Di Mulakata 25

Baki’ Abraham mate

1Jaji andian bapi tau dala bainye kole’a baki’ Abraham, i Ketura asanna. 2Andian anaka nanna piang Ketura, i Simran, i Yoksan, i Medan, i Midian, i Isibak, i Suah. 3Baki’ Yoksan dinen andian anaka, i Seba nanna i Dedan. Baki’ Dedan manurunang ambata urang Asur, urang Letus nanna urang Leum. 4Baki’ Midian andian anaka, i Epa, i Eper, i Henok, i Abida, i Eldaa. Samuana dinen kanturunan dari nanna piang Ketura.

5Jaji mondok di matena baki’ Abraham, ambata hartana darantang kausana lo’a baki’ Isak awan anak daarapen. 6Suma poang waktu nanga masinapi tio’jo dinen, andian bea dabagiang memen lo’a ambata anaka babakaan yang anaka nanna ambata arabainyena bokanen. Jaji barik maminna dameang tawa’a, dasuro’ mamalin anaka dinen bagian Kana’an timur supaya bajao’ lo’a baki’ Isak barik.

7-8Jaji baki’ Abraham atoa bea barik. Mamin sukup umura, apupul barik. Maam nyawana di matena. Jaji barik mate malola’ lo’a arabakina. Umura nanga matena dinen mamin saratus tuju pulo’ lima taun. 9-10Dakubur bea dinen dapasilao’ang nanna bainyena, nanna piang Sara. Daantat kole’a baki’ Isak nanna baki’ Ismael, daapis ilalam loang batu Makpela yang maminen dabali dinen lo’a i Epron anaka i Soar urang Heten, tana’ tumbalianen nanna Mamre. 11Jaji barik maminna dakubur dinen, anakapi, baki’ Isaken dinen dapamaam bea kole’a Alatala. Daia lalako’ barik ibiringa dinen loang kali palanan danum Lahai-Roi.

Tutulan kanturunanna baki’ Ismael

12Jaji kenang tutulan kanturunanna baki’ Ismael. Baki’ Ismael dinen anaka baki’ Abraham nanna piang Hagar urang Mesiren dinen, pangkama piang Sara. 13-15Jaji di’en lalo asanna anaka baki’ Ismael yang babakaan talakat nanna yang atoaan mondok lo’a imundiin, i Nebayot, i Kedar, i Adbeel, i Mibsam, i Misima, i Duma, i Masa, i Hadad, i Tema, i Yetur, i Napis, i Kedma. 16Jaji kenang asanna anaka baki’ Ismael dua belasen yang tawa’-tawa’en barik padari suku Ismael yang dua belasen. Samuana malola’ saparanak diri’a, lalako’ di banua diri’a.

17Jaji nanga umura mamin mondok saratus tiga pulo’ tuju taun, baki’ Ismael mate malola’ lo’a arabakina. 18Ambata anak kanturunanna dinen, samuana lalako’ di daerah antarana Hawila nanna Sur. Dinen di batasan Mesir maro lo’a Asur. Kenang bea kanturunanna dinen sipangayoan nanna ambata sairunna bokanen yang kanturunanna baki’ Abraham.

Tutulan kanturunanna baki’ Isak

19Jaji kenang tutulanna ambata kanturunanna baki’ Isak, anaka baki’ Abraham. 20Nanga umura mamin mondok ampat pulo’ taun, baki’ Isak siala nanna piang Ribka. Amana piang Ribka dinen baki’ Betuel, urang Aram yang lalako’en di Mesopotamia.#25:20 Terjemahan Baru = Padan Aram; Kabar Baik = Mesopotamia. Kakana piang Ribka dinen, baki’ Laban asanna, tau inang bua.

