Lukas 16
16
Paribasa bendahara ye sa jujur
1Ukah iro Yesus bekisah paribasa li tong kawan murid Da: “Na'an erai ulun sugih ye be bendahara di ngurus harta benda da. Tapi bendahara iro na tenes nengkawus harta ulun sugih iro.” 2Belalu ulun sugih iro no'ok pelos da ngulek, A'ap na'an keringa kaye ko apu nengkawus harta duit a'ap. Aji, ko sa kate li jaji bendahara a'ap, okoi a'ap laporan ngunaw me ko ngurus harta a'ap. 3Ukah iro bendahara ngulek suang aseng da ley, A'ap beloh ketoan se ya harus na ene, leka temangung a'ap pe kuwa a'ap neke gawian a'ap, A'ap beloh kuat begawi ye doyat-doyat ngunaw nyangkul atawa a'ap jaji pengemis. 4A'ap ketoan se ye harus na ene a'ap! Kaye gawian a'ap apu beloh, a'ap sagar ngene koe gawi di kawan ulun hakun ngokoi a'ap runa nono. 5Ukah iro bendahara iro no'ok awus kawan ulun ye be utang tong temangung da. Da nyituk tong ka ulun ye penela sulet: “Senu utang ko tong ka temangung a'ap?” 6Ulek ulun iro, Jatus botol minyak zaitun. Bendahara iro ngulek tong da, He catatan utang ko, golek tu'et belalu tulis kaye ko na'an be utang lime pulu botol minyak zaitun. 7Ukah iro bendahara iro nyituk tong ye bali, Senu utang ko? Ulun iro ngulek, Seribu ti bua gandum. Ukah iro bendahara iro ngulek tong da, He tagihan ko, tulis kaye ko na'an be utang walo jatus kantongan gandum. 8Pas temangung ye keringa se ye na ene bendahara iro ye sa jujur, da ngamung, leka bendahara iro pintar ngene rencana masa depan da. Ihe peteaw kaye kawan ulun nete denia pintar eso be kelakuan sesameh meresia na banding ali kawan ulun ye ma'a.
9Aji, A'ap ngulek tong ko, sebujur ye duit ko sa sagar na'an te ko tarus. Leka iro, awat ulun bali ali se ye na'an te ko te denia ihe belalu be uyang sendro ulun iro. Maka ye pas ko nene empe runa ye kekal, dali sagar na'an te biduh nyamut ko.
Setia suang masalah halus
10Aji, kaye ko setia ali masalah ye halus, maka ko sagar setia te suang tangung jawab ye solai. Tapi kaye ko sa setia suang tangung jawab ye halus, ko ade sa sagar setia suang tangung jawab ye solai. 11Leka iro, kaye ko sa setia makai harta ye na'an te denia ihe, maka Tuhan ngelamen ko di ngurus harta kekayaan ye sebujur ye. 12Yesus nyituk “Nome ye sagar ngokoi tong ka ko harta ko ley?”
13Erai ke ulun batak ripen beloh kate ngelayani due ti temangung, pas wayah ye sendro. Leka da sagar sa rigi ali temangung ye erai belalu mengasihi ye bali atawa da sagar setia tong ka ye erai belalu pe da'ai ye bali. Ali cara ye sameh, ko beloh kate setia tong ka Tuhan belalu beloh kate mahan duit pas wayah ye sendro. 14Pas kawan ulun Farisi keringa engan Yesus iro, dali ngekupe Yesus leka dali serakah ali duit. 15Tapi Yesus ngulek tong dali: “Ko ngene le'en bene te one wae kawan ulun, tapi Allah ketoan pikiran ko da'ai. Allah sa rigi ali ye na anggap meresia penting.
16Semale da Yohanes Pembaptis sulet, ko, kawan ulun Yahudi, nemasu se ye na'an te suang Hukum Musa ali kitab ye na tulis kawan nabi. Tapi nehe, Habar buen Kerajaan Allah apu na ulek, belalu deo ulun ye kakan bene litep tong suang Kerajaan iro. 17Tapi tiap ye na tulis suang Hukum Musa pasti sagar terjadi. Kea murah langit ali denia na pehansur, dari pada erai engan te suang Hukum Musa ye sa sagar terjadi.
18Misal ye, na'an erai ke ulun upo ye sentuar ali sao da belalu peruku ali bawe ye bali, da be zina. Tiap upo ye peruku ali bawe ye apu sentuar. Iro ade na ulek perzinahan.”
Ulun sugih ali da Lazarus ye susah
19Ukah iro Yesus ngulek: “Pas zaman bayuh na'an erai ulun sugih ye be empeng larang bene nelang da ngene acara tiap olo.” 20Na'an ade erai ke ulun ye susah, be aran Lazarus bepenyakit puyu ye be nana nete unuk da. Dati ye kawan ulun ngoit ye tong dani gerbang belai ulun sugih iro. 21Da semer bene ye ngene da man kawan sisa pengokan ye lotu neke meja runa ulun sugih iro man. Belalu ade, kawan koko sulet tong ka ro ngedela penyakit puyu ye be nana da iro. 22Ukah iro, da Lazarus mate belalu kawan malaikat ngoit da tong ka runa ye na hormati te sila da Abraham. Ulun sugih iro deh ade mate ukah iro bangkei ye na lebeng. 23Ukah iro da tulak tong ka runa nono kawan ulun mate di ngema penghakiman. Pas da tamam kesa nare te biduh, da neneng tong ka mo'o belalu da kite da Lazarus tu'et te sila da Abraham. 24Ukah iro ulun sugih iro ngeraring, Bapa Abraham kasihilah a'ap ihe! Siu da Lazarus iro pelitep tempak bua kami tong suang danum belalu siu da di sulet tong ka he di ngonok ye te lola a'ap di peringin ye. A'ap tamam bene menaya te suang apui ihe! 25Tapi da Abraham be engan, tong ulun sugih iro, Anak a'ap ingat dile pas ko kea bolum, ko apu nerima ye buen, tapi da Lazarus nerima se ye da'ai. Tapi nehe da Lazarus apu nerima penghiburan belalu ko mahan menaya ye solai. 26Alasan ye bali ade, na'an luang solai te antara taka. Aji, beloh erai ye kate getah tong ka ko atawa dali ye kakan getah tong ka runa kain. 27Ukah iro ulun sugih iro ngulek tong ka da Abraham: A'ap laku awat tong ka ko, siu ko da tong belai m'a a'ap. 28Leka a'ap be lime ti erai butung upo. Aji dion da tulak belalu ulek tong dali di betobat, di dali sa sulet tong runa ye ponu ali menaya ihe. 29Tapi da Abraham ngulek, Erai butung ko apu be Hukum Musa ali kawan nabi. Dali harus ngeringa se ye na tulis! 30Ulek ulun sugih iro: “Ma Abraham, iro sa sukup di ngene dali betobat. Tapi kaye na'an erai ke ulun ye apu mate sulet pekingat dali, maka dali sagar betobat. 31Tapi da Abraham ngulek tong da, kaye dali sa ngeringa Hukum Musa ali kawan nabi, dali sa sagar betobat mele ulun ye apu mate bolum li di pekingat dali.”
Currently Selected:
Lukas 16: LBX
Highlight
Copy
Compare
Share
Want to have your highlights saved across all your devices? Sign up or sign in
Bawo Bible by Beyond Translation is licensed under Creative Commons Attribution-ShareAlike 4.0 License
