Di Mulakata 23
23
Mate Piang Sara barik
1Jaji di umura mamin saratus dua pulo’ tuju taun, 2piang Sara mate di banua Kiryat-Arba. Ia bua dinen banua Hebron asanna di negeri Kana’an. Jaji mondok barik baki’ Abraham manangisi lo’a bainyena.
3Maminna barik dalamba’i bangkayoanna bainyena, baki’ Abraham lamba’ bapi manjarum lo’a ambata urang Het, 4“Daiak di’en tau baru mondokak lo’a banua di’en, tau manumpang poangak. Meangak ikin tana’ mainto’ andian kubura di’en yang tumate bainyeku’,” ingka kenang jaruma baki’ Abraham lo’a panduduk tana’ inangen dinen.
5Jaji manjarum urang Heten manyauti jaruma baki’ Abraham dinen, 6“O, ti’en kenang, kosan jalu mai. Daikam manggapkam lo’u tau yang baraa’en, tau yang maamen. Ile’i poang tana’ yang palin maamen itiang kubura yang tau mateen dinen. Ti’en andian loang kuburam, kosankam mamase’angen lo’u,” ingka kenang jaruma urang Heten lo’a baki’ Abraham.
7Jaji barik akadeng dinen baki’ Abraham di aroda’, datundukang uluna mameang hormata lo’da’. 8Mamin dinen manjarum, “Ati’en tapat iparuarangak ikin mangubur tumate bainyeku’ indi’angen, gulungiak ikin. Kupita lo’in jarumangak lo’a i Epron anaka i Sohar dinen. 9Mamitaak loang batu dinen di tuntung umana,” ingka kenang. “Ragana kubayar nanna patuta. Kudurus di aronin tau atoaan mainto’ andianna barik kuburku’ indi’angen,” ingka kenang jaruma baki’ Abraham lo’a ira panduduk inang.
10Jaji andian bea i Epron dinen aduduk inang antarana ambata anaka i Het. Jaji manjarum i Epron dinen di arona tau bayu’en, yang tau mondoken lo’a baba’ pakar tagapen inang, 11“Tana’ umaan, maam loang batuun dinen, na’an kupet. Daiko kausana. Kumeang poang lo’u itiang kuburanen. Kujarumang di arona gulunganka’ indi’angen,” ingka kenang manyautina i Epron lo’a baki’ Abraham.
12Jaji baki’ Abraham dinen datundukang bapi uluna di arona tauen 13sarata manjarum di bangkulungan urang Heten lo’a i Epron dinen, “Jaji kenang. Taantalinganinjo sikadang. Daiak to’ mamaliak tana’ umaan dinen itiang kuburanen. Kupita poang supaya itarima’ poang ikin duitku’,” ingka kenang jaruma baki’ Abraham lo’a i Epron.
14Jaji manjarum bapi i Epron lo’a baki’ Abraham, 15“Dinen okan jaji ai lo’ka’,” ingka kenang. “Poangsi ragana dinen andian ampat ratus papak duit pirak. Poangsi kosan jalu mai. Sama iki’ bua. Ikubur poang iki’ tumate bainyenu,” ingka kenang manyautina lo’a jaruma baki’ Abraham.
16Jaji dadalinga barik jaruma i Epron kole’a baki’ Abraham, jaji satuju. Laloang dabayar ragana yang daasanen dinen di arona tauen. Datimbang nanna dasinda’ indinangen ampat ratus papak duit pirak.
17-20Samuana dinen dasaksiang kole’a gulungan urang Het nanna tau atoaan yang mondoken lo’a baba’ pakar banuaan. Jaji tana’a i Epron dinen yang di Makpela inang tumbalianen nanna Mamre padari baki’ Abraham ampunaan. Tamasok bea loang batu dinen nanna ambata kayuna. Samuana padari baki’ Abraham ampunaan itiang kuburanen.
Maminna dinen piang Sara terus dakubur inang di loang batu Makpela di banua Hebron dinen.
Currently Selected:
Di Mulakata 23: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
