Pro 13
13
1Ri alk'ualaxel ri kan k'o runa'oj, kan niqa' chuwech chi nitijox roma ri rutata'.
jak'a ri alk'ualaxel ri kan nunimirisaj-ri' man nrak'axaj ta ni rik'in ch'olinik.
2Toq niwachin jebel ri kich'abel ri choj kik'aslen, jari' nok achi'el kiway;
jak'a ri winaqi' ri kan nikiq'ej ri kitzij, ri nok achi'el kiway ja ri oyowal.
3Ri wineq kan nuchajij k'a ri ruk'aslen, rik'in nuchajij ri ruchi';
jak'a ri bilon man bilon ri yerubila', ja rija' k'a nikanon ri nipe chirij.
4Ri wineq janila q'or xaxe choj nurayij y man jun nuben, roma ri' man jun nril pa ruk'aslen;
jak'a ri wineq ri kan k'o nurayij y kan kow nisamej, nibe pa jotol.
5Ri wineq ri choj ruk'aslen man utz ta nuna' chire ri tz'ukun taq tzij,
jak'a ri banoy richin etzelal, nuq'abaj tzij y nuya' kik'ix ri winaqi'.
6Ri chojmilej k'aslen, jari' ri nito'on richin ri wineq ri kan tz'aqet ruk'aslen,
jak'a ri itzel taq banobel, jari' ri nibanon chi nitzaq ri aj-mak.
Ri beyomel y ri meba'il
7Ek'o winaqi' ri kan nikibananej chi e beyoma' y xa man jun k'o kik'in;
y ek'o ch'aqa' chik nikiben chi man jun k'o kik'in y xa nimalej taq beyomel kiyakon.
8Ri wineq beyom, rik'in ri rubeyomel nukol ri ruk'aslen pa kiq'a' ri winaqi';
jak'a ri wineq ri man jun k'o rik'in, man jun ninaqo richin.
9Kan niyik'lun wi k'a achi'el jun saqil, ri rubanik ri ruk'aslen ri choj ruk'aslen;
jak'a ri kik'aslen ri winaqi' e itzel, xa achi'el jun saqil ri beneq ruchupnen.
10Ri nimirisanenri'il, jari' ri nibanon chi k'o oyowal,
jak'a kik'in ri kan nikak'axaj ri pixabanik, kan k'o na'oj.
11Ri man utzilej beyomel ta ri nuben jun wineq, xa nik'is;
jak'a ri beyomel ri nuben ri wineq rik'in ruchuq'a' ri ruq'a' rija', ninimer chuwech.
Ri koyoben ri winaqi' choj kik'aslen
12Toq xa man nibanatej ta ri royoben-apo jun wineq, xa nuya' q'axo'n pa ránima;
jak'a toq kan niq'ajer ri rurayibel, kan nok achi'el ri che' ri nuya' k'aslen.
13Ri wineq ri man nrajo' ta nuben ri nibix chire chi tubana', xa kan chirij rija' niqaqa-wi ri ruk'ayewal;
jak'a ri wineq ri kan nimey tzij, kan ronojel k'a utz ri nuk'en-pe chire.
14Ri ralaxbal ri k'aslen nilitej k'a chupan ri tijonik richin ri aj-na'oj;
y kan man nuya' ta q'ij richin chi nitzaq jun wineq pa pikbel richin kamik.
15Ri wineq ri janila jebel runa'oj, kan nril-wi utzil;
jak'a ri kan rujachon-ri' chubanik etzelal, xa pa ruk'ayewal beneq-wi.
16Xabachike achin ri kan nowineq, kan jebel nuch'ob ri nuben;
jak'a ri wineq ri maneq runa'oj, kan nuq'alajirisaj ri rubanik.
17Toq jun uk'uey rutzijol xa banoy richin etzelal, xa man ja ta rubanik ri niberubij;
jak'a toq nitaq-el jun ri kan nuben ri nibix-el chire, kan nukanoj achike rubixik nuben chire.
18Meba'il y k'ixbilal k'a nuk'en-pe chire ri wineq ri xa man nrajo' ta pixabanik;
jak'a ri wineq ri kan nuk'ul ri ch'olinik ri niban chire, kan niya'ox-wi ruq'ij.
19Kan jebel k'a nuna' ri ránima ri wineq toq kan nibanatej k'a ri rurayiben;
jak'a ri xa man yech'obon ta jebel, kan man nikajo' ta ye'el-pe chupan ri itzel k'aslen.
20Ri wineq kan nok k'a aj-na'oj, toq kan ja ri aj-na'oj yerachibilaj;
y wi xa yerachibilaj ri xa maneq ok kina'oj, nuq'axaj k'a ruk'ayewal.
21Ri winaqi' e aj-maki' kan maneq k'a juba' uxlanen ri nikil pa ruq'a' ri etzelal;
jak'a ri winaqi' ri kan choj ri kik'aslen, kan k'o k'a utz ri nikil pa kik'aslen.
22Ri wineq ri kan utz, kan k'o k'a ri nuya' kan richin nikichinaj kan ri e riy-rumam;
jak'a ri beyomel ri nuya' kan ri wineq aj-mak, kan niyake' kan, richin chi ja ri choj kik'aslen ri ye'ichinan.
23Ri joxjik rulew ri maneq ok k'o rik'in, kan nuya' ri nik'atzin chire richin nik'ase';
jak'a ri xa man choj ta ri nuben chuwech ri Dios, xa niken-el roma ri rubanobal.
24Ri man nrajo' ta nukusaj ri xik'a'y richin nuch'ey ri ralk'ual, xa man nrajo' ta k'a;
jak'a ri tata'aj ri kan nrajo' ri ralk'ual, kan nucha' ruk'u'x richin nutijoj jebel.
25Ri wineq ri choj ruk'aslen kan niwa' richin chi nik'o-el ri ruwayjal;
jak'a ri wineq itzel, niwa' y xa man nitz'aqet ta ri ruwa'in.
Currently Selected:
Pro 13: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
