Pangiraan Suku Israel 21
21
Manalo ira sikayoon nanna banua Arad
1Jaji andian tau suku Kana’an, raja banua Arad yang lalako’en inang di daerah Negeb. Jaji maminna raja dinen mandalinga dongo kole’a ambata anak kanturunanna baki’ Israel dinen lamba’ malola’ dalan lo’a Atarim, daia laloang malawan lo’da’. Sampai andian sapadua tau Israelen dadua’ tingkam. 2Jaji ira tau Israelen dinen basumpa barik mamola baya lo’a i Yahuwe, “Ati’en tau di’en isuro’ang iko ilalam tangannam, banuada’ barik akaus irurun ikam,” ingka kenang bayada’ lo’a i Yahuwe. 3Jaji do’ada’ dinen dadalinga bua kole’a i Yahuwe, dasauti. Tau Kana’an dinen dasera ilalam tanganda’. Akaus datampusi tau dinen nanna banuana. Kosan lagi’. Jaji dameang barik asan lo’a kosan dinen, daasan barik Horma.#21:3 Ratina horma ilalam jarum Ibraniin, kajarian.
Urar tamagaan
4Jaji lamba’ barik ira dari ukit Hor malola’ani dalan lo’a Jawa Dadara’en. To’ mangulilingi lo’a negeri Edom. Poangsi di dalanda’ dinen na’an bataan atena tau bayu’en, 5jaji pajau’ bapi lo’a Alatala, lo’a baki’ Musa. Jaji manjarum, “Maikin mawaan lo’am minsaluan dari negeri Mesir manyuro’ poang mate lo’am indi’angen di kasik baraa’en. Indi’angen kosan rotiin, kosan danum. Alibakkam jaji lo’a jalu kaan di’en. Bapu’kam,” ingka kenang jarumda’.
6Jaji Yahuwe barik manyuro’ mondok lo’da’ ambata urar balasaan yang monotoken lo’da’, kole’a jarumda’ awan dinen. Bayu’ yang mateen kole’a uraren. 7Jaji lamba’ ira lo’a baki’ Musa laloang manjarum, “Daikam di’en maminkam badosa ilalam jarumam pajau’en lo’u nanna i Yahuwe. Do’aangkam barik mainto’ dapanjao’a urar di’en lo’am kole’a i Yahuwe,” ingka kenang jarumda’. Jaji bado’a barik baki’ Musa mando’aang lo’da’.
8Jaji manjarum i Yahuwe lo’a baki’ Musa, “Jaji kenang. Mamolako barik jalu balu’ urar laloang mangkatang inait di pakayuun. Intain barik tau datotok uraren ti’en mamele lo’a urar ipolaan iko dinen, tetap daia tio’,” ingka kenang. 9Jaji baki’ Musa barik mamola urar dari tamagaan, dataro’ ibona pakayuun. Jaji barik tau datotok uraren ti’en mamele lo’a urar tamagaan dinen, tetap daia tio’.
Manalo ira sikayoon nanna i Sihon raja Hesibon nanna i Og raja Basan
21Jaji pantanga’an lamba’da’ barik dinen, paawaang jarum ira lo’a i Sihon rajana tau suku Amori. Jaji jarum dapaawaangen kenang,
22“Jaji daikam mondokam lo’a di’en, to’ mamitakam lo’in paruarangkam lamba’ malaloi negerinin. Daikam na’ankam to’ mangaru lo’in. Na’ankam lempang dari dalanen lo’ umanin, lo’a kobon anggurin. Na’ankam mainyum dari loang palanan danumin. Lamba’kam poang di dalan baraa’en sampai mondok lo’a batas banuanin,”
ingka kenang jarum dapaawaangen dinen.
23Poangsi i Sihon dinen alibak paruarang lo’a tau Israelen malaloi negerina. Jaji mangapulungan balaan barik mamansangi lo’da’ di kasik baraa’en. Mondok lo’a banua Yahas inang barik malawan nanna tau Israelen. 24Poangsi tau Israelen dinen na’an atalo kole’da’. Tau Amori yang ataloon kole’a tau Israelen. Jaji dari sunge Arnon sampai mondok lo’a sunge Jabok, tau Israelen marampas banuada’ tau Amori laloang lalako’ inang. Poangsi na’an mandalit lo’a banuana tau Amon kole’a kuat dajagaina batas negerida’. 25Samuana ambata banuana tau Amori datingkam kausa laloang dalalako’i tamasok banua Hesibon nanna ambata gulungan banua sibiring-biringanen dinen.
......................................
31Jaji ira tau Israelen barik lalako’ inang di tana’ tau Amori.
32Jaji barik baki’ Musa manyuro’ tau itiang manojam di banua Yaeser, laloang barik datingkam ambata banua sibiring-biringanen dinen. Tau Amori yang lalako’en inang akaus dauser. 33Laloang lamba’ bapi ira manuju lo’a daerah Basan. Lamba’ inang, laloang maruar i Og raja Basan dinen nanna ambata balana samuana lamba’ babaris to’ malawan lo’a tau Israelen di Edrei.
34Jaji manjarum i Yahuwe lo’a baki’ Musa, “Ada’kin atakuten lo’a raja dinen kole’a mamin daia kusera lo’a tangannin, ikin lalo ampunaan. Maam balana samuana, maam tana’a, mamin kumeang lo’in. Mamolanin lo’a arung sama yang ianuun ikin lo’a i Sihon rajana tau Amori dinen, tau mangkamen di Hesibonjo dinen,” ingka kenang manjaruma i Yahuwe lo’a baki’ Musa.
35Jaji dauno’ barik i Og dinen sarata anaka, sarata ambata gulungan balana. Kosan lagi’ tunana yang dapalaloang tio’. Laloang dalalako’i barik ambata banua tau Amori indinangen.
Currently Selected:
Pangiraan Suku Israel 21: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
