Pangiraan Suku Israel 17
17
Timbukas tungkata baki’ Harun
1Jaji maminna mate ari baki’ Korah, manjarum bapi i Yahuwe lo’a baki’ Musa, 2“Manjarumko lo’da’ ambata anak kanturunanna baki’ Israelen dinen mala tungkatko lo’da’ maira suku. Dua belas tungkat yang arung ialaan. Maira suku kanturunan dari anaka baki’ Israel yang dua belasen dinen arung andian tungkata dari panguluanna tata sera. Jaji di tungkat dua belasen dinen barik arung itulis nanna asanna arabakina. 3Di tungkata suku Lewi dinen arung itulis nanna asanna i Harun. Kole’a arung andian tata sera maira suku kanturunanna anaka baki’ Israel. 4Mamin dinen arung iapis barik ilalam Kakalang Pasidua’ang Kalena nanna i Yahuwe inang di arona kas bukti bayana i Yahuwe, di kosan sidua’ka’. 5Jaji tau kudile’iin dinen itiang imamku’, kayu tungkata kusuro’ tio’ rabarik, kusuro’ asuli. Yang bokanen na’an. Inang datamuna kole’da’ intain ampuna tugas imamen. Nanga kenang atadanga nya’-nya’a baba’ anak kanturunanna baki’ Israelen di’en yang amumut lapoangen lo’u,” ingka kenang manjaruma i Yahuwe lo’a baki’ Musa.
6Jaji manjarum barik baki’ Musa lo’da ambata anak kanturunanna baki’ Israel dinen. Laloang daawa tungkata lo’a baki’ Musa dua belas bayu’a. Maira suku kanturunan dari anaka baki’ Israel yang dua belasen andian tungkat dari panguluanna seraan yang daawaan lo’a dinen. Di antarana andian bea tungkata baki’ Harun. 7Laloang dajaput barik ambata gulungan tungkat dinen kole’a baki’ Musa, dataro’ inang di arona i Yahuwe ilalam Kakalang Pasidua’ang Kalena nanna i Yahuwe, kosanna kas bukti bayana i Yahuwe.
8Di imbara asona dinen barik, baki’ Musa intama bapi lo’a dinen. Jaji dakita tungkata baki’ Harun dinen yang dataro’ inang atasa asanna kanturunan Lewi dinen, mamin asuli. Okan poang asuli, andian mamin timbukasa, mamin bea taungkar timbukasa sapa dua, mamin bea andian bua’ badama. 9Jaji daawa insaluan ambata tungkat dinen lo’a tau bayu’en. Jaji dabele barik kole’da’ laloang dala tungkat diri’a sera-serana.
10Jaji manjarum bapi i Yahuwe lo’a baki’ Musa, “Pole’ barik tungkata i Harun dinen di arona kas bukti bayaku’ nanda’. Dinen arung itaro’ itiang tandana lo’a tau malawanen. Ka’ bea atadanga nya’-nya’a tau yang amumuten lo’ku’, mainto’ na’anna barik ira mate tau bayu’en,” ingka kenang manjaruma lo’a baki’ Musa. 11Jaji dalola’ani bua kole’a baki’ Musa awan jaruma i Yahuwe lo’a.
12Jaji manjarum barik ira anak kanturunanna baki’ Israel dinen lo’a baki’ Musa, “Adu, mateki’ barik. Kosan lagi’ arapannam. 13Intain mainso’iin lo’a Kakalang i Yahuwe tetap mate. Mate kausaka’ ona’,” ingka kenang jarumda’.
Currently Selected:
Pangiraan Suku Israel 17: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
