Di Mulakata 24

Baki’ Abraham manyari babainye itiang bainyena baki’ Isak

1Jaji baki’ Abrahampi atoa barik, mamin sukup umura. Alatalapi mamin pamaam lo’a ilalam samuana urusanna. 2Jaji manjarum baki’ Abraham lo’a pangkama yang palin atoaan, yang manuntuaniin ambata gulungan jaluna. To’ dasuro’ manyari babainye itiang bainyena baki’ Isak. “Na, daiko surukang tangannu inyaunga bangkangku’,” ingka kenang. 3“Basumpako atas asanna i Yahuwe, Alatalaka’ yang mangkamen ibona duniaan nanna galung suanen. Daiko na’an pandeko manyari babainye lo’a tau indi’angen di Kana’an itiang bainyena anakku’. 4Arungko mala bainye lo’a banuaku’, lo’a kawan saparanakku’ itiang bainyena anakku’ i Isak dinen,” ingka kenang baki’ Abraham lo’a suro’anna dinen yang daarapen.

5Jaji mangatoani suro’anna dinen, “Ai lo’a ona’ ati’en babainye dinen alibak kuawa?” ingka kenang. “Ai lo’a, anaku yang kuawaan mamalin lo’a banua asalu dinen?” ingka kenang.

6Jaji dasauti kole’a baki’ Abraham, “Ada’ yang anakku’ iawaan lo’a dinen. 7Sebab ada’ uka’a, kole’a i Yahuwe tentu manyuro’ lo’a malaikata ijolonu itiang mangamasang dalannu. Daikopi barik dapat mala babainye inangen itiang bainyena anakku’. Alatalaka’ di’en yang mangkamen ibona galung suanen, ia bua yang mawaan lo’ku’ dari saona ama’ku’, dari banuaku’ manyuro’ mamalin lo’a di’en. Darantang bayana lo’ku’. Negeri di’en, ingka, to’ dameang lo’a anak kanturunanku’. Tentu daia manggulungi lo’u,” ingka kenang. 8“Poangsi ati’en de’i babainye dinen alibak bua malola’ lo’u, asi poang lo’a dini. Lapasko lo’a sumpaka’ di’en. Ada’ poang anakku’ iawaan lo’a dinen,” ingka kenang jaruma baki’ Abraham lo’a suro’anna dinen. 9Jaji rabarik suro’anna dinen maminna dadalinga jaruma baki’ Abraham dinen, laloang dasurukang dinen tanganna inyaunga bangkanga laloang basumpa.

10Jaji maminna dinen, bakamas barik suro’anna baki’ Abraham dinen. Dala untana baki’ Abraham sapulo’ bayu’a laloang tarangkat. Bayu’ bea gulungan jalu maamen yang daawaan dari nanna baki’ Abraham. Jaji lamba’ manuju lo’a banuana baki’ Nahor dinen di Mesopotamia. 11Jaji mondok barik lo’a banuaan, lo’a loang kali palanan danumen insaluanna banuaan, dasuro’ malingkutut gulungan untana dinen inang kole’a suro’anna baki’ Abraham mainto’ dakule’a tador lo’a tana’en. Mamin pamamalam barik, di waktu gulungan babainyeen biasa lamba’ malapang danum.

12Jaji bado’a suro’anen dinen, “O Yahuwe, Alatala yang dasembaan kole’a paraampuanku’ Abraham. Kamase’iak. Suro’ barasel urusanku’ aso di’en. Kamase’i bea paraampuanku’. Payoangjo pangasaangu lo’a,” ingka kenang. 13“Belejo, daiak akadeng indi’ang ibiringa loang kali palanan danumen insaluanna banuaan. Gulungan anak babainyeen mondok manyan jawina mamin, to’ malapang danum. 14Jaji kenang. Ti’en ona’ manjarumak lo’a anak babainye seraan, Paindorjo dinen jawinu, to’ mainyum danumak, uka’ kenang. Barik dasauti dinen, O’. Mainyumko. Malapang danumakpi. Kupainyumi gulungan untanu, ti’en ingka, inang lalo barik kutamuna pangasaangu lo’a paraampuanku’. Intain poang manyautiin awan dinen, ia dinen ona’ yang itujuangen iko itiang bainyena suro’annu dinen i Isak,” ingka kenang bado’anna suro’anen dinen lo’a Alatala.

