Pro 16
16
Ri Jehová rutzuliben ri rubanobal ri wineq
1Kan pa ruch'obonik wi k'a ri wineq nipe-wi ri achike nrajo' nuben;
jak'a richin chi nibanatej ronojel ri', k'a ja na ri Jehová nibin wi nibanatej o ni.
2Ronojel rubeyal k'aslen, kan e ch'ajch'oj yeq'alajin chuwech ri wineq;
jak'a ri Jehová nunik'oj achike roma toq ri ránima ri wineq nucha-el jun chike ri bey.
3Kan pa ruq'a' k'a ri Jehová tajacha-wi ronojel samaj ri nawajo' natikiriba';
richin chi ronojel ri ach'obon chi naben, kan yek'achoj-wi k'a.
4Ronojel k'a ri e ruk'iytisan ri Jehová, kan k'o k'a achike roma e rubanon kan;
kan jajun ri wineq itzel, ruya'on q'ij chi k'o, richin ri q'ij ri richin ri ruk'ayewal.
5Konojel ri winaqi' ri nikinimirisaj-ki', kan itzel yerutz'et ri Jehová;
y kan qitzij wi chi man xkek'oje' ta kan choj keri', xa kan xtikik'ul rutojbalil.
6Ri wineq ri kan qitzij nutzeqelibej ri Dios y man numalij ta kan, kan xtikuyutej rumak,
y wi kan xtunimaj rutzij ri Dios, man jun itzel xtuk'uluwachij.
7Toq ri rubanobal ri wineq kan niqa' chuwech ri Jehová,
kan e jajun chuqa' ri winaqi' ri ye'etzelan richin, nisiliso-qa ri koyowal chirij.
8Más utz xa juba' ok ri nik'oje' pa ruq'a' ri wineq y rik'in ruchojmilal ruch'akon-wi;
y mani beneq pa jotol rik'in ronojel ri nuch'ek, y xa nutz'oq chuwi-kiq'a' ri winaqi'.
9Ri runojibal ri wineq kan nisamej-wi chuch'obik ri rubeyal ri k'aslen,
jak'a ri ruxaka'l ri xtuya', k'a ja na ri Jehová xtik'utu chuwech akuchi nuk'uaj-wi
10Ri ch'abel ri nubij ri rey, kan e pixa' ri kan k'o chi yebanatej;
kan ja ri ch'abel ri nik'atzin chi nubij, kan jari' ri yerukusaj toq niq'aton-tzij.
11Ri q'atbel-tzij richin ri Jehová kan tz'aqet-tz'aqet, kan achi'el ri pajbel y ri etabel,
kan ja rija' k'a ri xtz'ukun-pe ri tz'aqet pajbel y ri tz'aqet etabel.
Ri na'oj achi'el alaxibel-ya' ri nuya' k'aslen
12Kan man ruk'amon ta chire jun rey chi yerubanala' itzel taq banobel;
roma kan richin chi k'o ruchojmilal toq k'o ri rey ri chiri' pa rutz'uyubal.
13Kan nuya' wi k'a kikoten pa kánima ri achi'a' e rey, toq pa ruchojmilal yech'on ri winaqi';
y ri kan ruyon qitzij ri nubij kan najowex-wi koma rije'.
14Toq kan royowal ri rey, jari' ri nibin chi kan k'o-wi ri xtuteq pa kamik ri q'ij ri';
jak'a ri wineq ri kan k'o runa'oj, nitikir nuben chi niqaqa ruwi' ri royowal ri rey.
15Toq ri rey kan nikikot y nitze'en ruwech, kan man jun k'a xtrelesaj ruk'aslen;
y ri utzil ri xtuya' pa kiwi' ri winaqi', kan xtiqaqa k'a achi'el nuben ri job toq pa ruq'ijul niqaqa.
16Kan más k'a utz chi ri wineq nril na'oj, ke chuwech nril q'anapueq;
y xa más utz chuqa' toq k'o utzilej ch'obonik rik'in, ke chuwech ri k'o ta saqipueq rik'in.
