Lukas 6
6
Yesus bakuasa atas arii terakhir mengoo urang Yahudi
(Mat. 12:1-8; Mrk. 2:23-28)
1Suatu arii terakhir mengoo urang Yahudi, Yesus dan saurang am satia ka Guru bajalan malalu sutii salamar kabun gandum. Mulaa wilayah itii murid-Nya mangutip babarapa bulir gandum di ngusuu-ngusuunya honii jari rang lalu mamusehnya. 2Babarapa urang Farisi batanya: “Mangapa kolai mangaruh hal am hontaa tahuu dikaruh metuh arii terakhir mengoo urang Yahudi?” 3Lalu Yesus manjawab: “Hontaakah kolai basaa mamaca lalam kitab suci am dikaruh Raja Daud metuh iaa dan urang-urang am barotaa mansaii kaporan, 4Inya tamaa ka lalam kemah Allah, dan manggalap babarapa roti Suci. Inya mamuseh roti am baanyaa tahuu dipuseh laii Imam, Dan inya jam mamoriikan sabagian ka kawal-kawalnya.” 5Lalu Yesus bapaner ka urang-urang Farisi iyah: “Aku Anaa Kalunen yaiyah Yesus Kristus araalah Tuhan atas arii terakhir mengoo urang Yahudi.”
Yesus mambaiikan urang lumpuh jari kanannya metuh arii terakhir mengoo urang Yahudi
(Mat. 12:9-14; Mrk. 3:1-6)
6Metuh arii terakhir mengoo urang Yahudi ka homan am bukan, Yesus tamaa ka dangau ibadah urang Yahudi, lalu malajar. Diyah araa siku urang am jari kanannya lumpuh. 7Babarapa urang Farisi mangamati Yesus, apakah Iaa mamaikan urang metuh arii terakhir mengoo urang Yahudi, supayaa rang tahuu baalasan ka pangajar hukum Musa. 8Akan tatapi, Yesus ingat apa am agii rang pikirkan, lalu bapaner ka urang am jarinya lumpuh iyah: “Huaslah dan badirilah di tongah!” Lalu urang iyah huaslah dan badirii. 9Lalu Yesus bapaling ka pangajar Hukum Musa dan urang-urang Farisi, lalu bapaner “Aku batanyaa ka kolai, Manihkah am tahuu dikaruh metuh arii terakhir mengoo urang Yahudi, dirii mangaruh am baii atau mangaruh am jahat, manyalamat kosah urang atau manyakitiinya?” 10Satelah mailaa sakaliling rang, Yesus bapaner ka urang am jarinya lumpuh iyah: “Ulurkanlah jari kolai.” Lalu urang iyah magulurkan jarinya dan jarinya manjadi baii. 11Akan tatapi pangajar Hukum Musa dan urang-urang Farisi mailaa hal iyah, rang amat gusar dan manampara bapaner suti kan am bukannya: “Apa am tahuu dirii lakukan tahadap Yesus?”
Yesus manyuruh ka dua belas murid
(Mat. 10:1-4; Mrk. 3:13-19)
12Satelah babarapa arii, Yesus naii ka bukit honaa badoa dan mangganirii. Iaa mahabiskan sapanyangng malam koyah honii badoa ka Allah. 13Suung ariinya, Yesus manimaii murid-murid-Nya akan mahadap lalu mamilih dua bolas urang mulaa rang sabagai Nabi mulaa antaraa rang. 14Simon Petrus am diborii namaa-Nya Petrus, Andreas, Yohanes dan anaanya Zebedeus dan Yakobus anaa kalaki Zebedeus dan manyari Yohanes, Filipus, Bartolomeus, 15Matius saurang panagih pajak, Tomas, Alfeus ompai Yakobus, Simon am dijoku urang Zelot, 16Yudas anaa Yakobus, dan Yudas Iskariot penghianat Yesus.