21Jaji piang Ribka dinen tamanang, bainyena baki’ Isak. Jaji maminna de’i tamanang, bado’a baki’ Isak mando’aang bainyena mamita anak. Barik dasauti dinen do’ana kole’a i Yahuwe, araunting barik piang Ribka dinen. 22Jaji barik maminna dinen atoa batanga, siumbak-umbakang barik dinen anaka duaan ilalam batanga. Tarasa lo’a piang Ribka pakaji’a dinen, atakut. Jaji dapikir, “Tanda asi ti’ mamin awan dinen?” ingka kenang nyawana. Laloang dinen lamba’ mangatoani lo’a i Yahuwe.

23Jaji manyauti i Yahuwe, “Jaji kenang ratina. Anaku ilalam batangu dinen andian dua. To’ dari bangsa dua. Dari ilalam batangu memen, na’an to’ sikule’ anaku duaan. Yang seraan ona’ bakajung, yang seraan kurang. Yang atoaan ona’ to’ padari suro’anna yang imundiin,” ingka kenang jaruma i Yahuwe lo’a piang Ribka.

24Jaji barik piang Ribka dinen mondok lo’a bulanna, aranak barik. Jaji anak kampit, babaka duana. 25Anaka yang atoaan dinen dabele, dadara’ buluna. Mantuarina dinen babulu-bulu, awan lalo kain bulu inatangen. Jaji daasan barik anaka dinen, i Esau asanna.#25:25 Ratina esau ilalam jarum Ibraniin, arabulu. 26Jaji mondok bapi anaka, yang imundiin dinen manangko’ timbata kakana dinen. Ialalo barik daasan i Yakub asanna.#25:26 Ratina yakub ilalam jarum Ibraniin, pakal-akal. Jaji nanga daparanakanga baki’ Esau nanna baki’ Yakub kole’a piang Ribka, mamin anam pulo’ taun umura baki’ Isak.

27Jaji rabarik mamin baraa dinen anaka baki’ Isak nanna piang Ribka, baki’ Esau dinen pande tapat manyari inatangen, lamba’-lamba’ ilalam jaluun. I Yakub dinen tau basa pamatap daia, tau lalako’ poang di kakalangen. 28Jaji palin dakasaang dinen baki’ Esau kole’a amana. Kole’a mainya’ daia to’ angkaan isi’ inatang dinen. Poangsi baki’ Yakub dinen, ia yang palin dakasaangen kole’a induna.

29Jaji barik, baki’ Esau dinen lamba’ manyari inatangen. Baki’ Yakuben dinen mariko kacang dadara’en. Nampi sasak dinen jalu kaanen, mondok baki’ Esau mole’ manyari inatanga. Mase’ jaji batanga, to’ manggatu’. 30Jaji manjarum lo’a baki’ Yakub, “Meangak jalu dadara’en dinen. To’ angkaanak. To’ manggatu’ak di’en. Mase’ jaji batangku’!” ingka kenang lo’a arina. Ialalo ratina daasan bapi asanna i Esau kole’a tauen i Edom.#25:30 Ratina edom ilalam jarum Ibrani, dadara’.

31Jaji barik dasauti kole’a baki’ Yakub, “Pande. Poang arung ibali nanna tawa’u yang anak atoaan,”#25:31 Ilalam adatda’ anak babaka yang atoaan, ia yang baraa’en tawa’a dari kamusannen nanga matena amana. ingka kenang.

32“Ibali mainya’, dari pada mateak. Ai gunana kole’ku’ tawa’ku’ yang anak atoaan ti’enak mate manggatu’?” ingka kenang kakana dinen, baki’ Esauen.

33Jaji barik manjarum arina dinen, baki’ Yakuben, “Ti’ kenang, basumpaki’ ijolo,” ingka kenang arina, baki’ Yakub lo’a baki’ Esau. Jaji basumpa barik baki’ Esau, daambu’ang tawa’anna awan anak atoaan.

34Jaji barik dameang kole’a arina dinen kacang dadara’en dinen. Dameang bea dinen roti. Mamin angkaan barik, mamin mainyum, terus lamba’. Awan dinen lalo batora dinen baki’ Esau, na’an dahargai tawa’a awan anak atoaan.

Currently Selected:

Di Mulakata 25: EBE

Highlight

Copy

Compare