مَرقُس 8
8
خوراک دییَن وِ چار هزار نَفر
1دِ او روزا یِه دفعه دیَر جَمیعَتِ زیادی جمع شیَ وین وُ وِ خاطر ایی کهِ چی وِرَ خُوردِن نَشتِن عیسی شایِرداشِ هِنا کِرد وُ وِشو گفت: 2«دلِم وِرَ ایی مَردِم مِسوزَ الانَ سِه روزَ که وا مَنَن وُ چیی وِرَ خُوردِن نَرَن. 3اَیَر اونان گُسنَه بَفِرسم تا بَرن خونَشو دِ را اَ پا مِفتَن، وِرِ ایکه عده ای شو اَ را دوری آمییَن.» 4شایِردا دِ جُواو گُفتِن: «دِ ایی بیاوُو وِرَ سیر کِردَنِه اینا نو اَ کُجا بیاریم؟» 5عیسی پُرسی: «چَن تا نُو دارید؟» گُفتِن: «هف تا نُو.» 6اوسِه وِ مَردِم دستور دا تا بَنیشَن رو زِمی. اوسه هف تا نُونِ نِه گِرِفت وُ بَعدِ شُکرگزاری، تیکهَ تیکهَ کرِد وُ وِ شایِرداش دا تا بَلن وَرِ مَردِم؛ شایِردا هَم ایی کارِ کِردَن. 7چَن تا مایییِ کُوچوکَم داشتِن. پَ عیسی اونانِ برکت دا وُ گفت: بَلَن وَرِ مَردِم. 8هَمشو خُوردِن وُ سیر شوئِن وُ هف تا سَوَدم پر اَ خُوردَ نونا باقیمُنهَ جمع کِردَن. 9دِ اونچو نَزیکِه چار هزار نَفر بییِن. او وَخت عیسی مَردِمِ نِه مُرخص کِرد. 10وُ فِورن وآرد شایِردا سُوآرِ قایق شد وُ رَفت وِ ناحیۀ دالمانوتا.
درخواسِ یِه نِشُونَ آسِمُونی
11علمای فِرقِۀ فَریسی آمان وَرِ عیسی وُ شروع کِردِن وِ بَحث کِردَن. اونا وِرَ اِمتِحان یِه نِشُونه آسِمُونی ازِش خواسِن. 12امّا عیسی آهی اَ دِل کَشی وُ گُفت: «چُنَ ایی نسل یِه نِشُونَه ماخا؟ وِ راسی وِ شما مُوئِم، هوچ نِشُونِه ایی وِشو دادَه نِمِشهَ.» 13اوسِه اونان تَرک کرد وُ هَنی سُوآرِ قایق شُد وُ رَفت اوطرف دریا.
خمیرمایَه فَریسیا وُ هیرودیس
14شایِردا فراموش کِردَ وین وا خُیِشُو نُو وُردارَن، وُ دِ مینِه قایق یِه نُو بیشتَر نَشتِن. 15عیسی وِشو هشدار دا: «حَواسِتو با اَ خمیرمایه فَریسیا وُ خمیرمایه هیرودیس دوری کُنید.» 16شایِردا دِ باره ایکه نُو نَرَن شروع کِردِن وِ گَفت وُ لُفت. 17عیسی که اینِ فَمِسی، وِشو گُفت: «چُنَ دِ باره ایکه نُو نَرید وا هم گُفتُ لُفت مُکُنید؟ مَیَر هَنی نِمِنید وَ درک نِمُکُنید؟ مَیَر هَنی دلتو سَختَ؟ 18یعنی چِش دارید وُ نِمُوینید وُ گوش دارید وُ نمِشنُویید؟ یعنی وِ یاد نَرید ؟ 19وَختی که پَینش تا نُونِ وِرَ پَینش هزار نَفر تیکهَ تیکهَ کِردِم، چَن تا سَوَد پُر اَ خُوردَ نُونا باقیمُنهَ جمع کِردید؟» گُفتِن: «دُوآزَ سَوَد.» 20«وُ هَمیجور وَختی که هف تا نُونِ وِرَ چار هزار نَفر، چَن تا سَوَد پر اَ خُوردَ نوُنا باقیمُنهَ جمع کِردید؟» گُفتِن: «هف تا سَوَد.» 21او وَخت عیسی وِشو گفت: «یعنی هَنیَم نِمِفَمید؟»
شفا مرد کور دِ بِیتصِیْدا
22وَختی که رَسِسِن وِ بِیتصِیْدا، عده ایی، مردِ کُوری نِه اُوُردِن وَرِ عیسی، وا عیزِ التماس که دَس بَلَ قَش. 23عیسی دَسِ او مرد کورنِه گرفت وُ اونِه اَ دهات بُرد دَر. اوسِه تُفکَهشِه اِناخت رو چشا او مردُ دَساشِ هَشت رو چِشاش وُ پُرسی: «چیی مُویینی؟» 24او مرد سَرِشِ بُلَن کِرد وُ گُفت: «مرَدِمِ نِه مِثِ دارُ درختایی مُوینِم که را مِرَن.» 25پَ عیسی یِه دفعهَ هَنی دَساشِ هَشت رو چشا او مرد. اوسِه چِشاش وا شُد، بینایی خُیِشِه وِ دَس اُوُرد، وُ همه چی نِه خُو مِدی. 26عیسی رِاییش کِرد وِ خُونَه وُ گفت: «دیَه وِ دِه وُرنیَرد.»