15Jaji barik, nampi akaus do’ana dinen, laloang mondok babainyeen sera. Babainye dinen i Ribka asanna, ampuna baki’ Nahor nanna piang Milka, anaka baki’ Betuel. I Nahor dinen kakana baki’ Abraham. Jaji piang Ribka daia manyan jawina. 16Saja bainye maam piang Ribka dinen, anak babainye bungas. Na’an kala’ dakaru babakaan. Laloang barik dinen piang Ribka lamba’ inang tador lo’a loang kali palanan danumen. Mamin malapang danum, inait bapi.

17Jaji maminna dakita awan dinen, babariar dinen suro’anen pasidua’ang kalena nanna babainye dinen de’i. Jaji manjarum lo’a, “Anake, meangak danum dari jawinu dinen,” ingka kenang.

18“Bo, asi ti’en mainyum. Mainyumko Ama’e,” ingka kenang. Bariar bua dapaindora jawina, dameang lo’a suro’anen dinen. 19Maminna mainyum suro’anna baki’ Abraham, “Malaang danumakpi tiang untanu sampai akaus karing nyawana,” ingka kenang anak babainye dinen. 20Bariar bea datungge’anga lo’a ambata pampalung untaan. Maminna dinen tabalik bapi malapang danum. Nampi akaus mainyum dinen untaan, nampi tadang. 21Na’an manjarum dinen suro’anen, mamele poang. To’ dabele ti’en i Yahuwe manyuro’ barasel palamba’anna dinen.

22Jaji maminna de’i akaus mainyum gulungan untaan, daruarang barik antin-antin ingar dari amasen yang borata lima gram satanga’. Daruarang bea dinen galang amas dua yang borata kira-kira saratus sapulo’ gramen. 23Laloang dakatoani barik anak babainye dinen kole’a suro’anen dinen, “Intain asanna ama’, anake?” ingka kenang. Laloang mangatoanipi, “Ai lo’a daikam nanna suang gulungannam ti’kam samalam nannin, sumaka’ te’i?” ingka kenang.

24Jaji barik dasauti kole’a babainye dinen, “Ama’ku’ i Betuel, anaka baki’ Nahor nanna piang Milka,” ingka. 25“O sumaka’ bea! Baraa bea saonam. Erom nanna umpan inatang andian. Samalamkin poang nannam,” ingka kenang jaruma babainye dinen manyautina lo’a suro’anna baki’ Abraham dinen.

26Jaji barik mantuari dinen sunsumang poang kalena manyembana lo’a i Yahuwe. 27Jaji bado’a, “Ipudiko Yahuwe, Alatala yang dasembaan kole’a paraampuanku’ Abraham dinen. Daiko na’an tapalin pangasaangu lo’a paraampuanku’. Balolokko lapoang. Lo’ku’pi maam. Mondok iduluangku’ iko pas jaji lo’a saona sairunna paraampuanku’,” ingka kenang jaruma ilalam do’ana lo’a i Yahuwe.

28Jaji barik maminna dinen babainye dinen laloang arari babariar lo’a saona induna manjarumang jalu adariin de’i. 29Jaji barik andian kakana piang Ribka, i Laban asanna yang lamba’ babariar to’ pasidua’ang kalena nanna suro’anen dinen. 30Kole’a de’i dakitana dinen antin-antinen nanna galangen. Kenang dataantalinga jaruma arina manutul jaruma suro’anna baki’ Abraham. Jaji daia laloang malamba’i suro’anen dinen. Suro’anen dinen akadengpi inang nanna untana di biring loang kali palanan danumen.

31Jaji mondok lo’a dinen, baki’ Laban manjarum, “Na, tau yang daberkatiin kole’a i Yahuwe, ada’ akadenga poang indi’angen. Samalamkin nannam. Andian kosanin inang sarata nanna gulungan untanin. Mamin ikamasang,” ingka kenang manjaruma dinen baki’ Laban lo’a suro’anna baki’ Abraham dinen.

32Jaji barik, maminna dinen, suro’anna baki’ Abrahampi dinen malola’ lo’a baki’ Laban. Mondok lo’a saoen barik, dalayani kole’a baki’ Laban. Dauwatang gulungan jalu daawaan di untaan. Dameang dinen ambata erom, ambata umpan. Daawaang bea danum pangusuk kakiin lo’a suro’anen dinen nanna gulunganna. 33Maminna dinen barik dasorongang jalu kaanen lo’da’. Dasuro’ angkaan dinen suro’anna baki’ Abraham. Poangsi nampi to’ angkaan.

“Na’anakpi to’ angkaan ati’en nampi kututul jalu dapasanangen lo’ku’,” ingka kenang jaruma suro’anna baki’ Abraham lo’a baki’ Laban.

