Lukas 14
14
Yesus nawas ulun beroten pas te olo ye na tentukan di beranai
1Pas te olo ye na tentukan di beranai, Yesus na undang di sendro man te belai erai ke ulun pimpinan kawan ulun Farisi di sendro man. Pas Da desung man tamam kawan ulun Farisi ali pengajar hukum Musa iro memperhati Da di ngeto penyala Da. 2Pas te biro, na'an ulun ye po'o ye bungkak jakat te one wae Yesus. 3Belalu Yesus ngulek tong ka kawan ulun Farisi ali kawan pengajar hukum Musa: “Me ahan nawas ulun ye beroten pas te olo ye na tentukan di beranai?” 4Tapi, dali sa nuing ye se na situk Yesus iro, sa ola Yesus mege ulun ye beroten iro pelos Da nawas ye, ukah Yesus nawas ye Da nyiu ulun iro uli tong belai. 5Ukah iro Yesus ngulek tong dali: “Ngetme kaye anak ko atawa sapi ko lotu tong suang sumur ye takei pas te olo ye na tentukan di beranai, Me ko sa ngawat narik sapi iro empe losek neke sumur iro, mele olo iro pas te olo ye na tentukan di beranai.” 6Tapi sadang dali keringa engan Yesus iro, dali beloh budas kate nuing ye.
Runa ye paling penting ali runa ye sa beka penting
7Pas Yesus neaw kawan ulun ye na undang ulun Farisi iro da kite kawan ulun iro desung be rabut kursi runa tue'et kawan ulun penting, belalu Da ngulek paribasa tong dali: 8“Kaye ko na undang ulun tong acara peruku, i'ya ko tu'et te runa ye penting. Leka ulun ye apu nyedia runa tu'et iro di runa kawan ulun ye penting ke ko.” 9Ukah iro, ye pun belai iro nyeruku ko pelos ngulek, Okoi kursi ko iro tong ulun ihe! Belalu ko harus pindah runa tu'et tong kursi ye bali sambil mangen. 10Aji, kaye ko na undang ulun tong acara, tu'et a'a te odi di ulun ye ngundang ko ngulek tong ko, Aben luhen a'ap, alan ko pindah tue'et tong muka. Ye ngene ko sagar na hormati te one wae kawan ulun bali. 11Leka nome ye ketonek, sagar na aja belalu nome ye buen ulun ye, maka da sagar na muliakan Tuhan.
Nome ye harus na undang
12Ukah iro, Yesus ngulek tong ulun ye ngundang Da iro: “Kaye ko ngene acara atawa perjamuan, iya'a ketuju ngundang kawan uyang, keluarga, erai butung, ali ulun ye sugih ye nono te sila belai ko. Leka kaye ko ngundang dali, maka dali ade sagar ngundang ko ade tong acara dali ley, belalu dali ngebales se ye na ene ko tong dali. 13Tapi, kaye ko ngene acara, undang ade kawan ulun susah, kawan ulun cacat, kawan ulun lumpuh, ali kawan ulun posa. 14Kaye ko ngelaku iro maka Allah sagar ngeberkati ko, leka kawan ulun ihe beloh kate ngebales ye, Tapi Tuhan ye sagar ngebales ye pas Da nemolum li kawan ulun ye apu mate.”
