebel nunimaj-qa ri tz'ukun taq tzij ri yebix chire;
xa yeruyoj ri rusamajela', y nuben chike chi xke'ok tz'ukuy taq tzij.
13Ri wineq ri kan man jun ok k'o rik'in y ri wineq ri nibanon chire chi nutej poqon, kan e junan;
roma ri Dios chi e ka'i' ruya'on-pe runaq' taq kiwech, richin chi yetzu'un.
14Ri rey ri nuq'et-tzij rik'in ronojel ruch'ajch'ojil, pa kiwi' ri winaqi' ri maneq ok k'o kik'in,
kan man jun xtisilon-el richin, ri chiri' pa ruk'ojlen.
15Toq nukusex xik'a'y y nukusex ch'olinik chirij jun ak'ual, nuben chire chi nik'oje-q'anej runa'oj;
jak'a ri alk'ualaxel ri janila niloq'oq'ex, xa xtuya' ruk'ix ri rute'.
16Toq yek'iyer-q'anej ri ebanoy etzelal, ri etzelal kan nik'iy y nutaluj-ri',
y ja rije' ri xkekamiyaj el nabey, chikiwech ri winaqi' ri utz kik'aslen.
17Toq ri awalk'ual ala' man nuben ta ri utz, tach'eya', richin chi ri chawech-apo rik'in uxlanen xkak'ase';
y re' kan xtuk'en k'a pe kikoten chawe chupan ri ak'aslen.
18Toq kan e maneq achi'a' yech'abalin ri nuq'alajirisaj ri Dios, ri winaqi' richin jun tinamit xa maneq rubeyal ri kik'aslen;
jak'a ri wineq ri kan nutaqej ri rupixa' ri Dios, kan jebel k'a ruwa-ruq'ij.
19Ri loq'on samajel, richin chi niniman tzij, man xaxe ta ch'abel ri nik'atzin chi nibix chire,
roma stape' kan niq'ax chuwech, xa man xtuben ta ri nibix chire.
20Rat atz'eton jun wineq, ri chi'anin yerubila-q'anej tzij ri xa man e ruch'obon ta;
achi'el xa más nich'obon ri maneq runa'oj, ke chuwech ri jun wineq ri'.
21Ri nibanon chi kan janila nuloq'oq'ej jun loq'on samajel toq k'a ch'uti'n ok;
napon jun q'ij, toq ri samajel ri' xa xtiyakatej y xtich'akon chirij ri rajaw.
22Ri wineq ri kan niyakatej royowal, xa nuyek oyowal chikikojol ri winaqi';
ri kan janila kow taq ch'abel ri yerubila' roma royowal jantape' nimakun.
23Ri wineq ri nunimirisaj-ri', jari' ri xtibanon chire chi nibe pa xulan,
jak'a ri wineq ri xa maneq ok ruq'ij nuna' ri pa ránima, jari' ri xtibanon chire chi xtinimirisex ruq'ij.
24Ri wineq ri xa junan ruwech rik'in ri eleq'om, xa nretzelaj-qa ri ruk'aslen,
roma kan bin chire chi tisujun y man nisujun ta.
25Roma ri' ri xibinri'il ri nikiya' ri achi'a', xa jun tzaqibel richin ri wineq;
jak'a ri wineq ri kan nukuquba' ruk'u'x rik'in ri Jehová, kan k'o uxlanen, pa ránima.
26E janila winaqi' ri nikiben chi utz yetz'et koma ri ek'o pa kiwi', richin chi man jun nikik'uluwachij,
y man noqaqa ta chikik'u'x chi ri xtiq'aton-tzij pa kiwi' konojel ri winaqi', ja ri Jehová.
27Ri winaqi' ri kan utz ri kik'aslen, kan man nikajo' ta yekitz'et ri winaqi' e itzel,
y ri e itzel kan man nikajo' ta yekitz'et ri kan tz'aqet ri kik'aslen.
Currently Selected:
Pro 29: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
