Pro 15
15
Ri nuk'en-pe toq jun wineq nuqasaj-ri'
1Ri ch'uch'uj taq ch'abel kan nuben chi ri oyowal nik'is-el;
jak'a ri poqon taq ch'abel xa nuben chi ri oyowal nibenimer-pe.
2Ri raq' ri chojmilej wineq, kan jebel k'a rubixik nuben chire ri etamabel;
jak'a ri ruchi' ri xa maneq runa'oj, kan nuchololej ch'abel ri xa maneq rejqalen.
3Ri rutzubal ri Jehová, xabakuchi k'a napon-wi;
ri runaq' taq ruwech kan ek'o k'a pa kiwi' ri utzilej y ri itzelej taq banobel.
4Ri utzilej taq ch'abel ri kan ye'aq'oman, e junan rik'in ri che' ri niya'on k'aslen;
jak'a ri itzel taq ch'abel ri richin nikiben etzelal, nuya' pa q'axo'n ri wineq.
5Ri wineq ri xa maneq runa'oj nrixowaj ri rupixabanik ri rutata';
jak'a ri kan nuben ronojel ri ruchojmilal ri nibix chire, kan k'o-wi runa'oj.
6Pa rachoch jun wineq ri kan choj ruk'aslen, ronojel pa ruk'iyal k'o;
jak'a ri nikich'ek ri winaqi' ri e itzel, xa ruk'ayewal ri nuk'en-pe chike.
7Ri ruchi' ri wineq ri kan k'o runa'oj, kan nutaluj k'a rubixik ri na'oj;
jak'a ri winaqi' e itzel, ri nikitaluj rubixik, xa ja ri man choj ta.
8Ri Jehová kan nrixowaj k'a ri nisipex chire roma ri wineq itzel;
jak'a ri ch'owen ri nuben ri choj ruk'aslen, kan nikikot rik'in.
9Kan netzelex-wi roma ri Jehová, ri rubanobal ri wineq itzel;
jak'a ri winaqi' ri kan nikitzeqelibej ri chojmilej k'aslen, rija' janila yerajo'
10Kan jun poqon ch'olinik k'a niya'ox chire ri wineq ri nuya' kan ri qitzij bey;
y ri kan itzel nuna' chire ri pixabanik niban chire, xtiberila-pe ri kamik.
11Ri akuchi yemuq-wi ri kaminaqi' y ri akuchi ye'apon-wi chuqa', kan tik'il k'a pa ruwech ri Jehová.
y más kan pa ruwech rija' ek'o-wi, ronojel ri k'o pa taq kánima konojel ri winaqi'.
12Ri wineq ri kan man nuch'ob ta ri yerubij, man nrajo' ta ri nipixaban richin;
y kan man napon ta rik'in jun aj-na'oj, richin chi nuk'utuj ta runa'oj chire.
Ri wineq ri nikikot ránima
13Ri nikikot ránima ri wineq, jari' ri nibanon chire chi kan nitze'en ruwech;
jak'a ri xa niq'axon ránima, jari' ri nibanon chire chi rukajman nitzu'un.
14Ri ránima ri wineq aj-na'oj, kan nukanoj k'a etamabel;
jak'a ri ruchi' ri wineq ri xa maneq runa'oj, xa ja ri ch'abel ri maneq kejqalen ri nuya' kuchuq'a'.
15Ronojel q'ij richin ri ruk'aslen ri k'ayewatajineq man kan ta utz;
jak'a ri wineq ri kan nikikot ránima, kan jantape' nimaq'ij chuwech.
16Kan más wi utz chi xa juba' ok ri k'o rik'in jun wineq y k'o rukiy ri Dios chuwech;
y mani janila chi beyomel y xa maneq rutzil ri k'aslen.
17Más ruki'il ri ichaj, ri nitij chikikojol ri k'o ajowabel kik'in;
y mani ti'ij q'en-q'en y xa nitij kik'in ri k'o oyowal chikikojol.
