Pro 14
14
Ri rubanik ri wineq toq k'o runa'oj
1Jun ixoq aj-na'oj kan nitikir-wi nuben chi kow yek'oje' ri aj pa rachoch;
jak'a ri xa maneq runa'oj, xa ja rija' yetalun-el kichin.
2Jun ri kan nuben ri nibix chire roma ri Dios, kan choj k'a ri rubey ri ruk'aslen;
jak'a ri wineq ri xa xotoxik ri rubanobal, rik'in ri' nuk'ut chi nretzelaj ri Dios.
3Ri ruch'abel ri wineq ri xa maneq runa'oj, xa ch'ayikil rik'in che' nroyoj chirij;
jak'a ri ch'abel ri yerubij ri ruchi' ri wineq k'o na'oj rik'in, jari' ri nichajin richin.
4Ri akuchi e maneq bóyix richin ri samaj, maneq trigo;
jak'a ri akuchi ek'o bóyix richin ri samaj, kan jebel k'a ch'akoj nuk'en-pe chire ri rajaw.
5Jun wineq ri niq'alajirisan ri achike xk'uluwachitej y man jun nrewaj, kan man nutz'uk ta ri nubij;
jak'a ri wineq ri xa man qitzij ta ri nrajo' nuq'alajirisaj, xa ruyon e tz'ukun ri tzij ri yerubila'.
6Ri wineq ri xa niyojoben, kan man xtril ta ri na'oj;
jak'a ri wineq ri kan nowineq, kan chi'anin k'a nuq'i-q'anej ri etamabel.
7Tajech'ej-el-awi' chire ri wineq ri xa maneq runa'oj,
roma wi xa xkak'oje' kan rik'in, man jun bey xtawak'axaj ta ri etamabel.
8Kan q'alaj wi k'a toq ri wineq k'o runa'oj, roma kan jebel nuchajij-ri' chire ri rubanobal;
jak'a ri maneq runa'oj y roma ri' ch'obon man ch'obon nuben, xa ruyon k'a nuq'ol ri'.
9Chikikojol ri maneq kina'oj, xa yetze'en chikij ri nikik'utuj kuyubel kimak toq yemakun;
jak'a chikikojol ri choj kik'aslen, kan janila jebel ri kánima.
10Ri ránima ri wineq kan retaman k'a ri q'axo'n ri k'o rik'in;
y chuqa' toq k'o kikoten rik'in, kan xaxe rija' ri nina'o.
11Ri rachoch ri wineq itzel rubanobal, kan xtimes-el achi'el q'ayis,
jak'a ri rachoch ri wineq ri kan choj ruk'aslen, kan xtiqaqa urtisanik pa ruwi'.
12Kan k'o-wi k'a bey ri choj niq'alajin chuwech ri wineq;
jak'a ri pa ruk'isibel nibeq'alajin-pe chi xa bey richin kamik.
13Ri wineq stape' kan nitze'en ruwech, ri pa ránima xa nutej poqon;
y xaxe nitane-qa chi tze'en, kan jari' noqaqa chik ri bis rik'in.
14Ronojel k'a ri nutik-qa ri wineq kan xtuwachij-wi;
kan xtuwachij k'a stape' ja ri utz o ri man utz ta.
15Ri wineq ri maneq runa'oj, kan nunimaj ronojel ri nrak'axaj,
jak'a ri kan nowineq, nuch'ob na rij jebel ri achike nuben.
16Ri wineq ri k'o na'oj rik'in, kan nuxibij-ri' chuwech ri Dios y man nutzeqelibej ta ri itzel bey;
jak'a ri xa maneq runa'oj xa choj beneq y nim nuna-ri'.
17Ri wineq ri kan chi'anin nipe royowal, kan nuk'ut chi maneq runa'oj,
y ri wineq ri kan k'o nutz'oq chuwi-kiq'a' ri winaqi' rik'in q'oloj xa xtetzelex.
18Ri nrichinaj kan ri wineq ri xa maneq runa'oj, ja ri man nitikir ta nich'obon chi utzil;
jak'a ri e nowineq nikichinaj kan ri etamabel.