17Ri rubeyal ri ruk'aslen ri chojmilej wineq, kan nuch'er-ri' chire ri rubeyal ri itzel k'aslen;
ri kan nuchajij k'a ri ruk'aslen, kan nutzu' k'a jebel ri bey ri nuk'uaj.
18Nabey ja ri nimirisanen ri nipe pa ruk'aslen ri wineq, y k'ari' nuben chire chi nibe pa xulan;
kan roma k'a ri nunimirisaj-ri', roma ri' toq ri ruk'aslen ri wineq nitzaq.
19Kan más k'a rejqalen chi nuqasaj-ri' ri wineq y junan rubanik kik'in ri man jun k'o kik'in;
ke chuwech nril-apo janila chi méro kik'in ri winaqi' ri xa kimajon-pe chuwi-kiq'a' ch'aqa' chik winaqi'.
20Ri wineq ri kan nuch'ob rij jebel ri achike ri nuben, kan nibe-wi pa jotol;
jak'a ri wineq ri kan nroyobej ruto'onik ri Jehová, kan nril-wi urtisanik.
21Ri winaqi' kan niketamaj k'a ruwech ri kan aj-na'oj-wi, roma kan nuch'ob na jebel ri achike nuben;
y ri ruki'il ri ch'abel ri ye'el pa ruchi', kan yeruch'ek más winaqi'.
22Ri na'oj, kan ja wi ri' ri niya'on ruk'aslen ri wineq ri aj-na'oj;
jak'a wi natejtobej natijoj jun ri xa maneq runa'oj, xa man jun rejqalen.
23Ri ránima ri wineq aj-na'oj, kan nuben chire chi rik'in etamabel nich'on;
y jari' chuqa' nibanon chire chi ri rutzil ri ruch'abel, kan q'ij-q'ij más utz.
24Roma ri' ri ruki'il ri ruch'abel, kan junan ruki'il rik'in ri kab ri nikiya' ri taq chikopi';
kan nuya' ruki'il ri k'aslen y nuya' raxnaqil chire ri ch'akulaj.
Kan ja ri utz tubana' ri wineq
25Kan k'o-wi k'a bey ri choj niq'alajin chuwech ri wineq;
jak'a ri pa ruk'isibel nibeq'alajin-pe chi xa bey richin kamik.
26Ri wayjal jari' ri nibanon chire ri wineq chi k'o chi nisamej kow;
roma ri wineq kan nrajo' k'a chi k'o ri nutej toq ninum-pe.
27Ri nowineq chubanik etzelal, nich'oboch'ot k'a richin achike etzelal niberubana';
y ri tzij ri nuben kan niporon achi'el ruxaq-q'aq'.
28Ri wineq ri nukusan y nelesan tzij, xa nutik k'a oyowal;
y ri kamuluy-tzij kan nitikir yeruch'er ri kan kachibil-ki'
29Jun wineq ri ruyon itzel yerubanala', yeruq'ol ri rachpochel;
kan nuben chike chi nikichop-el jun bey man utz ta.
30Ri wineq ri nuben retal rik'in ri runaq'-ruwech chire ri rachibil, xa achike na chi etzelal ri nrajo' nuben,
y keri' chuqa' ri yerubanala' retal rik'in ri ruchi'.
31Ri corona ri más rejqalen, ja ri nisaqir-pe ri rusumal-ruwi' jun wineq toq nukochij k'iy rujuna';
jare' k'a ri nuch'ek roma ri chojmilej k'aslen ri xuk'uaj.
32Kan janila k'a rejqalen chi ri wineq nuq'et-ri' chire ri royowal, ke chuwech nuk'ut chi man nuxibij ta ri';
y chuqa' kan más jebel nich'akon chirij ri royowal, ke chuwech ri nuch'ek ta jun tinamit.
33Ri wineq xaxe k'a nuk'eq-apo ruwech chirij ri nurayij, xa achi'el rubanik jun sakinik;
y ja ri Jehová ri xtibin wi nuya' o man nuya' ta ri nurayij.
Currently Selected:
Pro 16: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
