Lukas 15
15
Paribasa domba ye jaweh
(Mat. 18:12-14)
1Pas te olo ye bali na'an kawan tukang tagih pajak ali kawan ulun ye bedosa sulet nyeruku Yesus di ngeringa ajaran Yesus. 2Pas kawan ulun Farisi ali kawan pengajar hukum Musa iro kite ye, dali langsung ngulek: “Se di Da iro nerima kawan ulun ye bedosa, nelang man sendro dali.” 3Ukah iro Yesus ngulek paribasa tong dali. Ulek Da, 4“Misal ye ko be domba jatus ti tapi erai ye jaweh. Ko pasti ngikah ye sie pulu sie ti iro te padang jone ye karing, belalu tulak ngeto domba ye jaweh iro empe ko ruku ye.” 5Pas da ruku domba ye iro, da ego bene sambil ngengkat ye pelos mi'it ye 6Ukah iro da ngoit uli tong belai. Da no'ok kawan uyang da ali kawan ulun ye nono te dani belai da. Ulek da: “A'ap apu ruku domba ye jaweh iro, Aji, yu tong belai a'ap di taka kate arai ego sendro.” 7Ulek Yesus: “Ali cara ye sameh, Allah ali kawan malaikat Da sagar ego bene te surga leka erai ti ulun bedosa apu betobat, koe iro sie pulu sie ulun buen bali ye sa parlu betobat.”
Paribasa erai kapeng duit perak ye jaweh
8Ukah iro Yesus bekisah li. Ulek Da: “Kaye erai ke ulun bawe be sepuluh ti logam belalu jaweh erai ti. Me sa nemolum lampu da, pelos nyapu belai, di ngeto logam ye jaweh iro empe da ruku ye.” 9Belalu pas da ruku ye da no'ok kawan uyang ali kawan ulun ye nono dani belai da. Pelos da ngulek: “A'ap apu ruku logam ye jaweh iro. Aji, yu tong belai a'ap di taka sendro arai ego ye.” 10Ulek Yesus: “Ngunaw iro ade Allah ali kawan malaikat Da, ye sagar ego bene leka kawan ulun bedosa apu betobat.”
Paribasa tia ye jaweh
11Ukah iro Yesus bekisah li ulek Da: “Na'an erai ke ulun ye be due ti anak upo.” 12Anak upo ye paling tia ngulek tong m'a ye: “Bah okoi ko harta ko iro tong ka a'ap.” Ukah iro m'a da ngokoi harta tong ka kawan anak da. 13Sa ola te olo ye bali, anak da ye paling tia ngejual harta benda da. Ukah iro da ngepe duit ye pakai da tulak tong negara ye oro. Pas da empe ti biduh, da ngehamur duit ye belalu bolum nengkawus duit ye empe awus. 14Ukah da nengkawus kawan duit da, desung iro ade tamam bene ulun senur te negeri iro, ye ngene da jaji susah nelang semer tamam bene. 15Aji, tulak da begawi tong ka runa ulun ye nono te negeri iro, Ulun iro nyiu tong ume pelos ngokoi okan kawan upe. 16Tia iro semer bene belalu da kakan man se ye na okan kawan upe iro, leka beloh erai ye ngokoi da pengokan. 17Pas tia iro desung bepikir ulek da suang aseng da, Kawan ulun ye begawi te runa ma a'ap be pengokan deo bene, tapi a'ap te bihe tamam kesa semer! 18A'ap sagar mulik tong runa ma a'ap. Kaye a'ap ruku ali da nene, A'ap ngulek tong da: “Bah a'ap ihe apu bedosa tong ka Allah ali tong ka ko. 19Leka iro A'ap sa pantas li na ulek anak ko. Tapi pejaji a'ap ihe jaji anak buah begawi ko.” 20Ukah iro da mulik nyeruku ma da. Tapi pas tia iro kea oro ke belai, ma da kite da sulet ma da tekasi neaw anak da iro. Belalu Ma da langsung mensit menok ngukup anak da iro. 21Ukah iro, tia iro ngulek tong ma ye, Bah, A'ap apu bedosa tong ka Allah ye te surga ali tong ka ko. Aji: “a'ap ihe sa pantas na ulek ko anak.” 22Tapi, Ma da ngulek tong kawan batak ripen ye da nyiu dali, Golek! Oit jubah ye paling buen ye na'an te belai ihe pelos pesua tong ka da. Belalu okoi tong ka da sinsim te bua kami da ali sepatu ye buen di pakai da. 23Ukah iro alan tulak belalu oit anak sapi ye bonok pelos bunu, pelos luen di taka ngene acara pakai anak a'ap ye apu mulik tong belai ihe. 24Leka anak a'ap ihe ngunaw ulun ye apu mate, tapi nehe da apu bolum li! Da ngunaw ulun jaweh, tapi nehe apu ruku! Ukah iro dali awus ye pe mulai acara ye. 25Pas desung iro, anak da ye penela desung te ume, malem iro, pas da dini ke belai di uli, da keringa engan musik ali engan kawan ulun nuye. 26Pas da empe, da no'ok erai batak ripen iro belalu da nyituk: “Se ye desung na ene dali iro. 27Ulek batak ripen iro tong da, Ani ko apu sulet tong belai, belalu m'a ko ngeleleng anak sapi ye bonok di ngene acara leka da apu mulik tong belai beloh kune me-me. 28Pas tuken ye iro keringa, da bereket bene belalu noi letep tong suang belai. Aji ma da losek di nyiu da litep. 29Anak ye paling tuha iro ngulek nelang bereket, ulek da, Betaun-taun a'ap apu begawi di engko. A'ap ngeringa se ye na siu ko. Tapi ko beloh pini ngokoi kaming sunah erai ti di pakai a'ap ali kawan uyang a'ap be acara. 30Tapi pas anak ko iro uli. Da ye ukah nengkawus harta ko ali kawan bawe ye beloh be akal, tapi ko ngene acara pelos ngeleleng anak sapi ye bonok di pun da. 31Ukah iro ma da ngulek tong da, Anak a'ap, ko tuju sendro a'ap, belalu awus kawan harta a'ap ihe pun ko ade. 32Tapi olo ihe taka harus be acara pelos arai ego leka erai butung ko ngunaw ulun mate, tapi nehe da apu bolum li, da ngunaw ulun jaweh, tapi taka apu ruku.”
Currently Selected:
Lukas 15: LBX
Highlight
Copy
Compare
Share
Want to have your highlights saved across all your devices? Sign up or sign in
Bawo Bible by Beyond Translation is licensed under Creative Commons Attribution-ShareAlike 4.0 License
