Palapasang 34

1Jaji manjarum bapi i Yahuwe lo’a baki’ Musa, “Mamolako balok batu nanna paatu sama nanna yang mulakataan dinen. Mamin dinen kutulisang bapi ambata jarum yang di batu joloon, batu ibala’en iko dinen. 2Makapen barik arungko bakamas, inaitko lo’a ukit Sinai. Arungko madap lo’ku’ inang di tompok ukiten. 3Ada’ mawa tauen. Na’an pande paita mantuariin di ukiten kuliling. Ambata inatanginpi ada’ manyari kaana di kaki ukiten,” ingka kenang manjaruma i Yahuwe.

4Jaji dalola’ani kole’a baki’ Musa awan bua jaruma i Yahuwe. Dapola balok batuun nanna paaten sabalu’ nanna batu mulakataan. Laloang makap-makap inaita di ukit Sinai. Daawa balok batu duaan di tanganna. 5Mondok inang ibo, tador barik i Yahuwe ilalam domen laloang akadeng inang nanna sarata manjarumang asanna. 6Jaji malaloi ijolona baki’ Musa sarta manjarumang kalena, “Iak lalo di’en i Yahuwe, Alatala yang mangamase’iin, yang palin maamen ateku’. Balaun na’an timbul arasiku’. Palin mainya’ak mangasaang lo’a tauen. Palin dapatak iparasaya’iin,” ingka kenang i Yahuwe jarumanga kalena. 7“Na’an tapalin pangasaangku’ lo’a tauen baribu-ribu bayu’a. Kuamponi basa ajau’en, ambata basa malawanen, ambata dosaan. Poangsi tau maminen mamola dosaan, na’an kupalaloang. Tetap kudukum dosa tauen sampai mondok lo’a ampuna, sampai mondok lo’a anak ipuit,” ingka kenang i Yahuwe.

8Jaji maminna dakita awan dinen kole’a baki’ Musa laloang dasusumang barik lindo’a sampai mondok lo’a tana’en, manyemba lo’a i Yahuwe. 9“O Yahuwe,” ingka, “ati’en tapat-tapat ikamainya’iku’ iko, tambako lapoang nannam. Sukunam di’en tapat tau bakaras atenam. Poangsi kapisi awan dinen mamponiko kajau’annam, lo’a dosanam. Alakam padari iko ampunaan,” ingka kenang manjaruma baki’ Musa lo’ i Yahuwe.

10Jaji manjarum barik i Yahuwe, “Na, daiak di’en manjarumangak kaputusan bayaku’ kupolaan nannin. Andian jalu kupolaan ona’ ijolona arona urangin samuana, jalu laan-laanen yang na’anen kala’ ipola di negeri tauen kapisi disa-isa inyaunga galung suanen. Maita kausa ona’ ambata tau lalako’ sibiringanen nannin. To’ datamu karajaku’ i Yahuwe yang itiang manggulungi lo’u ambata karaja yang palin manyuro’ tatakauen. 11Lola’ani poang parinta kujarumangen lo’u di aso di’en, pakai ikin. Daiakpi kururu ona’ ambata gulungan suku lalako’en di negeri dinen, ambata urang Kana’an, urang Het, urang Peres, urang Hewi, urang Yebusi.

12“Na, maam-maamkin inang barik. Ada’kin sibayaan nanda’ inangen mamola baya sikamaamanen. Ti’kin sibaya nanda’, ona’ daawakin ajau’. Akarukin awan lalo jalu kule’ taringenkin. 13Ambata kosanda’ manyemba jaluun arung irarak ikin. Ambata batu jalu dasembaan arung ibobor ikin. Ambata pakayu yang dala manyemba lo’a Asera arung itabang ikin. 14Ada’kin manyemba jalu bokanen. Iak poang yang pandeen isemba. Kole’a iak di’en i Yahuwe, Paimboro asanku’. Daikin kusama’ang awan bainyeku’. Mainya’ak maimboro lo’in. Kupase’angkin jaji malola’ lo’a bokanen,” ingka kenang.

15“Maam-maamkin. Ada’kin sibaya nanna tau lalako’en di negeri dinen mamola baya sikamaamanen. Kole’a ona’ ira dinen ti’en mangalibakang lo’ku’ laloang mamola pamindaraan lo’a jalu dasembaan kole’da’, tentu dakampitangkin. Tentu to’ tambakin barik angkaan jalu dapamindaraangen dinen. 16Kenang bea ati’en anak babainyeda’ iala ikin, ipasialaang nanna araanakin babakaan, ona’ babainye dinen ti’en mamin mangalibakang lo’ku’ tentu mamola pamindara lo’a jalu dasembaan kole’da’. Tentu talola’an bea araanakin mamola awan dinen. Dinen lalo yang kukalibakangen. Ialalo kupase’angkin sibaya nanda’,” ingka kenang i Yahuwe lo’a baki’ Musa.

....................

28Jaji baki’ Musa dinen lalako’ inang di ukiten nanna i Yahuwe, ampat pulo’ aso, ampat pulo’ malam. Launna dinen angkaan na’an, mainyum na’an yang baki’ Musaan. Akaus datulisang di balok batuun dinen samuana ambata jaruma Alatala ilalam kaputusan bayana yang dapolaan nanna ambata anak kanturunanna baki’ Israel, ambata Ukum Sapulo’en dinen.

Araranak arawanga lindo’a baki’ Musa

29Maminna dinen, tador baki’ Musa dari ukit Sinai dinen mawa balok batu duaan di tanganna. Tadora dinen, nampi datamu lindo’a dinen arawanga. Araranak dinen lindo’ arawanga kole’a maminna sijaruman nanna i Yahuwe de’i. 30Jaji dakita barik kole’a baki’ Harun nanna ambata anak kanturunanna baki’ Israel dinen, arawang lindo’a. Jaji atakut mainso’i lo’a. 31Poangsi dakalong barik ira kole’a baki’ Musa. Jaji mole’ balik ira baki’ Harun nanna ambata panguluanen. Laloang baki’ Musapi barik manjarum lo’da’. 32Maminna dinen, mainso’i kausa barik ira tau bayu’en. Jaji baki’ Musa daia manjarum lo’da’ barik, manjarumang samuana ambata parintana i Yahuwe yang dajarumangen lo’a inang di ukit Sinai.

33Jaji maminna akaus dajarumang lo’da’ ambata parintana i Yahuwe laloang damumbuni barik lindo’a nanna kainen. 34Poangsi ati’en to’ intama madap lo’a i Yahuwe dabae’ang barik kain mumbuniin dinen sampai daia maruar bapi. Di maruara barik dinen manjarumang lo’a ambata anak kanturunanna baki’ Israel dinen ambata jarum parintana i Yahuwe, 35dakita lindo’a dinen arawang jaji damumbuni barik lindo’a nanna kainen launna nampi intama bapi madap lo’a i Yahuwe. 2Kor. 3:18.

Currently Selected:

Palapasang 34: EBE

Highlight

Copy

Compare