“O’, manjarumangko bea ti’en andian jalu to’ ijarumang,” ingka kenang baki’ Laban.

34Jaji manjarum suro’anna baki’ Abraham dinen, “Iak di’en suro’anna paraampuanku’ i Abrahamak. 35Paraampuanku’ Abraham, okan gampang dapamaama kole’a i Yahuwe. Mamin tau maam barik. Daia bayu’ dombana, bayu’ kambinga, bayu’ sapina. Amas pirakapi bayu’. Pangkamapi bayu’ babaka babainyeen. Bayu’ untana nanna keledaina. 36Jaji i Sara dinen bainyena, mamin paranakang anak babakaan lo’a paraampuanku’ Abraham di atoana. I Isak asanna. Samuana hartana dinen, ambata gulungan kamusana dinen dasera kausa lo’a anaka dinen, i Isak,” ingka kenang. 37“Jaji barik daiak daawa basumpa kole’a paraampuanku’ Abraham. Daiak na’anak pande manyari bainye di tana’ yang dakosaniin inang, di negeri Kana’an, itiang bainyena i Isak. 38Arungak, ingka, manyari anaka sairunna, ingka kenang.

39“Jaji kukatoanang jaji lo’a, Ai lo’a ona’ ati’enak ona’ mondok lo’a dinen, babainye dinen alibak kuawa? 40Jaji manyauti lo’ku’ paraampuanku’ Abraham, Na’an patut, kole’a tentu dagulungiak kole’a i Yahuwe yang kulola’aniin dinen. Tentu malaikata dasuro’ ijolonu itiang mauluang lo’u manyuro’ barasel palamba’annu dinen, ingka. Tentu daiko dapat mala bainye dari anaka sairunku’ itiang bainyena anakku’, ingka kenang. 41Poangsi ati’enko mondok lo’a dinen, ati’en alibak ira mameang lo’u, lapasko dari sumpaka’, ingka kenang manjaruma lo’ku’ paraampuanku’ Abraham.

42“Jaji barik maminku’ mondok aso di’en lo’a loang kali palanan danumen, akadengak. Jaji bado’aak barik, O Yahuwe, Alatala yang dasembaan lapoang kole’a paraampuanku’ Abraham, ti’ko to’ manyuro’ barasel palamba’anku’, kenang kamainya’anku’. 43Na, daiak akadengak ibiringa loang kali palanan danumen, uka’. Ti’en andian ona’ anak babainye tador to’ malapang danum laloang mamitaak danum, Meangak danum dari jawinu, uka’ kenang. 44O’ mainyumko. Malapang danumakpi. Kupainyumi gulungan untanu, ti’en ingka kenang, inang lalo kutamuna anak babainye yang datujuangen kole’a i Yahuwe itiang bainyena i Isak, anaka paraampuanku’, uka’ kenang bado’aku’,” ingka kenang tutulanna suro’anna baki’ Abraham.

45Jaji tutulanpi suro’an dinen, “Jaji barik nanga dinen bado’aku’ di ateku’, nampi akaus jarumku’, mamin mondok i Ribka manyan jawina awan bua do’aku’. Laloang tador malapang danum di loang kaliin. Jaji barik mamita danumak lo’a, Meangak danum, uka’ kenang. 46Babariar bua dapainyaunga jawina. Mainyumko, ingka lo’ku’. Malapang danumakpi. Kupainyumi gulungan untanu, ingka kenang. Jaji mainyumak. Dapainyumi bea gulungan ambata untaku’.

47“Jaji barik maminna dinen de’i manjarumak dinen lo’a, Intainsi ama’, uka’ kenang. Daasan barik amana i Betuel, daasan bea pianga nanna bakina. Maminna dinen laloang kuala antin-antinen kupalakat di ingara. Kuala bea galang amasen kuapis di tanganna. 48Jaji barik laloang sunsumang kaleku’ manyemba sarata mamudi lo’a i Yahuwe, Alatala yang dasembaan lapoang kole’a paraampuanku’ Abraham. Kole’a daia mamin mauluang lo’ku’ manyariang babainye dari sairunna paraampuanku’ itiang bainyena i Isak. 49Jaji barik awan ikin di’en jarumang jaji lo’ku’. Ati’en mainya’kin mamayoang pangasaangin lo’a paraampuanku’, ati’en de’i mainya’kin samujur maam atenin lo’a, jarumang lo’ku. Dinla kujarumangen. Ati’en alibak malola’ani pasana paraampuanku’, jarumang ikin lo’ku’ mainto’ kutamuna palamba’anku’ kayoko’ nanna katoen,” ingka kenang jaruma suro’anna baki’ Abraham lo’a baki’ Labanen dinen.

