مَرقُس 6
6
بیایمانی مَردِمِ ناصرَه
1عیسی اونچونِ تَرک کِرد آما وِ شَرِ خیِش، شایِرداش دِ دُمِش رفتن. 2وَختی که روز شَبّات رَسِس عیسی دِ کنیسَه شروع کِرد وِ تعلیم دییَن. خیلیا وا شِنُفتَنِ صُوَتاش شگفت زیَه شُوئِن،اونا مِگُفتن: «ایی مرد تمام ایی چیانِه اَ کجا آوُردَ؟ ایی چِه حکمتیَ که وِش عطا شیَ؟ وُ ایی چه مُعجِزاتیَ که وِ دَسِش انجام مِشَه؟ 3مَیَر ایی همو نجّار نیسا؟ مَیَر پسر مریم وُ بِرارِ یعقوب، یوشا، یهودا وُ شَمعون نیسا؟ مَه خُواَراش اینچو دِ مینِه اِیما زِنِییِ نِمُکُنن؟» پَ وِشو بَر خورد. 4عیسی وِشو گُفت: «نبی بیعزت نیسا،مَیَر دِ شَرِ خُیِش وُ دِ مینِه قَومُ خویش وُ دِ خونه خُیِش!» 5او دِ اونچو نتُونِس هوچ مُعجزهایی کُنَه غیر ایکه دَسِشِ هَشت قَ چَن تا مریض وُ اونانِ شفا دا. 6وَ عیسی اَ بیایمانیشو دِ حیرَت بی ،عیسی دِ دهاتا او اطراف میَشت وُ تعلیم مِدا.
عیسی دُوزَآه شایِردِ نِه مِفِرسَه
7عیسی دُوآزَ شایِردِنِه هِنا کِردُ اونان دُوتا ، دُوتا رِایی کِرد وُ وِشو اِقتدار دا تا ارواح بَدِنِه بَنازن دَر. 8وُ وِ اونا دستور دا: «وِرَ سفر، چییِ غیرِ یِه چودَسی وا خُیِشُو وُرنَرَن نَه نُو، نَه بار کُولَه وَ نَه پُولی دِ پَرِ شالَِو. 9اُرِسی پاتو کنید امّا لِواسِ اضافَه وَرِتو نَکنید. 10وُ وِشو گُفت: وَختی که رَفتید مینِ خونِه ایی وُ اونچو شُمانِ قَوول کِردَن، تا زِمانی که دِ او شَرید دِ هَمو خُونَه بَمُونید. 11وَ اَیَر دِ جایی نَخواسَنِتو یا وِتو گوش نَدان موقِع رَفتَن اَ اونچو خاک پاآتُونِه بَتِکُونید تا شهادتی با وِ ضِدشو که غَضَب خدا میا وِ روشو.» 12پَ شایِردا اِفتان را وُ وِ مَردِم اعلام مِکِردَن که باید تُوبَه کُنَن. 13اونا دیوای زیادی نِه اَ مَردِم کِردَن دَر وُ مریضای زیادی نِه وا روغن تدهین کِردَن وُ شفا دان.
قتل یحییِ تعمید دَهَندَه
14هیرودیسِ حاکم اینِنِ شِنُفت،وِرِ ایکه آوازِۀ اسم عیسی پیچِسَه وی. بعضیا مِگُفتن: «یحییِ تعمید دَهَندَه اَ مُردِآ زِنَه شیَ وَ وِرِ هَمی ایی قدرتای عَجیب اَزِش وِ ظُهور مِرَسَه » 15عده ای مِگُفتن: «ایلیایِ نبیَ.» بعضیا هَم مِگُفتن: «پیغمَرَیَ مِثَ پیغمَرا قَدیم.» 16امّا وَختی که هیرودیس اینِنِ شِنُفت گُفت: «ایی هَمو یحییَ که مَه سَرِشِه بُرییم وُ ایسِه اَ مُرده آ زِنَه شیَ!»