Yesus malajar dan mambaii urang banyaa
(Mat. 4:23-25)
17Yesus dan murid-Nya turun mulaa bukit dan badirii ka homan am tanahnya rotaa. Diyah bakumpul banyaa urang bukan am datang mulaa saluruh provinsi Yudea dan mulaa kota Yerusalem, serta mulaa kota Tirus dan Sidon. 18Rang datang honaa manongar Yesus dan honaa di baiikan mulaa sagala panyakit rang dan rang am di tamaa laii roh-roh jahat tahuu di baiikan. 19Uras urang barusaha akan manyuntuu Yesus laii araa kuasa am maluar mulaa Iaa dan rang uras dibaii laii-Nya.
Ucapan bahagia dan peringatan
(Mat. 5:1-12)
20Yesus manampai murid-Nya dan lalu bapaner:
“Berbahagialah ikam urang am susah, laii kolailah am mahompu Karajaan Allah.
21Diberkatilah kolai am botii itii kaporan, laii kolai honaa di konyangkan.
Berbahagialah kolai botii-tii mananggis, laii kolai akan gorah.
22Berbahagialah kolai saat urang gili ka kolai, serta malobakan kolai,
manghina namaa baii kolai laii kolai jarii mamilih honaa mairing Aku,
Anaa kalunen yaiyah Yesus Kristus.
23Metuh arii iyah baramilah dengan ponuh sukacita,
Allah akan marogaa kolai ka Sorga homan Allah dan malaikat-malaikat tingal.
Laii hiaa umbuh rang jarii mangaruh hal-hal am samahkan ka saurang Nabi zaman hariah.
24Amun camiyah celakalah hai kolai am sugih laii kolai jarii maulih kanyamanan hidup.
25Dan celakalah ikam am botii-tii hompu banyaa makanan laii rang akan kaporan.
Celakalah rang am botii gorah. Laii rang akan amat sedih.
26Ikam am botii di puji-puji laii uras urang akan mangalami kasulitan am bakah,
laii hiaa umbuh urang-urang itii bapaner dengan cara am samahkan rang sacaraa kaliruu mangaku sabagai nabi Tuhan.”
Sihaailah musuhmu
(Mat. 5:38-48)
27Yesus malanyutkan pangajaran-Nya dan bapaner: “Itiilah am Ku parahkan ka satiap urang am manongar Aku sihaailah musuhmu, dan mangasihi uras urang am gili kan kolai. 28Berkatilah rang am manggutu kolai. Dan badoa ka Tuhan akan rang am mampalakukan kolai dengan buru. 29Jaka urang manampar pipimu sorap kanan, borikanlah jam pipimu sorap kiwaa. Jaka saurang mangalap jubahmu, nauhnya iaa jam mangalap pakaianmu. 30Jaka sasaurang mamintaa ka kolai borilah; dan Metuh sasaurang maalap sasuatu hompumu, umet mamintanya mulaa. 31Perlakukanlah urang bukan samahkan kolai honaa di perlakukan jam ka rang.”
32“Jaka kolai bayaa mangasihi rang am mengasihi kolai, kolai hontaa ma lakukan apa jam am layak dipujii sapaa jam laii rang hontaa mamatuhi. Tuhan jam sihaa ka urang-urang am mangasihi rang. 33Jaka kolai babuat baii bayaa ka urang am babuat baii ka kolai, kolai hontaa ma lakukan sasuatu am pantas di puji, bahkan urang-urang am hontaa taat ka Allah mangaruh baii ka urang-urang am babuat baii ka rang. 34Amun kolai maminyamkan duwit ka urang bukan, laii kolai mangharap akan manarima sasuatu mulaa inya, apakah jasamu? Urang-urang badosa jam maminyamkan ka urang am badosa, supayaa rang manarima mulaa samahkan banyanya. 35Sabalinya, kolai sihaa kan musuh-musuhmu dan mangaruh am baii ka rang. Jomikankanlah duwit tampa mangharap balasanya. Sabagai balasanya, Tuhan maha tingii akan mamoriikan kolai pahala am bakah, dan kolai akan baii samahkan Tuhan akan manjadi-Nya Raja atas umat-Nya. Laii Tuhan mampaila kasih karunia bahkan ka urang am hontaa ingat batarima kasih dan jahat. 36Honaalah kolai murah hatii, samakan Bapamu jam am ponuh dengan murah hatii.”
