Pro 26
26
1Kan man ruk'amon ta chi niqaqa pimilej-tew y xa man ruq'ijul ta,
ni chuqa' chi nuben job toq nik'ol kiwech ri tiko'n;
keri' jun wineq ri maneq runa'oj, kan man ruk'amon ta chi niya'ox ta ruq'ij koma ri winaqi'.
2Kan achi'el k'a ri ti tz'unun ri nirumum pa kaq'iq', o ri ti buqul-sib ri nisumum niq'ax,
xa keri' nuben ri ruk'ayewal, ri xa wineq noyon pa ruwi' jun chik ri xa maneq rumak.
3Ri niq'aton richin ri kiej ja ri ch'ayibel richin,
keri' chuqa' ri bur, ja ri ch'ich' ri niya'ox pa ruchi', jari' ri niq'aton richin,
y chire ri wineq ri xa maneq runa'oj, ja ri xik'a'y ri nukusex richin nich'ay, jari' ri nipaban richin.
4Toq ri wineq ri xa maneq runa'oj, k'o ch'abel ri yerubila' chawe, rat kan man taben chuqa' keri',
man xa tibek'ulun-pe chi rat at junan rik'in rija'.
5Y toq ri wineq ri' k'o nrajo' nuk'utuj chawe, kan taq'alajirisaj k'a chuwech,
roma wi xa man jun yatikir nabij chire, nuch'ob chi rija' xa más runa'oj chawech rat.
6Ri wineq ri k'o nuteq rubixik chike ch'aqa' chik winaqi', y xa jun ri maneq runa'oj ri nuteq-el,
re' kan achi'el xa ta ja ri raqen ri nuchoy-el;
y xa nuya-ri' pa k'ayew.
7Achi'el ri wineq ri k'o sikirik chike ri raqen y maneq kuchuq'a';
keri' nuben jun etamabel-tzij ri xa pa ruchi' jun maneq runa'oj nel-wi-pe.
8Kan man ruk'amon ta chi nixim ri abej ri niya'ox chupan ri ikeq',
keri' chuqa' kan man ruk'amon ta chi ninimirisex ruq'ij jun wineq ri xa maneq runa'oj.
9Kan achi'el jun k'ix ri q'atel pa ruq'a' jun q'abarel,
keri' ri etamabel tzij ri nel-pe pa ruchi' ri wineq ri xa maneq runa'oj.
10Ri wineq ri nuya' rusamaj ri xa maneq runa'oj, o nuya' rusamaj ri xa niq'oran pa bey,
kan junan rik'in ri wineq ri nuk'aqala' ch'ab xabakuchi.
11Ri wineq ri xa maneq runa'oj, ri nitzolin chik chubanik ri itzel taq banobel,
kan junan rik'in ri tz'i' toq nitzolin ri akuchi xxa'a' wi kan, richin niberutija' chik pe ri ruxa'on kan.
12Xa más k'a nichojmir na jun wineq ri xa maneq runa'oj
ke chuwech jun wineq ri nubij chi k'o na'oj rik'in.
Ri rubanobal ri wineq q'or
13Ri wineq ri janila ruq'oral y man nrajo' ta nibe pa samaj, xa nubij:
K'o jun koj ri pa bey, nicha'.
14Kan achi'el k'a rubanik ri ruxaq ri ruchi-jay, nijaqatej y nitz'apetej, y xaxe chiri' nisutin-wi,
keri' k'a rubanik ri wineq q'or, xaxe chiri' pa ruch'at nupiskolila-wi-ri'.
15Ri wineq ri janila q'or nuju-qa ri ruq'a' chupan ri rulaq;
jak'a man nitikir ta chik nuk'uaj ri ruway k'a pa ruchi' roma ri ruq'oral.
16Ri wineq q'or, kan nuch'ob chuqa' chi ja rija' ri más aj-na'oj,
ke chikiwech e wuqu' achi'a' ri kan rik'in na'oj nikik'uluba' ri ruch'abel jun wineq ri k'o nuk'utuj chike.
Toq ri raq' ri wineq nuben etzelal
17Achi'el jun wineq ri nuchop chi ruxikin jun tz'i', ri niq'ax-el keri';
keri' ri wineq ri nuju-apo-ri' pa jun oyowal y xa man rik'in ta rija' ri oyowal ri'.
18Achi'el jun wineq ch'ujirineq ri yeruk'aqala' q'aq', y nima'q y kokoj taq ch'ab ri kik'amon-pe kamik,
19keri' ri wineq ri nuq'ol ri rachibil y nubij chire chi xa netz'an rik'in.
20Toq ri si' xa nik'is-qa, ri q'aq' xa nichup-qa;
keri' nibanatej toq e maneq ye'ukusan y ye'elesan tzij, ri oyowal xa nik'is-qa.
21Toq nik'atzin racheq-q'aq' nukusex carbón, y toq nik'atzin ruxaq q'aq' nukusex si';
keri' ri wineq ri k'iy ch'abel ye'el pa ruchi' richin nutzuk-q'anej royowal.
22Ri ruch'abel jun wineq ri nukusan y nelesan tzij, kan ki-ki' nak'axatej, achi'el jun munil;
y ri ch'abel ri' kan napon k'a chupan ri ránima ri jun chik wineq.
23Kan achi'el jun bojo'y ri banon rik'in ulew y su'un saqipueq chirij,
xa keri' ri wineq ri ruyon jebelej taq ch'abel ri yerubij y ri pa ránima xa ruyon itzel k'o.
24Ri wineq ri xa nretzelaj jun chik, kan jebel nrewaj rik'in ri jebel taq ch'abel ri yerubila' chire,
jak'a ri pa ránima, xa k'o ta nrajo' chi niqaqa pa ruq'a'.
25Y stape' kan janila jebel ok ri tzij ri nubij chawe, rat man tanimaj,
roma ri etzelanik ri k'o rik'in ri wineq ri' kan runojisan ri ránima.
26Ka'i' rupalej nuben, roma stape' kan man nuk'ut ta ri etzelal ri k'o pa ránima;
jak'a ri etzelal ri xtuben chawe, jari' ri xtiq'alajirisan chikiwech ri winaqi'.
27Kan qitzij k'a ri nubij ri tzij: Wi nak'ot jun jul richin pikbel, xa ja rat ri xkatzaq-qa chupan nabey;
y ri wineq ri nuk'ot ruxe' jun abej, xa xtibepiskolitej-pe chirij.
28Ri wineq ri nitz'ukun-tzij man niqa' ta chuwech ri qitzij,
ri wineq ri nubananej chi nich'on rik'in ch'uch'uj taq ch'abel, xa nuk'en-pe wululen.
Currently Selected:
Pro 26: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