اعتراف پِطرُس دِباره عیسی
27عیسی وآردِ شایِرداش رَفت وِ داهاتا اطراف قیصریۀ فیلیپی. دِ مینِه را اَ شایِرداش پُرسی: «وِ نظرِ مَردِم مَه کیِم؟» 28اونا وِش جُواو دان: «عده ای موئَن یحییِ تعمیددَهَندِه ایی بعضیا موئَن ایلیاییِ نبی وُ باقیَم موئَن یکی اَ پِغَمَرایی.» 29اما عیسی اَزِشو پُرسی: «شما چی مُوئید؟ وِنظرِ شما مَه کیِم؟» پِطرس جُواو دا: «تُو مسیح موعودی.» 30عیسی اونانِ سَخت مَنع کِرد که دِبارَ او وِ کِسی چی نُوئَن.
پیشگویی عیسی دِ باره مُردِن وُ زِنَه شیَن خُیِش
31عیسی شروع کِرد وِ تعلیم دییَن،وِ اونا گفت که: لازمَ پسر انسان عِذاو زیادی بُوینهَ وُ اَ طرف مشایخ وُ سرانِ کاهِنا وُ معلما تورات رَد با، کشتَه بَشَه وُ بَعدِ سِه رو زِنَه بَشَه. 32وَختی که عیسی اینِنِ آشکارا گُفت پطرس اونِه بُرد کناری وُ شروع کِرد وِ مِنا کِردَنش. 33امّا عیسی روشِ وُریَشتُن سِیلی وِ شایِرداش کِرد وُ پطرس نِه مِنا کِرد وُ گُفت: «اَ مَه دور با، ای شِیطُو! وِرِ ایکه فِکرای تُو انسانیَ نَه خدایی.»
34اوسِه مَردِمِ نِه وآردِ شایِرداش هِنا کِرد و وِشو گُفت: «اَیَر یکی بَخوا بیا دُمِ مَه باید خُیِشِه حاشا کُنه صلیبِ خُیِشِه وُر دارَه وُ دِ دُمِ مَه بیا. 35وِرِ ایکه هر کَه بَخوا جُونِ خُیِشِه نجات بَیه، اونِ اَ دَس مییَه امّا هر کهَ وِرَ خاطرِ مَه وُ وِرَ خاطرِ انجیل جُونِشِه اَ دَس بَیَه اونِ نجات مییَه. 36وِرِ آیِم چه فایدِایی دارَه که تمام دنیانِه وِ دَس بیارَ اَما جونِه خُیِشِه اَ دَس بَیَه؟ 37آیِم دِ عَوَضِ جُونِ خُیِش چی مِتُونهَ بَیَه؟ 38وِرِ ایکه هر که دِ مینِه ایی نسل زِناکار وُ گُنا کار اَ مَنُ صُوَتام عارِش بَشهَ پسر انسانَم اوسِه که اَ مینِه جلالِ بُواَ خُیِش وآردِ فِرِشته آ مقدّس بیا، اَ او عارش مِشهَ.»
Currently Selected:
مَرقُس 8: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
