Pangiraan Suku Israel 20
20
Baki’ Musa mabal lo’a batuun
1Mamin dinen di bulan mulakataan, ira ambata anak kanturunanna baki’ Israelen dinen mondok kausa lo’a kasik Sin. Mondok inang lalako’ ira di Kades. Inang barik matena piang Miriam dinen, kakana baki’ Musa. Jaji dakubur inang.
2Jaji nanga lalako’da’ inang, ira tau Israelen dinen na’an mandua’ang danum. Jaji barik babangkulung ira to’ malawan lo’a baki’ Musa nanna baki’ Harun. 3Sipadu ira nanna baki’ Musa, “Labi maam daikam mate memenkam sarata nanna arasairunnam yang mateen inang ijolona arona i Yahuwe. 4Mai daiko mawanu lo’am anak katio’anna i Yahuwe lo’a kasik di’en manyuro’ mate lo’am nanna ambata inatangam? 5Mai daiko mawanu lo’am minsaluan lo’a Mesir lo’a tana’ atolangen, tana’ marekara’? Senika jalu kosan indi’angen. Ambata jenis baras kosan kausa indi’angen, kosan bua’ araan, kosan bua’ anggur, kosan delimaan. Danumpi kosan idua’angen itiang idinyum,” ingka kenang jarumda’ sipaduun nanna baki’ Musa.
6Jaji lamba’ barik baki’ Musa nanna baki’ Harun marantang lo’da’ tau bayu’en lamba’ lo’a mambangan Kakalang Pasidua’ang Kalena nanna i Yahuwe laloang paraba’ kalena dasunsumang lindo’a lo’a tana’en. Laloang paita barik lo’da’ kamaamanna i Yahuwe yang palin arawangen. 7Jaji manjarum barik i Yahuwe lo’a baki’ Musa, 8“Japut dinen tungkaten laloang lamba’ko nanna kakanu i Harun mawa babangkulung lo’a tau bayu’en. Maminna babangkulung tauen manjarumko mameang parinta lo’a batu dinen di aroda’ samuana, laloang to’ daparuar barik lo’in danuma. Na kenang iparuara iko danum dari batuun itiang painyumi lo’da’ nanna ambata gulungan inatangda’,” ingka kenang paba’ina i Yahuwe lo’a baki’ Musa nanna baki’ Harun.
9Mamin dinen, dala tungkat dinen dari arona i Yahuwe awan bua jaruma. 10Laloang dasuro’ lo’a tauen bakumpul di biringa batu dinen kole’da’ duaan. Jaji manjarum baki’ Musa, “Taan talinganin samuanin tau malawanen lo’a i Yahuwe! Ai kalo’in? Arungkam paruar danum dari batu di’en itiang lo’in?” ingka kenang jarum arasina. 11Daangkatang tanganna rabarik, laloang dababalang tungkata lo’a batu dinen. Duang kali dababalang lo’a dinen. Jaji maruar lalo danum bayu’ inang laloang mainyum kausa tau bayu’en nanna inatangda’.
12Jaji mainyum kausana rabarik, poangsi na’an maam nyawana i Yahuwe. Jaji manjarum i Yahuwe lo’a baki’ Musa nanna baki’ Harun, “Na, daiko de’i na’an gugulung kaparasaya’annu lo’ku’. Daiak di’en na’anak awan tauen, bajao’ laanku’. Poangsi laanku’ di’en na’an ipayoang iko di arona tau bayu’en, sampai na’an ilola’ani jaji ikin jarumku’. Ialalo barik di’en daiko na’an kupalaloang mawa lo’a tau bayu’en di’en intama lo’a tana’ kubayaangen lo’da’,” ingka kenang manjarumina i Yahuwe lo’a baki’ Musa.
13Jaji yang adariin awan dinen, inang di mata danum asan yang Meriba ira malawanen lo’ku’ launna di’en, kosan serapi maitaan ona’ tana’ kubayaangen dinen.#20:13 Ratina meriba ilalam jarum Ibrani, ratina sipadu. Inang sipaduna ambata anak kanturunanna baki’ Israel nanna i Yahuwe. Inang lalo i Yahuwe manyuro’ paita lo’a tauen kole’a daia okan awan tau, kole’a daia bajao’ laan lo’a samuana.
Mate barik baki’ Harun
22Jaji tangkat barik samuana ambata anak kanturunanna baki’ Israelen dinen dari Kades mamalin lo’a ukit Hor. 23Inang di ukit Hor barik mainso’ lo’a batas Edom, manjarum barik i Yahuwe lo’a baki’ Musa nanna baki’ Harun, 24“I Harun di’en arung mate malola’ lo’a arabakina. Na’an pande daia intama lo’a tana’ kumeangen lo’a ambata anak kanturunanna baki’ Israel dinen, kole’a daikin duaan malawankin lo’a parintaku’ inang di mata danum Meriba nanga ibabala ikin batu dinen,” ingka. 25“Jaji malako lo’a i Harun nanna anaka dinen, i Eleasar. Awa inait lo’a ukit Hor. 26Mondok ona’ inait inang, malaka’ kain tugas imama i Harun dinen laloang pamakaiang barik lo’a anaka dinen, lo’a i Eleasar. Kole’a i Harun dinen to’ mate, to’ talalo dapasilao’ang nanna arabakina yang maminen mate,” ingka kenang manjaruma i Yahuwe lo’da’.
27Jaji dalola’ani kole’a baki’ Musa, awan bua jaruma i Yahuwe. Inait ira taluun inang di ukit Hor di arona tau bayu’en. 28Mondok inait dinen baki’ Musa barik malaka’ kain imama baki’ Harun dapamakaiang lo’a anaka dinen, i Eleasar. Laloang mate barik baki’ Harun inang di tompok ukiten. Mamin dinen tador barik baki’ Musa nanna baki’ Eleasar dari ukiten. 29Jaji barik maminna barik datamu kole’da’ samuana matena baki’ Harun, laloang maulit kausana tau bayu’en. Tiga pulo’ aso launna maulita.
Currently Selected:
Pangiraan Suku Israel 20: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