19Kan napon k'a ri q'ij toq ri winaqi' ri e itzel, kan xtikiya' kiq'ij ri e utz,
y chuqa' ri winaqi' ri man e choj ta, xa xke'apon chuchi' rachoch ri choj ruk'aslen chuk'utuxik utzil.
20Ri wineq ri kan man jun ok k'o rik'in, kan itzel nitz'et koma ri e rachk'uljay;
jak'a ri beyom kan utz nitz'et koma konojel.
21Ri wineq ri kan nrixowaj ri rachk'uljay, kan mak wi ri nuben;
jak'a ri wineq ri kan nujoyowaj ruwech ri man jun k'o rik'in, jebel ruwa-ruq'ij.
22Kan qitzij wi chi ri winaqi' ri ruyon itzel taq ch'obonik k'o kik'in, xa e sachineq;
jak'a ri k'o utzilej ch'obonik kik'in, kan nikil ri utz y nikil ri sujun chike.
23Ronojel tijoj ruq'ijul ri nuben ri wineq, kan k'o-wi ri nuk'en-pe;
jak'a ri wineq ri xaxe tzij ri nuben, xa pa meba'il nuk'uaj-wi.
24Ronojel ri nikil ri winaqi' aj-na'oj, kan ja wi ri kina'oj niya'on chike;
jak'a ri nikil ri maneq kina'oj, kan roma ri maneq kina'oj roma ri' jari' ri nikik'ul.
25Kan yerukol-wi k'aslen jun wineq, ri kan nuq'alajirisaj ri qitzij chuwech ri q'atoy-tzij;
jak'a ri xa tz'ukuj taq tzij yerubij, xa yerunim kan chuxe' ri ch'a'oj.
26Ri wineq ri kan k'o rukiy ri Dios chuwech, kan xtril-wi ruchuq'a';
y ri ralk'ual rija' kan xtikil-wi ri chajinik richin ri Dios.
27Ri akuchi nalex-wi-pe ri k'aslen, ja ri akuchi kan k'o rukiy ri Dios;
y re' chuqa' kan nukol ri wineq chuwech ri pikbel ri kan ruk'amon-pe kamik.
28Toq janila e k'iy winaqi' ek'o chuxe' ruq'a-raqen ri rey, nuben chire chi kan nim ruq'ij;
y toq xa e juba' ok ri ek'o chuxe' ruq'a-raqen, xa nibe pa xulan.
29Jun wineq ri man chi'anin ta nipe royowal, kan k'o-wi nim etamabel rik'in;
jak'a ri xa chi'anin nijalajo' chuwech, xa niq'alajin chi maneq runa'oj.
30Kan nuya' k'aslen chire ri ch'akulaj, toq ri ránima ri wineq kan utz;
jak'a toq k'o ch'upun-k'u'x pa ránima, xa nuya' ruyabil ri rubaqil.
31Ri kan nutz'ila' ri xa man jun k'o rik'in, kan nuyoq' ri Dios ri banayon richin;
jak'a ri kan utz runa'oj nuben kik'in ri k'o nik'atzin chike, kan nuya' ruq'ij-ruk'ojlen ri Dios.
32Toq kan noqaqa k'a ri ruk'ayewal, ri wineq itzel xa man xtikowin ta pa ruq'a';
jak'a ri choj ruk'aslen, stape' k'o chik chuwech ri kamik, kan k'o ri akuchi nuto-ri'.
33Kan pa ránima k'a ri wineq jebel runojibal chiri' k'o-wi ri na'oj;
jak'a ri winaqi' ri xa maneq kina'oj, man ketaman ta achike ri' ri na'oj.
34Ri chojmilej k'aslen kan nuben k'a chike ri winaqi' richin jun ruwach'ulew chi k'o kiq'ij;
jak'a ri mak xa jun k'ixbel chike ri winaqi' richin jun ruwach'ulew.
35Jun rey kan nuya' k'a rajel ruk'exel chire ri rusamajel ri ninojin jebel;
jak'a chire ri rusamajel ri xa k'ixbel taq banobel yerubanala', xa ruk'ayewal nuya' chire.
Currently Selected:
Pro 14: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
