Lukas 5
5
Yesus manimaii Murid-murid am pertama
(Mat. 4:18-22; Mrk. 1:16-20)
1Suatu arii Yesus agii badirii di sisi Danau Genesaret am dijoku Danau Galilea. Urang banyaa bakumpul di sakaliling dan mandesak-Nya sammil manongar Firman Allah. 2Dan Iaa mailaa dua jukung am agii singgah ka sisi danau Iyah, tatapi para nelayan iyah maningalkan jukung rang koyah dan rang agii mangucah jalaanya. 3Yesus naii di salah suti jukung nelayan, yaiyah jukung Simon dan manyuruh Simon mangayuh jukungnya jauh kocii mulaa sisi danau. Limah iyah Yesus duru di lalam dan malajar urang banyaa mulaa lalam jukung. 4Satelah jarii bapaner, Yesus bapaner ka Simon: “Ingkaslah ka tongah danau dan tibarkanlah jalaamu honii manangkap lauu.” 5Simon manjawab: “Guru kami bagawi onyaa sapanyang malam namun hontaa baulih apa-apa, namun Ikam manyuruh kami manibar jalaa itii.” 6Metuh simon dan kawal-kawalnya, mangaruh apa am disuruh Yesus, rang manangkap banyaa sakali lauu. Amat banyaa lauu am rang ulih, sahingga jalaa rang honaa rabit. 7Lalu para kawal-kawalnya am di jukung iyah mamori tannaa dengan malambaikan jari rang ka kawal-kawalnya am di jukung bukan. Datang dan marompuh rang, lalu kawal-kawalnya iyah maisi dua jukung iyah ponuh lauu sampai jukung rang honaa karam. 8Metuh Simon petrus mailaa hal iyah Simon sujud ka paharap Yesus dan bapaner: “Tuhan, aku ingat Ikam kudus, ingkaslah mulaa aku, laii aku itii urang am badosa!” 9Inya dan uras urang am barotaa-rota dengannya, heran laii banyanya lauu am rang tangkap. 10Yohanes dan anaanya Zebedeus dan Yakobus ompai mulaa rasul Yakobus dan Yohanes dan Yakobus dan anaa kalaki Zebedeus dan manyari Yohanes, araalah kawal bagawi Simon, rang jam heran. Rang nua araalah anaa-anaa Zebedeus. Lalu Yesus bapaner ka Simon: “Umet golaa, nampara botitii ikam akan manaing urang am pacayaa ka Aku.” 11Dan Satelah rang manunaa jukung-jukung rang ka sisi danau, rang jam maningalkan sagala gawian rang sabagai nelayan dan ingkas umaa Yesus manjadi murid-murid-Nya.
Yesus mambaii urang am konaa sakit kusta
(Mat. 8:1-4; Mrk. 1:40-45)
12Suatu arii, Yesus baaraa di salah suti kota di daerah iyah, araa siku urang am tubuh nya konaa panyakit kulit am dijoku “kusta”#5:12 Manurut paraturan agama Yahudi urang am konaa panyakit itii hontaa layak manyembah Allah dan samayang. Metuh urang iyah mailaa Yesus iaa basujud tukus dahinya sampai ka tanah dan mamohon ka Yesus: “Guru, aku ingat bahwa Ikam honaa manolong aku, Ikam ulih mamaikan aku.” 13Lalu Yesus maulurkan jari-Nya, manyontuu samil bapaner: “Aku honaa, jadilah baii!” Dengan copat jam panyakit kulit urang iyah hilaa. 14Lalu, Yesus manggirah urang iyah mangesahkan ka sapa jam dan bapaner: “umetlah mamarahkan kasiapa jam. Tapi sabalinya, ingkaslah dan tunyukanlah ka imam bahwa kolai jarii baii. Lalu persembahkanlah korban am di parintahkan lalam pangajaran hukum Musa agar supayaa kolai manjadi barasih.” 15Tatapi kabar totang Yesus samakin takabar kamanih-manih, sahingga banyaa urang datang bakumpul honaa manongar Iaa dan honaa mamaikan panyakit rang. 16Tatapi Yesus maningalkan uras urang dan ingkas ka homan daerah am hontaa araa berpenghuni honaa badoa.
