Pro 25
25
Ch'aqa' chik ch'abel richin ri Salomón
1Chuqa' re etamabel-tzij re', kan e richin k'a ri rey Salomón,
y xeq'axex chuwa wuj, koma ri achi'a' ri nima'q kiq'ij, ri e rusamajela' ri Ezequías, ri rey pa Judá.
2Ri nibanon chire ri Dios chi nim ruq'ij, ja ri kan jebel ruyakik rubanon chire ronojel ri man etz'etel ta;
y ri nibanon chire ri rey chi k'o ruq'ij, ja ri nitikir nuya' pa saqil, ronojel ri e ewatel.
3Achi'el ri kan nej-nej k'o-wi-el ri kaj, y ri kan nej-nej k'o-wi-qa ri ruk'u'x re ruwach'ulew;
keri' ri ruch'obonik ri rey, y roj man niqaq'i' ta richin niqach'ob.
4Taya'erisaj ri saqipueq richin chi nawelesaj ri tz'il chupan,
y kan jari' utz chik chi niban jun qumbel rik'in, roma ri samajiy saqipueq.
5Keri' chuqa' toq ri itzel taq samajela' richin ri rey, ye'oqotex-pe,
kan más kow y más choj xtok ri ruq'atoj-tzij rija'.
6Rat, man jun bey taben chi naya-apo aq'ij chuwech ri rey,
ni man jun bey chuqa' taben chi at jun chike ri nima'q kiq'ij, ri ek'o rik'in ri rey.
7Roma kan más utz chi nibix na chawe chi kajote-pe wawe',
ke chuwech niban chawe chi xa maneq ok aq'ij, ri chiri' chikiwech ri nim kiq'ij,
toq xa e atz'eton chik kan kiwech rije'.
8Rat, man jun bey taben chi kan junanin nabebana' ch'a'oj chirij jun wineq,
roma wi k'o jun chik wineq ri napon richin k'o niberuq'alajirisaj chawij rat,
k'ari' man nawil ta chik ri achike naben pa ruq'a' y xa yak'ixbilan chik chuwech.
9Ri oyowal ri achapon rat rik'in ri awachk'uljay, kan rik'in rija' tachojmirisaj-wi,
ri yakel ri chiri' pan awánima, man tabeq'alajirisaj kan chire jun chik wineq.
10Roma rik'in juba' ri xak'axan kan ri tzij awik'in, k'o tzij ri niberuyaka-pe chawij
y ronojel ri nikitzijoj ri winaqi', kan k'ixbel chik chawe rat y man jun chik banel chire.
11Ri ch'abel ri kan pa ruq'ijul yebix-wi, kan janila rejqalen.
Kan achi'el ruwachibel jun manzana ri banon rik'in q'anapueq y chapon rik'in saqipueq.
12Achi'el rejqalen ri ruwi' ixkinaj ri banon rik'in q'anapueq y ronojel ruwech wiqobel ri kan e q'anapueq chuqa',
kan keri' rejqalen ri ruch'abel ri aj-na'oj, chuwech ri jun ri kan nuben ri nrak'axaj.
13Kan achi'el nich'uch'urisan ri pimilej-tew, ri niqaqa toq nik'ol ri kiwech ri tiko'n,
keri' ch'u'ul-ch'u'ul nikina' ri yetaqo-el jun samajel nimey tzij, richin nuk'uaj jun rutzijol,
re' samajel re' kan nukuquba-wi kik'u'x ri e rajaw.
14Achi'el ri sutz' y ri kaq'iq', ri man jun ti job ri kik'amon-pe;
e keri' ri winaqi' ri kan nikibananej chi utz kánima y xa man jun bey nikiya' ta ri nikisuj.
15Wi rat man chi'anin ta yatoyower, kan yatikir naqasaj ruwi' ri royowal ri rey;
ri buyul-buyul taq ch'abel xa kan nitikir chirij jun wineq, stape' kan kow achi'el ri baq.
16Wi rat k'o kab ri nikiya' ri taq chikopi' ri xabewila-pe, kan tatija' k'a;
xaxe man k'iy tatej-qa, roma wi xa nik'o ruwi' ri natej, xa nabexa-pe.
17Kan keri' k'a ri pan ak'aslen, man kan q'ij-q'ij katapon rik'in ri wineq awachk'uljay,
roma wi kan jantape' yatapon rik'in, xa xtik'o ruk'u'x awik'in, y xkaretzelaj-pe.
18Ri wineq xa nok k'a achi'el jun nimalej bajibel, y achi'el espada y achi'el ch'ab,
toq xa tz'ukun taq tzij ri yeruyek-q'anej chirij ri rachpochel.
19Ri wineq ri nukuquba' ruk'u'x rik'in jun q'olonel chupan ri q'ij richin ri ruk'ayewal,
xa junan rik'in ri nrajo' nukusaj ri rey ri xa q'ayineq chik,
o nrajo' nukusaj ri raqen ri xa rujalk'atin ri'.
20Ri bix richin kikoten, ri niya'ox chire jun wineq ri xa nibison ránima
kan achi'el toq jun wineq nuch'il kan rutziaq chirij, y xa janila tew najin,
o naxol ri vinagre rik'in ri bicarbonato.
21Wi ri wineq ri netzelan awichin, ninum, kan tasuju' ruway richin nutej;
y wi ta nichaqi'j ruchi', kan taya' k'a ruya' richin nuqum.
22Roma rik'in jun utzilej banobel keri', ri netzelan awichin xa xtik'ixbitej-qa;
jak'a rat kan xtak'ul rajel-ruk'exel, ri xtuya-pe ri Jehová chawe.
23Ri kaq'iq' ri nipe kere' pa xaman, kan jantape' k'o job nuk'en-pe;
keri' ri wineq, ronojel ri royowal ri man nubij ta rik'in ch'abel, xa ja ri nitzu'un jari' ri niq'alajirisan chi royowal.
24Kan jebel k'a nuben chire ri achin chi stape' rulatz'an-ri' pa jotol chire ri rachoch;
ke chuwech ri k'o ta qa pa jay rik'in ri rixjayil, ri xaxe oyowal ri nuben.
25Kan achi'el nuben ri raxya' chi nuch'uch'urisaj ri chaqi'j ruchi' jun ri q'itajineq,
keri' chuqa' nuben chire jun wineq, ri nuk'ul utzilej taq rutzijol kichin ri k'a janila nej ek'o-wi.
26Kan achi'el chuqa' jun ralaxbal-ya', ri nitukuk ruwech o ralaxbal-ya', ri xa ya' chuw ri k'o chupan;
keri' k'a ri chojmilej wineq, ri xa man kow ta k'o ri ruk'aslen chikiwech ri aj-maki'.
27Kan man utz ta k'a nuben chire jun wineq, chi nutej k'iy kab ri nikiya' ri taq chikopi',
keri' chuqa' jun wineq ri nukanoj k'iy ruwaq'ijaj, xa man utz ta.
28Kan achi'el jun tinamit ri xa e wulutajineq-qa ri tz'aq ri sutiyon-rij,
kan keri' ri wineq ri xa maneq ruchuq'a' richin nuq'et-ri'.
Currently Selected:
Pro 25: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