17وِرِ ایکه وِ دستور خُودِ هیرودیس یَحیی نِه گِرفتَه ویِن وُ بَسَه ویِن وُ اِناختَه ویِن دِ زندان. هیرودیس ایی کارِ وِرَ خاطِر هیرودیا کِردَ وی. هیرودیا زنِ فیلیپُس، بِرارِ هیرودیس بی که ایسه هیرودیس اونِه وِ زَنی گِرِفتَه وی. 18یَحیی وِ هیرودیس گُفته وی: «جایِز نیسا که تُو وا زَنِ بِرارِت بایی.» 19هیرودیا اَ یَحیی کینَه وِ دل داشت وُ ماخاس اونِه بَکُشَه، امّا نِمِتونِس. 20وِرِ ایکه هیرودیس اَ یَحیی مِترسِس وِرِ ایکه اونِه مرد صالح وُ مقدّسی مینِس وَ وِرَ هَمی هَواشِ داشت هر وَخت که صُوَتای یَحیانِ مِشنُفت حیرو وُ پریشو مِشُد. وا ایی حال، وا شادی وِ صُوَتای او گُوش مِکِرد.
21بِلاخَرَ فرصتِ خُوئی رَسِس. هیرودیس دِ روز تولُدِ خُیِش جَشنی بر پا کِرد وُ درباریا وُ فرمانرواآ نظامیِ خُیِش وُ بزرگا وُلاتِ جلیل نِه دَعوت کِرد. 22دُختَر هیرودیا آما وِ مَجلِس جَشن وُ رقصِس وُ هیرودیس وُ مهموناشِ خوشال کِرد. بعد پادشا وِ دُختَر گُفت: «هر چی که ماخای اَ مَه بَخوا که اوننِ وِت مییِم.» 23همیجور قسم خُورد گُفت: «هر چی اَ مَه بَخوای حتی نیمی اَ مملکتِمِه،وِت مییِم.» 24دُختَر رفت دَر وُ وِ نِنَش گُفت: «چی بَخوام؟» نِنَش جُواو دا: «سَرِ یحییِ تعمید دَهَندَ نِه بَخوا.» 25دُختَر فِورن وا عجله وُریَشت وَرِ هیرودیس و گُفت: «اَ تُو ماخام هَمی الان سَرِ یحیی تعمید دَهَندَهَ نِه بَلی دِ طَبَقوُ بَییش وِم.» 26هیرودیس خیلی غصه دار شد امّا وِ خاطر قَسَما خُیِش وُ وِرِ ایکه جِلو مِهمونا حرفش دُوتا نَشَه نَخواس که درخواسشِ رَد کُنه. 27پَ فِورن جلّادی فِرسا وُ دستور دا سَرِ یَحیی نِه بیارَه. او رَفت وُ سَرِ یَحیی نِه دِ زندان اَ بدن جدا کِرد، 28وُ اونِه هَشت رو طَبَقی اُوُرد وُ دا وِ دُختَر. اونَم اونِ وِ نِنَش دا. 29وَختی که شایِردا یَحیی اینِنِ شِنُفتِن آمانُ جسدشِ وُرداشتِن وُ هَشتِنِش دِ قَبر.
پَخشِ غِذا بِین پینش هزار نَفر
30رسولا وُریَشتِن وَرِ عیسی وُ هر چیی که کردَه ویِن وُ تعلیم دیَه ویِن وِرَش گُفتِن. 31عیسی وِ اونا گُفت: «وام بیاید وِ جا خَلوت وُ پِرتی بَریمُ کمی استراحت کُنید.» وِرِ ایکه آمَد وُ شُدِ مَردِم جوری بی که وَخت نو خُوردِنَم نَشتن. 32پَ خُیِشُو تَنا وا قایقی اِفتان را وِ طرف جایی خلوت. 33امّا وَخت رَفتَن عده زیادی اَ مَردِم اونانِ دییِنُ شِناختِن. پَ مَردِم اَ تمام شَرا پا پیادَه وا عجله آمان وِ او محل وُ قبلِ اونا رَسِسِن اونچو. 