Urang lumpuh di baiikan
(Mat. 9:1-8; Mrk. 2:1-12)
17Sasuatu arii Metuh Yesus agii malajar, araa babarapa urang Farisi pangajar hukum Musa am duru koyah. Rang datang mulaa saluruh banua-banua mulaa saluruh wilayah provinsi Galilea, provinsi Yudea dan kota Yerusalem barotaa penduduknya, kuasa Tuhan araa ka Yesus honii mamaikan urang-urang am sakit. 18Lalu, babarapa urang datang manaing urang lumpuh am guring, ka tingii tikar. Dan rang barusaha manaingnya tamaa di dangau supayaa tahuu manggora urang iyah di paharap Yesus. 19Tatapi rang hontaa manapatkan cara honaa manamakan urang kanyaman iyah ka lalam dangau iyah laii talalu banyaa urang. Lalu rang naii ka atap dangau. Rang mangaruh celah ka atap dangau dan manurunkan urang iyah dengan tikarnya ka tongah-tongah urang banyaa iyah, tepat ka paharap Yesus. 20Metuh Yesus maingat bahwa rang pacayaa ka Inya. Yesus maafkan urang lumpuh iyah. Maka Iaa bapaner ka urang iyah: “Hai manyari, dosa-dosamu jarii di mamaafkan.” 21#5:21 Ahli-ahli TauratPangajar hukum Musa dan urang-urang Farisi manampara bapaner suti ka am bukannya: “Sapakah urang am barani mahinaa Allah? Sapaa am tahuu maafkan dosa, kacuali Allah iyah kanirii?” 22Metuh Yesus ingat pikiran rang. Iaa bapaner: “Mangapa kolai bapikir camiyah lalam hatiimu?” 23Parahkan ka Aku am manih am lobih mudah dijokuu: “Dosa-dosamu Jarii di maafkan,” atau “Badirilah dan bajalanlah?” 24Tatapi botii, Aku akan mamaikan panyakit itii supayaa kolai ingat bahwa Aku, Anaa Kalunen yaiyah Yesus Kristus, hompu kuasa di dunia itii honii maafkan dosa: “Satelah mamaner hal iyah,” Yesus malingau ka urang am lumpuh iyah lalu bapaner: “Aku manyuruh kolai, Huaslah, alaplah tikarmu, incang, dan pulanglah.” 25Dan Sakatika Iyah jam, urang iyah langsung badirii di paharap uras urang dan maalap homannya guring, lalu bajalan pulang sammil mamuji Allah. 26Uras urang am mailaa apa am tajadi bujur-bujur heran dan rang manampara bapaner: “Mamuji Allah.” Apa am di ilaa amat managiatkan rang, dan rang bapaner: “Kami jarii mailaa peristiwa am luar biasa arii itii!”
Yesus mamilih saurang Panagih Pajak banama Lewi akan manjadi salah suti Murid-Nya
(Mat. 9:9-13; Mrk. 2:13-17)
27Kemudian, Yesus maluar mulaa homan iyah dan di tongah jalan Iaa mailaa saurang panagih pajak am banama Lewi am agii duru dikantornya. Koyah Yesus mailaanya dan bapaner ka inya: “Ayoo, umaa Aku!” 28Lalu Lewi badirii maningal gawiannya sabagai panagih pajak dan manampara umaa manjadi murid Yesus.
29Kemudian Lewi saurang panagih pajak mangaruh pesta bakah di dangaunya honii mahormati Yesus. Banyaa panagih pajak dan tamu-tamu bukan am umaa makan barotaa rang. 30Dan babarapa urang Farisi dan pangajar hukum Musa lalam kalompok rang mengkritik hal itii. Rang batanya ka Yesus: “Mangapaa murid Ikam makan dan marai dengan panagih pajak dan urang-urang badosa bukan?” 31Lalu jawab Yesus ka rang, ujaa Yesus: “Bukan urang sehat am mamerlukan dokter, tatapi urang sakit; 32Yesus datang bukan honii manimaii urang-urang am marasa diriinya bujur, malainkan datang honii manimaii urang am badosa honii batobat.”
Yesus dipertanyakan tontang hal puasa
(Mat. 9:14-17; Mrk. 2:18-22)
33Urang Farisi bapaner: “murid Yohanes pembaptis rancak bapuasa dan badoa ka Tuhan, camiyah jam murid-murid urang Farisi, tatapi murid Yesus makan dan marai.” 34Yesus manjawab: “Ulihkah kolai manyuruh para tamu-tamu mampelai kalaki honaa bapuasa, Metuh pangantin kalaki Iyah masih barotaa-rota rang? 35Waktunya akan tibaa ka Aku, sang mampelai kalaki, akan dialab mulaa rang. Metuh saat iyah rang akan bapuasa.”
36Kemudian Yesus mamoriikan parumpamaan am bukan ka rang: “Urang hontaa marawit salomar kain mulaa pakaian am baharu honii dijahitkan ka pakaian am lamat. Jaka rang mangaruh hal iyah, rang akan marawit pakaian baharu iyah.” 37Demikianlah urang hontaa manuang anggur baharu ka lalam kantong anggur mulaa kulit binatang am lamat. Jaka urang mangaruh iyah, anggur baharu iyah akan marusak kulit binatang iyah. Anggur iyah akan habis, dan kulit binatang iyah akan rusaa. 38Sabalinya, urang akan manuang anggur am baharu ka lalam kantong kulit am baharu. 39Hontaa araa saurang jam am basaa maminum anggur am lamat am honaa maminum anggur baharu. Laii pasti inya bapaner lalam diriinya: “Anggur am lamat lobih baii” dan mahompu kualitas am lobih nyaman.
Currently Selected:
Lukas 5: ATV
Highlight
Copy
Compare
Share
Want to have your highlights saved across all your devices? Sign up or sign in
Tamuan Bible by Beyond Translation is licensed under Creative Commons Attribution-ShareAlike 4.0 License.
