مَرقُس 7
7
چِه چیی آیمِنِه نجس مُکُنَه
1ایسه،وختی علمای فِرقِۀ فَریسی واردِ عده ای اَ معلما تورات که اَ اورشلیم آمیَ ویِن دُورِ عیسی جمع شوئِن، 2دییِن بعضی اَ شایِردا عیسی وا دَسا نَجِس، یعنی نَشُشتَه، نو مُخورن. 3وِرِ ایکه فَریسیا وُ تمام یهودیا، وِ پیروی اَ مشایخ وِ طبق رَسمِ تَطهیر تا دَساشُونِه نَشُورَن، غِذا نِمُخُورن. 4هَمی که اَ بازار میان، تا خُیِشُونِه خُو نَشورَن چییِ نِمُخُورن. وُ خیلی اَ رسوم دیَر هَم وجا میارَن، مَثِ شُشتَنِ دُوریا وُ دیگاُ ظَرفا مِسی وَ میز وُ صَندلیا. 5پَ فَریسیا وُ معلما تورات اَ عیسی پُرسیِیِن: «وِرِ شی شایِردایِ تُو وِ رَسمِ مشایخ رفتار نِمُکُنَن وُ وا دَسا نَجِس نو مُخُورن؟» 6عیسی وِشو جُواو دا: «اِشعیای نبی دِبارَ شما ریاکارا چَنی خُو گُفتَه! اوجور که نوشته شیَ:
”ایی قُوم وا لویاشو عزتمه دارَن،
امّا دلِشو اَ مَه دورَ.
7اونا بیخودی مَنِه عبادت مُکُنَن،
وُ تَعلیمِشو چیی بغیر احکامِ بَشری نیسا.“
8شما دستوراتِ خدانِه کنار هَشتِین وُ رَسمِ رُسوم بشری نِه وجا میارید.»
9اوسِه وِشو گُفت: «شما وا زِرَنگی دستور خدانِه مَلید کنار تا آیین خُیِتُنه پایدار کنید! 10وِرِ ایکه موسی گُفت، ”قُرب وُ عِزَّت بُواَ وُ نِنَه خُیِتِه نیا دار،“ وُ هَمیجور ”هرکَه وِ بُواَ یا نِنَه خُیِش ناسزا بُوءَ الوَته باید کشتَه بَشه.“ 11امّا شما مُویید آیِم مِتُونهَ وِ بُواَ یا نِنَش بُوئه: ”هر چیی که قِرارَ اَ مَه وِ شما بَرَسَه، وَخفَ، یعنی وِ خدا دادَه شیَ“ 12اوسِه دیَه نِمَلید هوچ کاری وِرَ بُواَ یا نِنَش کُنَه. 13شما هَمیجور وا رَسم رُسوم خُیِتو که اونان وِ بقیه هم یاد میید کلام خدانِه باطل مُکنید وُ اَ ایی جور کارا زیاد مُکنید»
14عیسی یِه دَفَعه دیَر مَردِمِ نِه هِنا کِرد وَرِ خُیِش وُ گُفت: «هَمَتو وِ مَه گوش بَئید وُ اینِنِ بَفمید: 15هوچ چییِ دِ بیرون اَ آیِم نیسا که بَتونهَ وا رَفتن وِ مینِ آیِم اونِه نجس کُنه بَلکه اُوچیایی که اَ مینِ آیِم میا دَر، اونَ که آیمِ نِه نجس مُکُنَه. 16هرکَه گوش شِنوا دارَه، بَشنُوَ!»