50Jaji manjarum barik baki’ Laban nanna baki’ Betuel, “Di’en kosan lagi jarumam mainya’ atau alibak. Jalu mamin daurus kole’a i Yahuwe. 51Ti’en awan i Ribka, awa nannu nanga tamba itiang bainyena anaka paraampuannu, awan lalo pasanna i Yahuwe di’en,” ingka kenang jaruma baki’ Laban nanna baki’ Betuel.

52Jaji barik maminna dadalinga jaruma baki’ Laban nanna baki’ Betuel kole’a suro’anen dinen, terus sunsumang kalena lo’a tana’en manyemba lo’a i Yahuwe. 53Laloang bea dinen daruarang gulungan ambata amasen, gulungan ambata piraken, ambata kain, daunjukang lo’a piang Ribka. Sarata dameang bea jalu indaan lo’a induna nanna kakana dinen, baki’ Labanen. 54Mamin dinen angkaan mainyum bea suro’anen dinen nanna ambata gulunganna. Mamin dinen samalam.

Jaji barik makap sera, suro’an dinen asading, “Na, daiak di’en mole’akpi lo’a paraampuanku’,” ingka kenang, to’ tangkat dinen mawa lo’a piang Ribka.

55Poangsi dapase’angpi kole’a dinen kakana nanna induna piang Ribka, “O na’an. Biar lalako’pi yang i Ribkaan daia sikadang. Ambakininpi mole’. Jangka’a dalam sapulo’ aso, baru’kin iparuarang lamba’,” ingka kenang manjaruma.

56Jaji manjarum bapi suro’anna baki’ Abraham dinen, “Daiak di’en, na’anak bua pande itaan. Mamin waktuku’ mole’ kole’a dinen mamin barasel kole’a i Yahuwe palamba’anku’. Paruarangak poang mole’ lo’a paraampuanku’,” ingka kenang.

57Jaji manjarum bapi ira, “Labi maam ikalong babainye dinen, ikatoani jaji iki’,” ingka kenang. 58Dakalong barik piang Ribka dinen, dakatoani, “Ai lo’a, mainya’ko daiko tamba nanna tamatoaan di’en?” ingka kenang.

Jaji barik dasauti kole’a piang Ribka, “Daiak mainya’ak tamba nanna tamatoa di’en,” ingka kenang manyautina lo’a arasairunna nanna induna.

59Jaji barik ira dinen arasairunna paruarang barik lo’a piang Ribka tamba nanna suro’anen dinen nanna ambata gulunganna. Sarata dinen dapalola’ang suro’anen seraan anu manuntuaniin lo’a dari akeke’a. 60Kenang bea piang Ribka dinen dado’aang kole’da’, “Muda-muda daiko dapamaam, adi’e sampai bajuta-juta bayu’a anak kanturunannu. Muda-muda kanturunannu manuduki banuana pangayona padari ira ampunaan,” ingka kenang do’ada’ pamaamen lo’a piang Ribka.

Baki’ Isak nanna piang Ribka siala

61Jaji barik ira dinen piang Ribka nanna suro’anna mauwat lo’a untaan malola’ lo’a tamatoaan dinen de’i. Daawa mole’ barik lo’a paraampuanna.

62Jaji baki’ Isak dinen lamba’ di loang kali Lahai-Roi mole’ lo’a Negeb. Kole’a daia barik lalako’ di Negeb. 63Pamamalamen barik mainjawe baki’ Isak di uman. Jaji lamba’ inang, dabeleang matana, andian bayu’ untaan yang mondoken.

64Piang Ribkapi dinen, dabeleang matana, andian babakaan. Jaji tador lo’a tana’en 65laloang dakatoanang lo’a tamatoaan dinen, “Intain dinen tau lamba’en lo’ka’,” ingka kenang.

“Dinen lalo yang paraampuanku’,” ingka kenang manyautina. Jaji barik terus dala salendangen kole’a piang Ribka datiang paumbuni lindo’a.

66Jaji maminna sidua’ barik, manjarum suro’anen dinen. Datutul kausa palamba’anna lo’a baki’ Isak. 67Mamin akaus datutul, baki’ Isak dinen mawa lo’a piang Ribka lo’a kakalang palamba’a induna. Jaji siala barik ira. Baki’ Isakpi dinen mangasaang lo’a piang Ribka. Baru’ barik maam nyawana baki’ Isak yang susaan kole’a matena induna.

Currently Selected:

Di Mulakata 24: EBE

Highlight

Copy

Compare