Palapasang 33
33
Alatala manjarumang kalena
1Jaji manjarum barik i Yahuwe lo’a baki’ Musa, “Rantang barik kosan di’en, ikin nanna tau iduluangen iko, yang iawaan minsaluan dari negeri Mesir. Lamba’ko lo’a kosan kubayaangen lo’a arabakinin baki’ Abraham, baki’ Isak nanna baki’ Yakub, yang kubayaangen nanna jarum sumpaku’. Tana’ negeri dinen, uka’, kumeang lo’a ambata anak kanturunannu, uka’ kenang lo’da’. 2Malaikatku’ kusuro’ lamba’ ijolonin itiang mauser lo’a ambata suku inangen, ambata urang Kana’an, urang Amori, urang Het, urang Peres, urang Hewi nanna urang Yebusi. 3Lamba’i ikin negeri palin baraselen dinen. Poangsi daiak, na’anak lagi’ tamba nannin. Ratina na’anku’ tamba daiak, kole’a lolo to bakarasa atenin. Ungka’en ona’ di tanga’ dalanen timbul arasiku’, sadinga poang kutampusinin,” ingka kenang manjaruma i Yahuwe lo’a baki’ Musa, dasuro’ jarumang lo’da’.
4Jaji barik maminna dadalinga dongo ajau’en awan dinen kole’da’ tau bayu’en, susa tapat ateda’. Kosan tau mamakaien ayu’ amas piraken barik kole’a lasana susana atena. 5Kole’a dadalinga jaruma i Yahuwe de’i lo’a baki’ Musa, “Jarumangjo lo’a ambata anak kanturunanna baki’ Israel, Daikin bakaras to atenin. Kapi sikadang poang launna tambaku’ nannin, ungka’enkin kutampusi. Na, leka’i ikin ambata ayu’in. Kupikirpi ti’ ai lo’a urusanku’pi nannin, iko kenang,” ingka kenang manjaruma i Yahuwe lo’a baki’ Musa. 6Jaji daleka’ barik ambata ayu’ amas pirakda’ di tangkatda’ dari ukit Sinai.
Dapakadeng Kakalang Pasidua’ang Kaleen nanna i Yahuwe
7Jaji baki’ Musa dinen biasana pakadeng kakalang palamba’en bajao’ kakapit lo’a banuaan. Daasan barik Kakalang Pasidua’ang Kaleen nanna i Yahuwe. Intain poang yang paruluun, yang andian jalu to’ dakatoanang lo’a i Yahuwe, lo’a dinen lamba’a, lo’a Kakalang Kosan Pasidua’ang Kaleen nanna i Yahuwe insaluanna banuaan. 8Jaji biasana nanga lamba’a baki’ Musa to’ intama lo’a Kakalang Pasidua’angen Kaleen nanna i Yahuwe dinen, dakita kole’a tauen, laloang akadeng kausa banuaan di baba’ mambanganen kakalangda’ tata sera. Mamele kausa lo’a baki’ Musa sampai daia intama barik lo’a kakalang dinen. 9Maminna intama baki’ Musa ilalam, laloang mondok di aset pakayu domen lalako’ di baba’ Kakalang Pasidua’ang Kaleen nanna i Yahuwe. Launna sijarumanna i Yahuwe nanna baki’ Musa inang, na’an lagi’ anyap pakayu domen dinen. 10Jaji ti’ mamin dakita pakayu domen inang di baba’ Kakalang Pasidua’ang Kaleen nanna i Yahuwe. Manyemba kausa barik urang Israelen inang di baba’ kakalangda’ sera-serana. 11I Yahuwe dinen sijaruman lindo’ sama lindo’ nanna baki’ Musa, awan lalo tau sijarumanen nanna kawanna. Mamin akaus sijarumanna, laloang mole’ balik baki’ Musa intama di banuaan, poangsi baki’ Yosua anaka baki’ Nun, anak buana baki’ Musa, daia lalako’ lapoang inang di Kakalang Pasidua’ang Kaleen nanna i Yahuwe. Na’an takisik dari kosan dinen. Kenang kabiasaanna.#33:11 Kakalang di’en dapakai sikadang, launna nampi adari kakalang i Yahuwe yang dasuro’ pola lo’da’.
Baki’ Musa maita kamaamanna i Yahuwe yang palin arawangen
12Jaji manjarum baki’ Musa lo’a i Yahuwe, “Jaji jarumu lo’ku’ launna di’en, manyuro’ko lo’ku’ mauluang tau banua di’en. Poangsi nampi balin ijarumang lo’ku’ intain yang isuro’angen iko itiang tamba nanku’. Mangilalaak tapat lo’u ikoen. Sasau nyawaku’ lo’u, iko kenang lo’ku’. 13Na, ati’en tapat-tapat ikamainya’iku’, parajariakjo mainto’ kutamuna malola’ani panamunu. Parajariak mainto’ maam jaji sikilalaku’ nannu, mainto’ ikamainya’iku’ lapoang iko,” ingka kenang. “Arung iparandam iko kole’a tau bayu’en di’en mamin lalo padari anak katio’annu,” ingka kenang manjaruma baki’ Musa lo’a i Yahuwe.
14Jaji manyauti barik i Yahuwe, “Maam dini. Iak sarataan nannu. Iak mawaan lo’u mandua’ang sangarianen yang maamen,” ingka kenang lo’a baki’ Musa.
15Manyauti barik baki’ Musa lo’a i Yahuwe, “Na, dinen lalo yang maamen. Ati’enko na’an tamba nannam, ada’ manyuro’en lo’am takisik dari kosan di’en. 16Ai lo’a datamuna kole’a tauen ikamainya’inam iko, ikam nanna ambata anak katio’annu, ti’ na’anko lamba’ nannam. Ai bedanam nanna ambata suku bokanen inyaunga galung suanen ti’ na’ankam iduluang iko?” ingka kenang manjaruma baki’ Musa lo’a i Yahuwe.
17Jaji manjarum barik i Yahuwe, “Maam. Awan bua jarumu dinen. Tambaak bua nannu, kole’a sasau nyawaku’ lo’u, kole’a maminko kukilala tapat-tapat. Asannu mamin kukilala, mamin kutamu kalakuannu,” ingka kenang.
18Jaji manjarum barik baki’ Musa, “Na, paitangjo lo’ku’ kamaamannu yang palin arawangen mainto’ kukitana,” ingka kenang.
19Jaji manyauti barik i Yahuwe, “Ona’, kamaamanku’ yang palin arawangen kupaitang lo’u, kusuro’ malaloi ijolonu. Inang ijolonu barik kujarumanga asanku’. Iak lalo di’en i Yahuwe yang maile’iin. Intain kukamase’iin to’ kuamponi, tau dinen kuamponi. Intain kukamase’iin to’ kugulungiin, tau dinen kugulungi,” ingka kenang. 20“Poangsi malaloiku’ dinen, daiko na’anko pande maita lindo’ku’ kole’a intain mantuariin maitaan lindo’ku’, pasti daia dinen mate,” ingka kenang. 21Jaji manjarum. “Andian batu mainso’en lo’a di’en. Inang poangko akadengen, di batu dinen. 22To’ kulaloi ona’ inangen, kuapisko ilalam loang batuun, laloang kukaput loanga nanna tanganku’. Ti’ mamin kulaloi batu dinen, 23baru’ kupasut tanganku’. Baru’ ibele iko balakangku’. Poangsi lindo’ku’ na’an pande ikita iko,” ingka kenang manjaruma i Yahuwe lo’a baki’ Musa.
....................
Currently Selected:
Palapasang 33: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