18Ri wineq ri kan richin wi chi niyakatej royowal, xa nuyek oyowal chikikojol ri winaqi';
jak'a ri wineq ri kan ch'uch'uj ránima, kan nuqasaj ruwi' oyowal.
19Ri bey richin ri ruk'aslen ri wineq q'or, xa nojineq chi k'ix nutzu' rija';
jak'a ri rubey ruk'aslen ri wineq choj ruk'aslen, man jun achike ta ruk'ayewal.
20Jun alk'ualaxel ri kan k'o runa'oj, kan nuya' kikoten chire ri rutata';
jak'a ri alk'ualaxel ri xa maneq runa'oj, xa nrixowaj ri rute'.
Ri wineq ri k'o na'oj rik'in
21Chuwech ri wineq ri xa man jun retaman, ri ch'abel ri xa maneq kejqalen jari' ri kikoten;
jak'a ri achin ri kan k'o retamabal, kan nuch'ob jebel ri achike ri nrajo' nuben.
22Ri akuchi e maneq winaqi' ri yeya'on ta utzilej taq na'oj, ri samaj xa man yebanatej ta;
jak'a ri akuchi ek'o winaqi' yeya'on utzilej taq na'oj, ri samaj ri e ch'obon kan yebanatej-wi.
23Kan nikikot wi k'a ránima ri wineq toq yerubij ri utzilej taq ch'abel chike ri yek'uluben richin;
kan yalan wi jebel toq kan chupan ri ramaj toq nik'atzin, jari' toq napon ri na'oj.
24Ri bey ri richin ri k'aslen, kan nuben chire ri wineq aj-na'oj chi nibe pa jotol;
kan nuben chuqa' chire chi tijel-el nej chire ri jul richin kamineq, ri xa pa xulan k'o-wi.
25Ri Jehová kan nuwulaj ri rachoch ri wineq ri kan nim nuna-ri';
jak'a kan nuchajij jebel ri richinan kan ri malka'n-ixoq.
26Ri Jehová kan yeretzelaj k'a ri itzel y ri tz'il taq ruch'obonik ri wineq itzel;
jak'a ri ruch'abel ri wineq ch'ajch'oj ránima, kan e ch'ajch'oj chuwech rija'.
27Kan nuk'en-wi-pe ruk'ayewal pa jay, toq jun wineq man utz ta ri akuchi nipe-wi ri ruch'akoj;
jak'a ri wineq ri kan man nrajo' ta chi nipuaqix, kan kikoten xtik'ase'.
28Ri ránima ri wineq ri choj ruk'aslen, kan nuch'ob na jebel ri nubij chire ri nik'uluben richin;
jak'a ri pa ruchi' ri wineq itzel, kan yecholol ye'el-pe ri itzel taq ch'abel.
29Ri Jehová man yeruk'ul ta ri winaqi' ri e banoy richin ri etzelal;
jak'a ri ruch'owen ri wineq ri choj ruk'aslen, kan nrak'axaj k'a.
30Ri kikoten nitzu'un ri runaq' taq ruwech jun wineq, kan nuk'en-pe kikoten chire jun chik;
y ri utzilej taq rutzijol kan nuk'en-pe raxnaqil chire ri rubaqil ri wineq.
31Ri wineq ri kan nukusaj ri ruxikin, richin kan nrak'axaj ri pixabanik richin k'aslen,
kan xtok aj-na'oj y kan xtik'oje' k'a ri akuchi k'o-wi ri na'oj.
32Ri wineq ri kan man jun ruq'ij ri tijonik chuwech, kan nretzelaj-wi ri ruk'aslen;
jak'a ri kan niqa' chuwech ri tijonik, nuch'ek k'a na'oj.
33Ri rukiy ri Jehová chuwech ri wineq, kan jari' ri nik'utun ri na'oj chuwech;
roma ri wineq k'o chi nuqasaj-ri' chuwech ri Dios nabey, richin nik'oje' ruq'ij.
Currently Selected:
Pro 15: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
