Pro 27
27
Utzilej k'ambel taq tzij
1Rat, kan man jun bey taben chi at k'es chupan ri q'ij richin chua'q y nanojila' yan ri achike xtaben;
roma xa man jun awetaman wi kan k'a k'o na ak'aslen o xa maneq chik, toq xtapon ri chua'q.
2K'a ja na ri ch'aqa' chik winaqi' ri keya'on aq'ij y man ja ta rat ri yanimirisan aq'ij;
kan k'a ja na ri kichi' ri winaqi' tibin chi nim aq'ij y man ja ta ri achi' rat.
3Ri abej kan janila wi ralal, y kan keri' chuqa' ri sanayi';
jak'a ri royowal ri wineq ri xa maneq runa'oj, jari' ri más ralal.
4Kan poqon k'a ri rubanobal ri wineq ri tikil oyowal pa ránima y maneq joyowanik chuwech;
jak'a ri etzelanik richin jun wineq; chirij jun chik ri utz k'o, xa más man koch'el ta.
5Kan más wi utz ri chi ch'olinik yaq'ax q'ij-q'ij,
ke chuwech yatajowex y xa man niq'alajirisex ta chawech.
6Xa más rutzil ri sokotajik ri nuben chawe jun wineq, ri yarajo',
ke chuwech ri nitz'ubex achi', roma ri netzelan awichin.
7Toq ri wineq nojineq chik rupan, stape' kan ja ri kab ri nikiya' ri taq chikopi' ri sisuj chire, xa man nutej ta chik.
Jak'a ri wineq ri xa man jun k'o pa rupan, kan jebel ki' nuna' chire ri xa k'ey.
8Kan achi'el k'a jun aj-xik' chikop ri nuya' kan ri rusok richin chi nibe nej;
kan keri' chuqa' ri wineq ri nuya' kan ri rachoch y nej k'a nibe-wi.
9Ri jubulej taq aq'om, ri jalajoj kibanik, kan nuben chawe chi nik'ases ri awánima;
keri' ri awachibil ri kan ki' taq ch'abel ri nuya' chawe, kan nuya' awuchuq'a' chupan ri ak'aslen.
10Ri awachibil rat y ri e rachibil ri atata', kan man k'a ke'amestaj,
roma ri q'ij toq xkaqaqa pa jun ruk'ayewal, man nik'atzin ta chi ja na ri rachoch ri awach'alal ri nakanoj;
kan achi'el nubij ri tzij: Más nitikir yaruto' jun wineq ri k'o naqaj, ke chuwech ri awach'alal ri xa nej k'o-wi.
11Kan kixok k'a aj-na'oj walk'ual yin, y rik'in ri keri' kan xtiya' k'a kikoten pa wánima;
richin keri' kan k'o k'a yitikir ninbij chike ri winaqi', ri ye'etzelan wichin.
12Ri wineq ri kan k'o na'oj rik'in, toq nunabej chi k'o ruk'ayewal peteneq, nukanoj akuchi nuto-ri';
jak'a ri wineq ri xa maneq runa'oj, choj nibe y k'a pa ruk'ayewal nibeqaqa-wi.
13Rat kan tak'ama' k'a kan ri rutziaq ri wineq, ri xupaba' kan ri' chuwech ruk'as jun chik,
kan tiyuqe' k'a kan awik'in pa ruk'exel ri ruk'as jun achike na chi wineq.
14Ri wineq ri xa nrelesaj ruwaran jun rachibil, ri nimaq'a' yan, roma kan kow nich'on-apo richin nuya' rutzil ruwech;
re' xa junan rik'in ri nroyoj ta etzelanik pa ruwi' ri rachibil.
15Jun tz'uj ri niqaqa pa jay y kan man nitane' ta, toq najin job;
kan junan k'a rik'in ri ixjayilonel ri kan jantape' nuben oyowal.
16Y stape' kan natej aq'ij chi man ta nel rutzijol ri nibanatej, xa man tikirel ta;
xa junan rik'in ri nawajo' ta naq'et ri kaq'iq' rik'in ri aq'a', o nawajo' ta namoq'ej ri aceite pan awijkiq'a'.
17Richin niban ruchojmil o niban rutza'n jun q'eqapueq, kan q'eqapueq chuqa' ri nukusex;
y keri' ri wineq, richin nichojmirisex, kan jun chik k'a wineq ri k'o chi nibanon.
18Ri samajel ri kan jebel nrilij juwi' wíkix, kan niberutija-wi k'a ri ruwech ri xtuya',
y keri' ri wineq ri kan jebel nrilij ri rajaw, kan k'o-wi k'a utzil ri xtuk'ul.
19Kan achi'el k'a nuben ri ya', ri nuk'ut-pe chawech ri achike rubanik yatzu'un,
keri' chuqa' nuben ri awánima awik'in, kan nuq'alajirisaj k'a ri achike rubanik ri ak'aslen.
20Achi'el ri jul richin kamineq y ri k'a akuchi yebek'oje-wi ri e kaminaqi' chik el, ri kan jantape' k'o ri yekik'ul;
keri' ri rutzubal ri wineq, kan jantape' k'o nrajo' nutzu'.
21Ri saqipueq kan ch'ajch'oj k'a, toq kan xya'erisex yan chupan ri ruk'ojelibal;
ri q'anapueq kan ch'ajch'oj chik chuqa', toq kan xya'erisex yan chupan ri horno;
keri' ri wineq kan netamex ri achike rija', rik'in ri ruk'ojlen ri nikiya' ri winaqi'.
22Jun wineq ri xa maneq runa'oj, stape' kan niq'ututex, man nichojmir ta.
23Kan tacha' k'a ak'u'x richin chi kan jebel ta kibanik yetzu'un ri awákix y ri akiej;
kan ke'awilij jebel ri molaj akarne'l y ri molaj tzuntzun.
24Roma kan man jun beyomel ri kan richin ta q'asen,
ni ri ru-corona jun rey, man xtiyaloj ta.
25Ri q'os kichin ri chikopi' nibe'el-pe y nik'iy-q'anej.
y nibeq'at-pe ri q'os ri k'o chuwi' taq juyu'.
26Toq keri' nibanatej, ri taq karne'l nisokex ri taq kisumal richin chi niban ri tzieq;
y ri kajel ri jujun tzuntzun ri xkek'ayix, xtukusex richin niloq' jun ulew.
27Y ri ixoqi' taq tzuntzun xtikiya' leche richin nrilij-ri' ri wineq.
Xkerilij konojel ri ek'o pa rachoch y man xkeken ta roma wayjal ri rusamajela'.
Currently Selected:
Pro 27: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