34وَختی که عیسی اَ قایق آما دامو جمعیت زیادینِه دیی وُ دلِش ورَشو سُوخت، وِرِ ایکه مِثِ گوسوَنای بیچُوپُو بییِن. پَ شروع کِرد وِ تعلیم دییَن وُ خیلی چیا وشو یاد دا. 35دَم ایوارهَ شایِردا آمان وَرِشُ گُفتِن: «اینچو جا پِرتیَ وُ دیر وَختَم هِسا. 36مردِمِ نِه بَفِرس تا بَرَن وِ داهاتا وَ زِمینا ایی اطراف وُ وِرَ خُیِشُو غِذا بَخَرَن.» 37عیسی دِ جُواو گفت: «شما خُیِتُو و اونا غِذا بَئید.» گُفتِن: «یعنی ماخای بَریم وُ دویس دینار نُو بَخریم وُ بَییم وِ اونا بَخورَن؟» 38عیسی گفت: «بَرید پُرسِ و جو کنید بُویینید چَن تا نُو دارید؟» هَمی که فَمِسِن چَن تا نُو دارَن وِ عیسی گُفتِن: «پَینش تا نُو وُ دُوتا ماییی.» 39اوسِه وِ شایِرداش گُفت تا مرَدِمِ نِه دَسَه دَسَه بَنیشونَن رو سبزَزار. 40وِایی ترتیب مردِم دِ دَسِه آ صد نَفَرَی، وُ پنجا نَفَری نِشِسِن رو زِمی. 41اوسِه پَینش تا نُو وُ دُوتا ماییی نِه وُرداشت وُ سِیل کِرد وِ آسِمونُو نُونا وَ ماییانِه بَرکت دا. بَعد نُونا نِه تیکهَ تیکهَ کِرد وُ دا وِ شایِرداش تا بَلَن وَرِ مَردِم؛ دُوتا ماییی نِه هَم وِرَشو تقسیم کِرد . 42هَمشو خُوردِن و سیر شُوئِن. 43وُ اَ خُوردَ نُونا وُ مایی باقی مُنَه ، دُوآزَ سَوَد پُر،جمع کِردَن. 44تعداد اونایی که غِذا خُوردِن پَینش هزارتا مرد بی.
را رفتن عیسی رو اِوُ
45عیسی فِورن شایِرداشِ وادار کِرد تا دِ همو حال که او مرَدِمِ نِه مُرخَص مِکِرد، سُوآرِ قایق بَشَن وُ قبل او بَرَن وِ بِیتصِیْدا وِ او طرف اِوُ. 46بَعدِ رایی کِردَنِ مَردِم، خُیِش رَفت وِ کُوء تا دعا کُنَه.
47دَمِ ایوارهَ قایق رَسِس مینجا دریاچَه وُ عیسی دِ خشکی تنا بی. 48دیی که شایِرداش وِ زُور پارو مِزِنَن وِرِ ایکه باد مخالِف اونا مِزا ،ساعت نَزیک سِه نِصفِه شُو، عیسی قَدَم زِنو وِ رو اِوُ رَفت وِ طرفشو وُ خواس اَ کنارشو رَد با. 49امّا همی که شایِردا اونِ دِ حال را رَفتن رو اِوُ دییِن، گِمو کِردَن روحیَ پَ هَشتن وِ داد و حَوار کِردَن. 50وِرِ ایکه اَ دیدَنش زَرتِلاک شیَ ویِن امّا عیسی فِورن واشو صُوَت کِرد وُ گفت: «دِلتو قُرص مَنِم. زَلَتو نَرَ!» 51اوسِه آما وَرِشو مینِه قایق وُ باد قطع شد. اونا خِیلی تعجب کِردَن، 52وِرِ ایکه معجِزِۀ نُونانِ دَرک نَکِردَوین بلکه دِلِشو سخت شیَ وی.
53وَختی که رَسِسِن وِ او طَرَفِ اِوُ، دِ سَرزِمین جِنیسارِت آمان دامو وُ دِ اونچو لنگر اِناختن. 54اَ قایِق کِه آمان دامو مَردِم فِورَن عیسی نِه شناختِن. 55وُ بُدو بُدو رفتِن وِ سَراسَر او منطقَه وُ مَریضانِه هَشتِن رو تختا وُ بُردِن وِ هر جا که شِنُفتن او دِ اونچونَ. 56عیسی وِ هر دِهات یا شَر وَ یا سرزِمینایی که مِرَفت مَردِم مَریضانه میزاشتِن دِ مِیدونا وُ وِش مِلاکِسِن اِجازَه بَیَه دسِ کم دَس بَلَن وِ گوشه رداش وُ هرکَه دَس مِزا شفا میرِفت.
Currently Selected:
مَرقُس 6: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