Paribasa kawan ulun ye tuju ngopaw
(Mat. 22:1-10)
15Pas keringa iro, na'an erai ulun undangan ye man biro ngulek tong Yesus, ulun iro ngulek tong Da: “Kawan ulun ye man te perjamuan Kerajaan Allah iro na berkati ene Allah.” 16Ukah iro Yesus ngulek: “Na'an erai ulun ye kakan ngene acara ye solai belalu da ngundang kawan ulun di sulet tong ro.” 17Pas acara ye dini mulai, ulun iro nyiu batak ripen da di ngulek tong kawan ulun ye na undang iro, “Tong he mo, leka kawan pengokan ihe apu jaji”. 18Tapi awus kawan ulun ye na undang iro ngene alasan. Ulun ye penela ngulek tong batak ripen iro, A'ap kaweng ma'af leka a'ap kado ukah moli ume belalu a'ap harus jemelok neneng ume iro. 19Ye bali ngulek, A'ap kaweng maaf ade leka a'ap jape moli opat ti sapi a'ap ade harus jemelok ade nyuwok kawan sapi iro. 20Na'an ade ye bali panan ngulek, Kaweng maaf ade ihe leka a'ap kado ukah peruku. Koe iro beloh kate tulak tong ro. 21Ukah iro batak ripen iro mulik pelos ngulek tong temangung da, se ye na ulek kawan ulun iro. Pas tuha ye pu'un belai keringa iro da langsung bereket tong ka dali. Ukah iro da ngulek tong batak ripen iro, Golek! Tulak tong alan-alan halus te diding ja'a ihe. Belalu eto pelos oit kawan ulun susah, ulun lumpuh, ulun kepa, ali ulun posa. 22Ukah iro, batak ripen iro mulik da ngulek tong, Temangung, a'ap apu ngene koe gawi ye na siu ko. Tapi kea na'an kursi runa tu'et ye lawe. 23Belalu temangung da iro ngulek tong da, Alan tulak tong alan solai ali alan halus, belalu oit kawan ulun ye te biduh di sulet tong acara ihe, Di belai a'ap ponu ali kawan ulun. 24A'ap ngulek tong ka ko, beloh erai ti lun ye na undang a'ap kaye sa man kawan pengokan ye apu na sedia a'ap
Segala se ye na'an harus na lapas di ngedasu Yesus
25Pas te olo bali ye, deo kawan ulun sendro malan nemasu Yesus. Ukah iro, Da ngelap tong dali sambil ngulek. 26“Kaye ko kakan jaji murid A'ap, ko harus mengasihi A'ap loke ke kasih ko tong ka ma ali ne'e ko, sao ko kawan tia ko ali erai butung ko, ali unuk ko ley. Kaye sa, ko beloh tau jaji murid A'ap. 27Nome ye beloh sanggup ngoson salib pelos ngedasu A'ap, berarti da sa kate jaji murid A'ap.
28Leka kaye ko nemu'et gedung ye panyang, ke penela ko harus tu'et sambil ngehitung senu awus duit ye. Ukah iro neneng me sukup duit ye di nyempunah ye. 29Kaye sa ngunaw iro, ko paling je kate ngene ori ye daeh sa kate nyempunah, Pas kawan ulun ye kite ye tamam koka tepele'ek. 30Sambil kawan ulun iro ngulek, Ulun iro je ngene daeh, tapi da sa sanggup nyempunah ye.
31Atawa, kaye raja ye ngoit sepulu ribu pasukan di ngelawen raja ye bali ye be due pulu ribu pasukan, ye ngene da tu'et dile sambil bepikir me kate da nengkaleh raja iro. 32Kaye da iro ketoan da sa kate ngelawen ye, maka da nyiu ulun di pekempe pelos nyituk syarat di damai pas pasukan musuh iro kea oro. 33Aji ngunaw ro ade nget ko, beloh erai ulun ye kate jaji murid A'ap kaye sa ngokoi se ye na'an te da.”
34Ukah iro Yesus ngulek “Serau iro dasar be di, tapi kaye serau iro jaweh kanam marat ye, beloh erai ye kate nempuli kanam iro. 35Serau iro beloh kate na pakai jaji pupuk di na hamur te tana. Kawan ulun ngobet daeh. Ko harus keringa iro, pikir se ye apu na dinga ko iro deh.”
Currently Selected:
Lukas 14: LBX
Highlight
Copy
Compare
Share
Want to have your highlights saved across all your devices? Sign up or sign in
Bawo Bible by Beyond Translation is licensed under Creative Commons Attribution-ShareAlike 4.0 License
