Pro 12
12
1Xabachike k'a wineq ri utz nuna' nitijox, kan utz k'a nuna' chire ri etamabel;
jak'a ri xa itzel nuna' chire ri ch'olinik, xa maneq runa'oj.
2Ri wineq utz, kan k'o utzil ri nril rik'in ri Dios;
jak'a ri wineq ri ruyon etzelal k'o pa ruk'aslen, xa ruk'ayewal niya'ox chire roma ri Dios.
3Ri wineq ri kan nujech-ri' chubanik etzelal, man k'ayew ta richin nelesex-el;
jak'a ri kan choj-wi kik'aslen, ruk'amon-qa kixe', roma ri' man jun bey xke'elesex-el.
4Ri ixoq ri kan ja ri pa ránima nipe-wi richin nuben utz, nunimirisaj k'a ruq'ij ri rachijil;
jak'a ri ixoq ri xa ruyon man utz ta ek'o pa ránima, xa nuya' ruyabil ri rubaqil ri rachijil.
5Ri ruch'obonik ri wineq ri choj ruk'aslen, kan ja ri nuben utz chikiwech ri ch'aqa' chik winaqi';
jak'a ri wineq ri kan itzel ruk'aslen, xaxe k'a nuch'ob achike rubanik nuben richin yeruq'ol ri winaqi'.
6Ri tzij ri k'o pa kichi' ri winaqi' itzel kik'aslen, xaxe richin kamisanik;
jak'a ri kich'abel ri winaqi' ri e utz, kan richin nikolon chuwech ri kamik.
7Ri winaqi' ri e itzel, xa jumul xkek'is-el;
jak'a konojel ri kan choj kik'aslen, kan k'a yek'oje' na kan.
8Kan achi'el k'a rubanik ri na'oj ri k'o rik'in ri wineq, kan ja chuqa' ri' rubanik ri ruq'ij ri xtuk'ul;
jak'a ri wineq ri itzel nich'obon, xa netzelex koma ri ch'aqa' chik winaqi'.
Ri wineq ri nuchajij-ri' rik'in ri ruk'aslen
9Más utz ri man niya'ox ta awejqalen, xaxe ta k'o nilin awichin;
ke chuwech nabananej chi k'o aq'ij, y xa ni ta jun away k'o richin natej.
10Ri wineq ri choj ruk'aslen kan yeruquqa' chuqa' ri rawej, richin man nikitej wayjal;
jak'a ri winaqi' ri kan e itzel, kan yekiya' pa ruk'ayewal.
11Ri kan jebel yerusamajij ri rulew, kan k'o k'a k'iy richin nutej.
jak'a ri xaxe nuch'ob chi k'o nrajo' nuben y man nisamej ta, xa jun nakanik.
12Ri nitzaqo richin ri wineq ri kan itzel, ja ri itzel taq rayinik ri ek'o rik'in.
Jak'a ri choj ruk'aslen kan niwachin ri ruk'aslen, roma jebel ri akuchi tikil-wi ri ruxe'.
13Roma ri mak ri ye'el pa ruchi' ri wineq, nitzaq pa pikbel richin ri wineq itzel;
jak'a ri wineq ri kan choj ruk'aslen, rik'in ri ruchi' nikolotej chuwech ri ruk'ayewal.
14Ri nibanon chire ri wineq chi nikuqer ruk'u'x, ja ri utzilej taq ch'abel ri yerubij;
y kan achike k'a rubanik rusamaj jun wineq, kan ja chuqa' ri' ri rajel ruk'exel ri xtuk'ul.
Ri wineq ri k'o runa'oj y ri maneq runa'oj
15Ri xa maneq runa'oj kan nuch'ob chi ri rubanobal rija' jari' ri utz,
jak'a ri kan k'o runa'oj, xa k'a nrak'axaj na ri nikibij ri ch'aqa' chik winaqi'.
16Ri xa maneq runa'oj kan chi'anin nuk'ut chi k'o royowal;
jak'a ri kan nowineq man nuk'ut ta ri ruk'ixbilal, roma niqasex ruq'ij.
Ri ch'abel ri ye'ukusex pa ruchojmilal
17Ri kan ruyon qitzij ri nuq'alajirisaj chirij jun chik wineq, kan q'alaj chi jun choj wineq;
jak'a ri xa ruyon tz'ukun taq tzij ri yeruq'alajirisaj chirij jun chik wineq, kan q'alaj chi xa banoy etzelal.
18Ek'o winaqi' ri man nikipoqonaj ta yech'on, y ri kich'abel xa yesokon achi'el espada;
jak'a ri kaq' ri kan k'o-wi na'oj kik'in, ri ch'abel ri yekibij kan ye'aq'oman k'a.
19Ri ch'abel ri yerubij jun wineq ri xaxe ri qitzij ri nubij, kan yeyaloj k'a;
jak'a ri ch'abel ri yerubij jun wineq ri xa tz'ukuy-tzij, xaxe ok richin jun ti ramaj.
20Ri kan k'o pa kinojibal chi k'o ri nikajo' nikiben chire jun wineq, xa k'ayilej k'aslen ri nikil;
jak'a ri kan k'o pa kinojibal chi nikiya' uxlanen pa ruk'aslen jun wineq, nuk'en-pe kikoten chike.
21Kan man jun k'a ruk'ayewal ri xtok'ulun ta pa ruk'aslen jun wineq ri kan choj ruk'aslen;
jak'a ri ruk'aslen ri wineq ri kan itzel, kan nojineq rik'in ruk'ayewal.
22Ri Jehová kan yeretzelaj ri winaqi' ri nikikusaj ri kichi' richin yetz'ukun-tzij;
y kan nikikot ri ránima kik'in ri kan jantape' qitzij yech'on.
23Ri wineq ri k'o retamabal kan man nunabej ta k'a chi k'o retamabal;
jak'a ri wineq maneq ok retamabal kan ja rija' ri nrajo' nich'on nabey y xa nuk'ut chi maneq ok retamabal
Ri wineq ri nisamej y ri man nisamej ta
24Ri wineq ri kan jebel nisamej, xtiban k'a chire chi ja rija' ri xtik'oje' pa kiwi' ri samajela';
jak'a ri wineq ri xa nuq'oraj nisamej, xa xtiban chire chi tisamej.
25Ri bis kan nuben k'a chire ri wineq chi maneq kikoten pa ránima;
jak'a jun utzilej ch'owen, kan nuben chi nikikot ránima ri wineq.
26Ri wineq ri kan choj ruk'aslen, kan jebel nok uk'uey bey richin ri rachpochel.
Jak'a ri rubey ri kik'aslen ri e banoy richin ri etzelal, yerusech ri kachpochel.
27Ri wineq kanonel ri xa k'o ruq'oral, xa man jun chikop xtril richin chi nusa';
jak'a ri wineq ri kan nutej ruq'ij nisamej, jari' ri xtibanon chire chi xtibeyomer.
28Chupan k'a ri rubey ri wineq ri choj, kan nilitej-wi k'aslen;
jak'a chupan ri rubey ri wineq ri nuben xaxe ri nrajo' rija', nilitej kamik.
Currently Selected:
Pro 12: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