17بَعدِ ایکه عیسی اَ مَردِم سَوا شد وُ رَفت وِ خونَش شایِرداش معنی مَثَلِنِ نِه ازش پُرسییِن. 18عیسی وِشو گُفت: «پَ شمانَم نِمِفَمید؟ مَه نِمِنید اُوچیی که مُوخورید نِمِتُونه آیمِ نجس کُنَه 19وِرِ ایکه خوراک وا قلب وُ جونِتُ کاری نَرَ بلکه مِرَ مینِه شِکَم وُ بَعد دفع مِشَه.» وُ ایجور عیسی وا ایی صُوَت تمام خوراکانِ پاک اعلام کِرد. 20او دِ ادامه گُفت: «اُوچیی که اَ دِل وُرمیسَه، اونَ که، آیِمِه نجس مُکُنَه. 21ایناَ اُوچیایی که اَ وجود وُ دلِ آیِم وُرمیسَه: فکرای بد، بیعفتی، دُزی، قتل، زِنا، 22طمع، شِرارَت، حُقَه، هرزِییی،حسودی،بُهتان،تکَبّر وُ حماقَت. 23تمام ایی بدیا اَ دِل آیِم دِرمیا وُ اونِه نجس مُکُنَه.»
ایمان زَنی که یهودی نَوی
24عیسی اونچونِ ترک کِرد وُ رَفت وِ ناحیَه صور و صِیدون. رَفت وِ خونه ایی؛ امّا نماخاس هوشکه واخَور با. وا ایی حال نَتُونِس خُیِشِه قایِم کُنَه. 25زَنی که دُختَر کُوچوکِش روحِ بَد داشت،همی که شِنُفت او،اونچِونَ فِورَن آما اِفتا وِ پاآش. 26او زَ که یهودی نَوی وُ اَ مَردم فینیقیۀ سوریَه بی، وِعیسی عیزِ التماس کِرد که دیوِ نِه اَ دُختَرِش بیارَ دَر، 27عیسی وِش گُفت: «بَل اوَل بچه آ سیر بَشَن وِرِ ایکه رَوا نیسا که نُونِ اَ بچِه آ بِیری وُ بَنازی وَرِ سی یا.» 28اما زَ جُواو دا: «ای آقا وا ایی حال حتّی سی یا یَم دِ پا سُفرَه اَ خُوردَ نُونا بچه آ مُخُورَن.» 29عیسی وِش گُفت: «وِ خاطر ایی حرفت بَرو که دیو اَ دختَرِت آما دَر» 30او زَ هَمی که رَسِس وِ خونَش دیی که دُختَرِش دِ رَختِخُو خُفتیَ وُ دیو ازِش دِرآماَ دَر.
عیسی یه مرد کَر وُ لالِ شفا میَه
31عیسی اَ منطقَه صور وُریَشت وُ اَ راءِ صِیدون رَفت طرف دریاچَه جلیل،که اَ مینِه منطقَه دِکاپولیس رَد مِشُد. 32دِ اونچو مردی نِه اُوُردِن وَرِش که هَم کَر بی و هَم بِر بی. عیزِ التماس کِردِن وِعیسی تا دَسِشِه بَلَ رو او. 33عیسی او مَردِنِ اَ مینِه جِمیعت اُوُرد دَر وُ بُرد کناری وُ کِلِکاشِ هَشت دِ گوشا او مرد. اوسِه تُفکَه اِناختُ زِوونِه او مردنِ لمس کِرد. 34اوسِه سیل آسِمو، کِردُ آهی کَشی وُ گُفت: «اِفاتاح!» - یعنی «وا شو» 35گوشا او مرد وا شُد وُ زِوونِش سالم شد وُ تُونِس وِ راحتی صُوَت کُنه. 36عیسی اونان منع کِرد که ایی جریانِه وِ کِسی نوئَن. امّا هرچی بیشتَر مَنعشو مِکرد بیشتَر چِوُ ایی جَریانِ مِناختِن. 37مَردِم وا حیرَتِ زیاد مِگُفتن: «هر چی او کرِدَ، خُوَ؛ کاری کِردَ حتّی کَرا مِشنوئَن وُ لالا صُوَت مُکُنن!»
Currently Selected:
مَرقُس 7: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
