Pro 17
17
K'o na'oj utz y k'o man utz ta
1Xa más jebel chi ri wineq xa chaqwey ri nutej, xaxe wi rik'in kikoten;
ke chuwech ek'o jebelej taq rukil y xaxe oyowal pa jay.
2Ri samajel aj-na'oj, jari' xtiyuqen richin ri ruk'ajol ri rajaw, wi man choj ta nich'obon ri ala';
y roma ri' re samajel re' xtichinan junan kik'in ri alk'ualaxela'.
3Richin chi nitz'et wi utz ri saqipueq, niya'erisex pa jun bojo'y y ri q'anapueq niya'ox pan horno;
jak'a richin nitz'et wi ch'ajch'oj ránima ri wineq, kan ja ri Jehová ri nitejtoben.
4Ri winaqi' ri kan e itzel, kan nikiya' kixikin chike ri kan e itzel chuqa';
y ri winaqi' ri kan e tz'ukuy-tzij, kan yeniman chuqa' chike ri e tz'ukuy-tzij.
5Ri xa nutze'ej ri wineq ri man jun k'o rik'in, xa chirij k'a ri xk'iytisan richin nitze'en-wi;
roma ri xa nitze'en chirij ri ruk'ayewal, xa kan xtapon k'a chupan ri ruk'ayewal ri'.
6Ri ruwaq'ijaj kichin ri winaqi' ri kan k'o chik kijuna', jari' e kiy-kimam;
y ri ruwaq'ijaj kichin ri alk'ualaxela' kan ja ri kite-kitata'.
7Man jun wineq ri kan yerukanola' ta jebel taq ch'abel, richin nich'on rik'in ri xa maneq runa'oj;
y kan keri' chuqa' man ruk'amon ta chi niban-apo ch'owen chire jun tata'al rik'in tz'ukun taq tzij.
8Ek'o winaqi' nikinimaj chi ri yepuaqin kan achi'el jun ti abej ri tzeqel chikiqul richin yeruto' chupan ri kik'aslen;
y nikich'ob chi xabakuchi yebe-wi kan yeruto' richin nikiben ri achike nikajo'.
9Jun ri kan nukuy rumak ri jun chik, kan q'alaj chi nukanoj jun qitzij rachibil;
jak'a ri xa nuchop rutzijoxik ri etzelal ri xban chire, ri rachibil xa xtibe.
10Jun wineq ri kan k'o retamabal, xaxe rik'in nich'olix jun bey nretamaj;
jak'a ri wineq ri xa maneq runa'oj, stape' janila k'iy mul nich'ay man nretamaj ta.
11Jun wineq ri kan nupaba-ri' richin man nuben ta ri nibix chire, xa etzelal ri nroyoj chirij;
y roma ri' richin chi nretamaj ri rutzijol ri niya'ox chire, xa jun itzel achin ri nitaq-pe rik'in
12Más utz juba' nabek'ulu-pe jun ixoq oso, ri yakatajineq royowal roma ri e elesan-el ri taq ral chuwech;
ke chuwech nabek'ulu-pe jun wineq ri xa maneq runa'oj, y xa ch'abel ri ch'obon man ch'obon yerubila'.
Ri rejqalen ri wineq ri k'o na'oj rik'in
13Ri wineq ri xa itzel ruk'exel nutzolij chire ri jun chik wineq ri k'o utz ri nuben chire;
ri pa rachoch ri nibanon itzel, kan man jun bey xke'uxlan ta juba' pa ruq'a' ri etzelal.
14Kan achi'el jun raqen-ya' ri nijaqatej-el, keri' ri oyowal ri nitz'ukutej-el;
más utz yatanimej-el chuwech ri oyowal ri' y mani naju-awi' chupan.
15Ek'o yebanon chi ri aj-mak choj rubanobal nikiben chire y ri maneq rumak nikiben aj-mak chire;
chi ka'i' banobel re' kan itzel k'a nitz'et roma ri Jehová.
16¿Kan k'o kami nik'atzin-wi ri méro ri napon pa ruq'a' jun wineq ri xa maneq runa'oj?
¿Kan nukusaj kami ri méro ri' richin nuloq' retamabal, stape' maneq runa'oj?
17Ri wineq ri kan qitzij achibil, kan nrajo-wi ri rachibil stape' k'o pa rutzil o ruk'ayewal;
jun ach'alalri'il xalex chuwech re ruwach'ulew richin chi nuto' ri rach'alal toq napon pa ruk'ayewal.
18Xaxe jun achin ri man nich'obon ta jebel, ri nusuj-ri' richin nuto' xabachike wineq;
y kan nupaba-ri' chuwech jun k'as ri nuben jun rachibil rik'in jun chik wineq.
19Ri wineq ri niqa' chuwech yerubila' ch'abel chikij ri winaqi', xa oyowal nukanoj;
ri xa ruyon nunimirisaj-ri' xa kan ruyon rija' ri nukanoj ri wululen pa ruwi'.
20Ri wineq ri kan ruyon itzel taq ch'obonik ek'o pa ránima, kan man kikoten ta xtik'oje';
y ri wineq ri k'o jun raq' ri kan xaxe richin yerubila' ch'abel ri man e ruk'amon ta, k'ayew ri xkeruk'uluwachila'.
21Ri wineq ri nalk'ualan jun ak'ual ri xa maneq runa'oj, kan junan rik'in nralk'ualaj ta ri q'axo'n;
man jun tata'aj ri nikikot ta roma k'o jun ralk'ual ri xa man nrajo' ta chi nitijox.
22Chire ri wineq nuk'en-pe raxnaqil, toq ri ránima kan nikikot;
jak'a ri wineq ri xa nibison ránima, xa jari' ri nikamisan-el richin.
23Ri itzel q'atoy-tzij, kan yeruk'ul kan ri sipanik ri nikiya' kan ri winaqi' pa ruq'a';
y xa roma ri' toq rija' nujel rubanik ri ruq'atbal-tzij.
24Ri wineq ri kan k'o retamabal man nisach ta ruk'u'x chupan ronojel ri nuben;
jak'a ri maneq runa'oj xa nisach chupan ronojel.
25Ri niya'on q'axo'n pa ránima jun tata'aj, ja ri alk'ualaxel ri man nunimaj ta tzij;
y re' nuk'en chuqa' pe jun k'ayilej-k'aslen chire ri te'ej.
26Kan itzel wi k'a chi yebilox itzel ch'abel chike ri kan choj ri kik'aslen;
y kan man utz ta chuqa' chi yech'ay ri k'o kiq'ij y kan tz'aqet ri kik'aslen.
27Ri wineq ri man jantape' ta niwolol, retaman jampe' toq utz nich'on y jampe' toq man utz ta nich'on;
roma ri wineq ri ch'uch'uj ránima, xa kan xaxe ri ch'abel ri nik'atzin jari' ri nubij.
28Kan jajun ri wineq ri maneq runa'oj, niq'alajin chi aj-na'oj, xaxe rik'in ri man niwolol ta q'anej;
y ri wineq ri nutz'apej ruchi' richin man yerubij ch'abel ri bilon man bilon, kan niq'alajin chi k'o retamabal.
Currently Selected:
Pro 17: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