Hal mahakimi
(Mat. 7:1-5)
37“Umet manghakimi supayaa kolai hontaa di hakimi. Dan umet ma hukum supayaa kolai hontaa di hukum, maka maafkan dan kolai akan diampuni. 38Borikan apa am dibutuhkan urang bukan, dan kolai akan manarima am kolai butuhkan. Iyah akan dipulang ka kolai lalam jumlah ponuh, dihonya, diguncang honii manamakan lobih banyaa mulaa, dan iyah akan tumpah ka sisi! Ukuran apa jam am kolai gunakan honii mamori banyaa atau kocii-kocii mahonii maukur apa am diborikan mulaa ka kolai.”
39Yesus mamarahkan ka urang tontang parumpamaan ka rang. Dapatkah urang buta manuntun urang buta? Hontakah urang nua akan jatu ka lalam lubang?
40Saurang murid hontaa lobih hebat mulaa gurunya. Tatapi setiap murid am satia ka Guru am jarii mampalajarii sagala sasuatu akan samahkan gurunya.
41“Manggapa kolai mailaa dosa konii samahkan dobu konii di mata urang bukan, samantara maabaikan dosa bakah samahkan suti kayuu bakah di mata kolai kanirii! 42Macam apa kolai ulih bapikir honaa mamarahkan. Manyari, izinkan aku mambantu kolai maluarkan dobu am araa di mata kolai, samantara kolai kanirii hontaa mailaa araa kayuu bakah dimatamu? Kolai urang munafik! Pertama-tamaa kaluarkan holu kayuu bakah am araa dimatamu kanirii. Lalu kolai ulih mailaa dengan jelas honii maluarkan dobu konii am araa dimata manyarimu.”
Puhun dan buahnya
(Mat. 12:33-35)
43“Puhun am baii manghasilkan buah am baii, dan Puhun am buru mahahasilkan buah am buru. 44Sebab setiap puhun diila mulaa jenis buah am dihasilkan. Misalnya, kolai hontaa maalap buah ara dan anggur hontaa di alap mulaa rumput-rumput baduri. 45Urang am baii maluarkan hal-hal am baii mulaa hatiinya am baii dan urang am jahat mangaluarkan hal-hal am jahat mulaa hatiinya am jahat. Apa am maluar mulaa nyawanya, maluar mulaa hatiinya.”
Dua macam dasar
(Mat. 7:24-27)
46“Mangapa kolai manimaii Aku: ‘Tuhan, Tuhan,’ padahal kolai hontaa ma lakukan apa am Aku parah? 47Barang sapaa am datang ka Aku dan manongar firman-Ku serta taat, Aku akan manjelaskan ka kolai dan dengan sapaa iaa dapat disamahkan. 48Iaa samahkan urang am mangaruh suti dangau. Iaa manggalii jauh ka lalam tanah hingga sampai batu ka rang dilobanya dan mangaruh dangau katingi batu ka rang. Lalu, Metuh banyir datang arai mangonai dangau iyah, tatapi dangau iyah hontaa hanyut laii dangau iyah dikaruh honii fondasi am tahan. 49Namun, jaka araa urang am manongar ajaran-Ku di bumi dan hontaa mamatuhi-Ku, iaa samahkan urang am hontaa manggalii tanah akan manggora fondasi dangaunya, tatapi manggaruhnya ka tingii tanah. Lalu, metuh galumang manggonaa dangau iyah, dangau iyah hontaa hanyut dan doraa.”
Currently Selected:
Lukas 6: ATV
Highlight
Copy
Compare
Share
Want to have your highlights saved across all your devices? Sign up or sign in
Tamuan Bible by Beyond Translation is licensed under Creative Commons Attribution-ShareAlike 4.0 License.
