Palapasang 35
35
Paririo tau Israelen mawa pameanga lo’a Alatala
4Jaji manjarum barik baki’ Musa lo’da’ samuana ambata anak kanturunanna baki’ Israel, “Jaji kenang jaruma i Yahuwe, 5Bele ikin antara jalu ijaputen ikin ai poang yang pandeen itiang pameangin lo’a i Yahuwe. Laloang kapulungang ikin. Intain poang mainya’en arung mawa lo’a i Yahuwe pameanga ambata alat di’en,
“ambata barang amas, barang pirak, barang tamagaan,
6“ambata banang bus warna biru, warna kakalamuntingen, warna dadara’ toaan,
“ambata lenan alusen nanna bulu kambingen
7“ambata kulit domba lakiin yang maminen imeang warna dadara’en,
“ambata kulit lumba-lumba,
“ambata kayu akasiaan
8“ambata inyak saitunen itiang lo’a palitaan,
“ambata bumbu pamarok inyak itiang malulukiin jalu ipasilaanangen itiang lo’a i Yahuwe,
“ambata bumbu pamarokang jalu maamen bauna itutungen,
9“ambata batu indaan yang itiang ipalakat di epod nanna kain panutup arona imamen dinen,
“kenang alat itarima’en itiang pameangin,” ingka kenang manjaruma i Yahuwe yang dapamondokangen kole’a baki’ Musa.
10“Jaji intain poang andianen panamuna arung mondok itiang mamola ambata gulungan jalu dasuro’ pola lo’ka’ kole’a i Yahuwe. Yang arung ipolaan kenang.
11“Itiang lo’a kakalang palamba’en, ambata kainna nanna tudunga, ambata kaita, ambata kadengan siringen nanna lentanganna, ambata pakayuna nanna dudukanna.
12“Mamin dinen, kas bukti kaputusan baya ambata kayu pamikulen tolopa kosan maurusi amponan dosaan, nanna kain manyiringiin lo’a.
13“Maminna dinen, meja panyorongi roti di arona i Yahuwe, kayu pamikulen, ambata alat ibona mejaan nanna roti isorongangen.
14“Mamin dinen, dudukan palitaan yang itiang marawangi kakalangen nanna ambata gulungan alata, palitana nanna inyak palitaan.
15“Mamin dinen, kosan panutung kamanyanen, kayu pamikulen.
“Mamin dinen, inyak itiang malulukiin jalu ipasilaanangen itiang lo’a i Yahuwe.
“Jalu maamen bauna yang itutungen.
“Mamin dinen kain tirai yang di mambangan kakalanga i Yahuwe.
16“Mamin dinen, kosan panutung pamindaraan, ringka’a yang ipolaan dari tamagaan, kayu pamikulen, nanna ambata gulungan alata.
“Mamin dinen, basikom baraa’en yang ipolaan dari tamagaan nanna dudukanna.
17“Mamin dinen, ambata kain tiraien, pakayu nanna dudukanna itiang mamola pakar kulilinga kakalanga i Yahuwe.
“Mamin dinen, kain tiraien itiang lo’a baba’ mambanganen lo’a pakaren.
18“Mamin dinen, undam tamagaan yang itiang panjaratan tali manaanen lo’a kakalangen nanna pakara, tali manaanen dinen.
19“Mamin dinen, ambata anaman kainen yang dapakaien kole’a imamen launna bakarajana ilalam kakalanga i Yahuwe, maam yang kusus itiang lo’a i Harun imam baraa’en, kenang bea kain dapakaien kole’a anaka launna daia mawa tugasa awan imamen, kenang ambata alata yang arung ipolaan,” ingka kenang jaruma i Yahuwe yang dapamondokangen kole’a baki’ Musa.
20Jaji maminna barik dadalinga awan dinen kole’a ambata anak kanturunanna baki’ Israel dinen laloang pambar kausa rabarik lo’a kakalanga sera-serana 21mangamasang jalu to’ dameangen lo’a i Yahuwe. Intain poang mainya’en, yang tatariken ilalam atena to’ mameang, mondok barik mawa ambata pameanga lo’a i Yahuwe itiang alat mamola Kakalang Pasidua’ang Kaleen nanna i Yahuwe, ambata alat to’ dapakaien inang itiang mawa karaja dasuro’angen kole’a i Yahuwe, ambata kain yang kusus ipakaien itiang bakaraja inangen. 22Intain poang mainya’en, babaka babainyeen mondok kausa barik mawa ambata ayu’ amasen bayu’en baranana, ambata manik, ambata galang sunsum antin-antinen nanna barang amas bokanen. Laloang datanggeang ijolona arona i Yahuwe itiang pameangda’ lo’a.
....................
Currently Selected:
Palapasang 35: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
